Te Ma Toe Mamata Nai ki Homa Mokopuna Fefiné?

Tā fakatātaaʻi ʻe David Malan/Malan Creative

Naʻe mālōlō ʻema tamasiʻi lahi tahá ʻi he 1999. Naʻe kei moʻui hono uaifí mo ha kiʻi taʻahine taʻu taha ʻokú ma feohi fiefia mo lelei ʻi he uike kotoa.

Koeʻuhí ko ha ngaahi tūkunga fakatuʻutāmaki fakamamahi, ko e taimi fakamuimui taha ia naʻá ma fetuʻutaki ai mo homa mokopuna fefiné. Naʻá ma lotu, ʻaukai, mo fakaʻamu ʻi ha ngaahi taʻu lahi ʻe ʻi ai ha faʻahinga founga te ma lava ai ʻo toe sio ki ai.

ʻI he lolotonga e konifelenisi lahi ʻo ʻOkatopa 2018, naʻe fai ai ʻe Palesiteni Lāsolo M. Nalesoni ha fakaafe mo ha palōmesi: “ʻOku ou tapou atu ke ke feinga ke ke fetuʻutaki maʻu pē mo e ʻEikí—ʻo ʻalu ki Hono fale māʻoniʻoní—pea tauhi pau maʻu pē taimi ko iá ʻi he fiefia. ʻOku ou palōmesi atu ʻe ʻomi ʻe he ʻEikí ha ngaahi mana ʻokú Ne ʻafioʻi ʻokú ke fiemaʻú ʻi hoʻo feilaulau ke tokoni mo mōihū ʻi Hono temipalé.”

ʻI heʻeku fanongo ki he ngaahi lea ko ʻení, naʻá ku ongoʻi ko e folofola ʻeni ʻa e Tamai Hēvaní kiate au ʻo fakafou Heʻene palōfitá. Naʻá ku tukupā leva mo hoku husepānití ke ma kamata ō ki he temipalé ʻi he Tūsite kotoa mo “faipau [ki he tukupā ko iá mo fiefia.”

ʻI ha ʻaho ʻe taha ʻi he 2019, naʻe taʻeʻamanekina e tohi mai homa mokopuna fefiné kuo taʻu 21 ʻeni, ʻi he ʻinitanetí. Naʻe kamata māmālie mai ʻene fetuʻutakí ʻi he kamataʻangá, ka ʻi he hoko atu ʻo ʻene ngaahi pōpoakí, naʻe kamata ke ne fai ha ngaahi fehuʻi naʻá ne fakatupu ha fepōtalanoaʻaki fakaʻofoʻofa. Naʻe aʻu ʻo ne fakakau atu kimaua ki heʻene moʻuí he kamataʻangá pea hokohoko mai ai pē.

Naʻá ma fakaafeʻi ia ʻi he 2021 ke mau feohi ʻi he ʻAho Fakafetaʻí (Thanksgiving) mo homau fāmilí. Naʻá ne tali, pea naʻa mau maʻu ha taimi fakaʻofoʻofa ke feohi ai mo ia. Naʻe faingofua pē ʻene feohi mo hono ngaahi mehikitangá, faʻē-tangatá, ngaahi fakafotú, mo e ngaahi ʻilamutú. Naʻá ne loto ke hoko ʻene ʻeva mai ʻi he ʻAho Fakafetaʻí ko ha meʻa tukufakaholo.

ʻI ha taʻu ʻe taha mei ai, ne ma toe fetuʻutaki mo haʻama foha naʻe fuoloa ʻemau taʻe fetuʻutakí. ʻI Māʻasi 2024, naʻa mau fai ai ha fakataha fakafāmili naʻe kau ai ʻa e fānau moʻuí kātoa, honau ngaahi malí, mo e makapuná kotoa ʻe toko 16, ko e fuofua taimí ia ʻi he moʻui homau fāmilí.

Naʻá ku tui maʻu pē ʻoku lea ʻa e palōfitá maʻá e ʻEi ʻOku ou tui naʻe hoko ʻa e mana naʻe fuʻu fiemaʻu lahi ko ʻení koeʻuhí ko e fakahinohino mo e talaʻofa naʻe fakahā ʻe Palesiteni Nalesoní.

Ko ʻeku fakamoʻoni mo e ʻofa ki heʻeku Tamai Hēvaní mo Hono ʻAló naʻe ʻikai, pea ʻoku ʻikai makatuʻunga ia ʻi he mana ko ʻení. Neongo ia, ʻoku ou ofo ʻi he fakapatonu mai ʻo ʻEna ʻofa kiate aú pea mo e mālohi ʻo ʻEna ngaahi talaʻofa ʻa ia ʻoku fakafou mai ʻi he palōfitá.