“Ko e Tui ʻa Sisitā Mūnosí” Liahona, Siulai 2025.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Tui ʻa Sisitā Mūnosí
“Ko e Mana! Ko e Mana!” ko e kaila ia ʻa e kiʻi tamasiʻí ʻi heʻene lele ʻi he halá.
Tā fakatātaaʻi ʻe David Malan/Malan Creative
ʻI he 1967, ne u hoko ai mo ʻEletā Viliami Tana ko e toko ua ʻo e kau fuofua faifekau ʻe toko 20 ke ngāue ʻi Kolomupiá. Naʻe siʻi ke maʻu haʻama ola kae tālunga ha tangata naʻe ui ko Lolo, naʻe ʻosi akoʻi ʻe ha kau faifekau kehe, naʻá ne fakafeʻiloaki kimaua ki he fāmili Mūnosí. Naʻe mālohi ʻa e Laumālié ʻi heʻema akoʻi ʻa e fāmilí, ʻo fakamoʻoni ki he Palōfita ko Siosefa Sāmitá mo e Fakafoki Mai ʻo e Ongoongoleleí.
Naʻe pehē ʻe Lolo, “ʻOku ou ʻilo ʻoku lea ʻaki ʻe he ongo talavoú ni ʻa e moʻoní. ʻOkú na maʻu ʻa e lakanga fakataulaʻeiki tatau naʻe maʻu ʻe Sīsū Kalaisí. Te nau lava ʻo ō ki ʻolunga he taimí ni ʻo fakamoʻui hoʻo ʻofefine kui ko Makalitá.”
Naʻe sio mai ʻa Sisitā Mūnosi kiate au peá ne fehuʻi mai, “Ko e moʻoni ia?”
Naʻe faingataʻa ke u tali ange. Kuo teʻeki ai siviʻi peheni ʻeku fakamoʻoní kimuʻa. Naʻá ku ʻiloʻi ko e faʻahinga mana peheé ʻe fiemaʻu ki ai ha tui mālohi. Naʻá ku toki ʻilo kimui mo hoku hoá naʻe talaange ʻe he kau mataotao ʻi he matá ki he fāmilí ko Makalitá, ʻa ia naʻe kui ʻi he māhina ʻe ono kimuʻa ʻi he hili ha fakatuʻutāmaki, he ʻikai ke toe lava ʻo sio.
Naʻe pehē ʻe Sisitā Mūnosi, “ʻOkú mo maʻu ʻa e lakanga fakataulaʻeiki tatau mo Sīsū Kalaisi. ʻOku kui ʻeku taʻahiné. Tau ō ki ai ʻo fakamoʻui.”
Kuo teʻeki ai ke u siotonu ʻi ha fuʻu tui lahi pehē. Naʻe hangē ia ko e uaifi ʻo e Tuʻi ko Lāmonaí, ʻa ia naʻá ne talaange kia ʻĀmoni, “ʻOku ou tui ʻe hoko ʻo hangē ko hoʻo leá” (ʻAlamā 19:9).
Naʻe tākai ʻe ʻEletā Tana ʻa Makalita, peá u fakamaʻu ʻa e tākaí. Naʻá ku ʻohovale, he ko e lea naʻe haʻu mei hoku ngutú naʻe ʻikai ko e lea ia ʻaʻaku: “ʻE fakamoʻui koe pea te ke lava ʻo toe mamata.” Naʻá ku toe ongoʻi foki ke foaki ha ngaahi tāpuaki kehe, ʻo kau ai ʻe tokoni ʻa e kau mēmipa ʻo e fāmilí ke langa ʻa e Siasí ʻi Kolomupia. Hili iá, naʻá ku fifili pe naʻá ku fai nai ha ngaahi palōmesi he ʻikai ke fakahoko.
ʻI he ʻaho hono hokó, naʻe lele mai e foha taʻu hongofulu tupu ʻo e fāmilí kiate kimaua, ʻi he halá mo kaila, “Ko e Mana! Ko e Mana! ʻOku lava hoku tuofefiné ʻo sio!”
Naʻá ma papitaiso ha kakai ʻe toko 13 he uike ko iá.
Naʻe hoko ʻa Brother mo Sisitā Mūnosi ko ha ongo mēmipa faivelenga ʻo e Siasí. Naʻe tokoni hona ivi tākiekiná, kau ai e ngāue ʻa Brother Mūnosi ko e taki ʻo e potungāue kasitomú ʻi Kolomupiá, ke fakamafola ʻa e ongoongoleleí. Naʻe ngāue fakafaifekau ha ʻofefine ʻe taha; pea hoko hono tuongaʻané ko ha pīsope. Naʻe ʻā ai pē ʻa Makalita ʻi he toenga ʻo ʻene moʻuí.
Kuo folofola ʻa Sīsū Kalaisi fekauʻaki mo kinautolu ʻoku tui kiate Iá, “Te nau fakaʻā ʻi hoku hingoá ʻa e mata ʻo e kuí” (Tokāteline mo e Ngaahi Fuakava 84:69). ʻOku ou ʻilo ʻoku “faʻa fai ʻa e meʻa kotoa pē kiate ia ʻoku tui” ki he Fakamoʻuí (Maʻake 9:23).