“ʻOku ou Ongoʻi Nonga ʻi Hoku Lotó,” Liahona, Siulai 2025.
Ngaahi ʻAta ʻo e Tuí
ʻOku ou Ongoʻi Nonga ʻi Hoku Lotó
ʻI heʻeku hoko ko ha taha ako nēsí, naʻá ku ongoʻi naʻe ʻikai ke ʻi ai haʻaku taimi ki hoku uiuiʻi faka-Siasí mo ʻeku akó. Ka kuó u ʻosi ako ʻi heʻeku kei talavoú ʻoku fakaiku ʻa e ngāue mo e talangofua ki he ngaahi fekau ʻa e ʻOtuá ki ha moʻui ʻoku fiefia.
‘Ū tā ʻa Christina Smith
ʻI heʻeku taʻu hongofulu tupu siʻí, naʻá ku fakakaukau ke u mavahe mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ka ʻi he taimi tatau, naʻá ku fakatokangaʻi kuo teʻeki ke u fuʻu muimui ki he ngaahi akonaki kotoa ʻo e Siasí. Naʻá ku pehē ai kapau te u mavahe mei he Siasí, teu fiemaʻu ke u ongoʻi lelei fekauʻaki mo ia.
Ko ia, naʻá ku pehē teu feinga ke talangofua ki he meʻa kotoa ʻoku akoʻi ʻe he ongoongoleleí. Pea, kapau leva te u kei ongoʻi ʻiate au naʻe ʻikai hano ʻuhinga lelei ʻo e ngaahi akonakí, te u ala mavahe ʻo ʻikai ha toe fakaʻiseʻisa.
Naʻá ku feinga ʻaki hoku “ivi, ʻatamai, mo e mālohi kotoa” (Tokāteline mo e Ngaahi Fuakava 4:2), ke talangofua ki he meʻa ʻoku akoʻi ʻe he ʻEikí mo fakasio ʻa e meʻa ʻe hokó. ʻI he aʻusia ko iá, naʻe foaki mai ai kiate au ha vahaʻa-taimi fiefia ʻo aʻu ki ha tuʻunga naʻe teʻeki ke u lava ʻo maaʻusia kimuʻa. ʻI heʻeku kei ʻi he Siasí, naʻá ku ongoʻi te u lava ʻo moʻui fiefia, ʻi heʻeku ʻiloʻi ʻa e fiefia moʻoní.
Hili e aʻusia ko iá, naʻá ku fakakaukau leva ke u ʻalu ʻo ngāue fakafaifekau ʻo vahevahe ʻa e nonga naʻá ku ongoʻi ʻi hoku lotó. Neongo ʻa e ngaahi faingataʻa te u fehangahangai mo iá, kuó u ʻosi ʻilo kapau te u lotu ki he ʻOtuá, te Ne faitokonia au, ʻo foaki mai ha ʻamanaki lelei, mo tokoni ke mahino kiate au ʻa e ʻuhinga ʻo hoku ngaahi faingataʻaʻiá.
Ko e hā ʻoku totonu ke u faí?
Hili ʻeku ngāue fakafaifekaú, pea lolotonga ʻeku ako ke hoko ko ha nēsí, naʻá ku fakamoleki ha taimi lahi ʻi he ʻaho takitaha ʻo fakahoko ʻa e ako ngāue ʻi he lolotonga ʻo e ngāué. Hili iá, naʻá ku fai leva ʻa e ngaahi ngāue ke fai mei ʻapí kae ʻoua kuo hoko ʻa e 2:00 pe 3:00 hengihengí. Peá u kiʻi mohe nounou leva kimuʻa pea toki fai ha ako ngāue lahi ange ki he ʻaho hono hokó.
ʻI he taimi ko iá, naʻá ku hoko ko e palesiteni ʻo e Kau Talavou ʻo e uōtí. Naʻe mātuʻaki faingataʻa kiate au ke u ako mo toe fakahoko hoku fatongia faka-Siasí. Neongo ia, naʻá ku ʻiloʻi kapau te u tuku hoku fatongiá, he ʻikai ke u lava ʻo akoʻi ʻa e kau talavoú ʻi he mahuʻinga ʻo e muimui ʻi he hala ʻo e ʻOtuá pe maʻu ʻa e ngaahi tāpuaki kuó Ne tokonaki maʻakú.
“Ko e hā ʻoku totonu ke u faí?” Ko ʻeku fehuʻi ia ki he Tamai Hēvaní. “Kuo mafasia hoku sinó mo e ʻatamaí, pea ʻoku ʻikai ke u tui ʻoku ou fakahoko ʻa e faʻahinga ngāue ʻokú ke finangalo ke u fakahokó.”
Naʻe fakafiemālieʻi au ʻi he hili ʻo ʻeku lotú. Naʻá ku ongoʻi naʻe talamai ʻe he ʻOtuá, “Ko e taimi ko ʻeni ʻokú ke fakamoleki ke ngāue mātuʻaki mālohi aí, ʻoku mahuʻinga ia kiate koe. Mahalo ko hoʻo taimi-tēpile femoʻuekiná ʻoku faingataʻa, ka kapau te ke ikunaʻi ʻa e faingataʻa ko ʻení he taimí ni, te u fakaʻaongaʻi koe ke tāpuakiʻi mo tokoniʻi ha tokolahi kehe ʻi he kahaʻú.”
Naʻe fakapapauʻi mai ʻe he tali ko ʻení naʻe ʻi ai haʻaku taumuʻa, pea kapau te u kātekina, te u lava ʻo fai ha ngāue makehe ʻi he kahaʻú.
Naʻá ku talaange ki he kau talavoú ʻa e faingataʻa ʻo e akó kiate aú. Ka naʻá ku toe talaange foki kiate kinautolu ʻoku mahuʻinga ʻa e Siasí mo e ongoongoleleí pea ʻoku totonu ke hoko ia ko e uho ʻo ʻetau moʻuí ʻo aʻu ki he lotolotonga ʻo e ngaahi faingataʻá. Naʻá ku fakahaaʻi ange ʻeku ʻofa kiate kinautolú mo fakahā ange ʻoku ou feinga mālohi ke fakahoko hoku uiuiʻí he ʻoku nau mahuʻinga tatau pē kiate au mo ʻeku akó. Naʻa nau tangi ʻi he ongo ki honau lotó ʻa e moʻoni ʻo e ngaahi meʻa ko ʻení.
Faitāpuekina ʻi he Ngāué
ʻI he hokohoko atu ʻeku tokoniʻi ʻa e kau talavoú mo akoʻi ange ʻa e ongoongoleleí, naʻá ku fakakaukau lahi ki heʻenau ngaahi ongo faingataʻaʻia ʻi he taʻu hongofulu tupu siʻí, ʻi heʻenau maʻulotu mo ako ʻa e ongoongoleleí. Naʻá ku tokanga ki honau tuʻunga fakaʻatamaí mo tokoni ʻi heʻenau ngaahi fiemaʻu fakafoʻituituí.
Naʻe tokoni ʻeku ngāue ʻi he kau talavoú ke u fakatupulaki ai ha ivi malava ke fakatokangaʻi mo ʻiloʻi ʻa e fanga kiʻi liliu ʻi he kakaí. ʻOku ou ngāue ʻeni he taimí ni ko ha neesi mo tokangaʻi ha kau mahaki tokolahi, kuó u fakaʻaongaʻi ʻa e malava ko iá ʻi he taimi ʻoku ou feohi ai mo e niʻihi kehé.
ʻOku talamai ʻe he kaungā ngāué kiate au, “ʻOku talamai ʻe he taha mahaki ko ʻeé ʻoku mahino moʻoni kiate koe ʻa ʻene ngaahi ongo.” Pe ʻe pehē ʻe ha taha mahaki, “Kuó u ʻilo ʻoku faingofua ke talanoa atu kia koe.”
Kuo tāpuekina foki au ʻe he ngāue ʻi he ngaahi fatongia faka-Siasí, ʻi ʻapi. Kuó u ako ke fakamuʻomuʻa hoku uaifí ʻi heʻeku ako ke fakasiʻisiʻi ange ʻeku siokitá.
ʻOku ou fehuʻi loto pē, “Kapau na ko e Tamai Hēvaní au, “ʻe founga fēfē Haʻane fakamālohia ʻa e fāmili ko ʻení, mo e meʻa ʻoku totonu ke fai ke aʻusia ai iá?”
Koeʻuhí kuó u ʻosi ako ʻa e ongoongoleleí ʻaki hoku lotó kotoa, ʻoku ou ʻiloʻi ai ʻa e founga mo e ʻuhinga ke akoʻi ai ʻeku fānaú ʻoku mahuʻinga ʻa e Siasí. ʻOku ou ʻilo mo hoku uaifí ʻa e founga ke fafangaʻi fakalaumālie ai homa fāmilí koeʻuhí he ʻoku fakatefito ʻema ngaahi akonakí ʻi he ngaahi akonaki ʻa e Fakamoʻuí.
ʻOku ou maʻu ha ʻamanaki lelei mo ha nonga ʻi hoku lotó ʻi heʻeku muimui ki he ngaahi akonaki ʻa e ʻEikí mo fakafanongo ki Heʻene ngaahi ueʻí. Kuó Ne ʻi hoku tafaʻakí ʻi he kotoa ʻo ʻeku fonongá, ʻo tāpuakiʻi au ʻi heʻeku talangofuá pea mo hoku ngaahi uiuiʻí ke tāpuakiʻi mo tokoniʻi ʻa e niʻihi kehé. Neongo pe ko e hā ʻa e ngaahi faingataʻá, ka ʻoku ou loto ke u moʻui ʻi ha founga te u lava ai ʻo fai e finangalo ʻo Sīsū Kalaisí (vakai, 2 Nīfai 32:3).