Ngaahi peesi fakalotofonuá
Nabeina Green Market Incorporated [Kautaha Māketi Ika Napeiná]
Ko Ha Fononga ʻo e Tuí, Ngāue Tokoní, mo e Fakalakalaka Fakakoló
Naʻe uiuiʻi au mo hoku uaifi ko Sisitā Pilitá ke ma ngāue ko ha ongo faifekau mali ʻi Napeina, ko ha kiʻi motu siʻisiʻi ʻi he Pasifikí. Ko e momeniti naʻá ma tau atu aí, naʻá ma maʻu ha ongoʻi nonga mo ha taumuʻa. Hili ha lotu lahi, naʻá ma feinga ki ha fakangofua mei heʻema palesiteni fakamisioná, Palesiteni Kenitolo, ke ma fakahoko ʻema ngāue fakafaifekau taʻu tahá ʻi Napeina. Naʻe tali ʻema kolé, ʻo kamata ai ha fononga ʻo e tui, ngāue tokoni mo e langaki ʻo e koló ʻa ia te ne liliu ʻema moʻuí ʻo taʻengata pehē ki he moʻui ʻa kinautolu naʻá ma tokoniʻí.
Ngaahi Vakaí mo e Ngaahi Polé
ʻOku tokolahi ʻa e kāinga Katolika mo e Palositaine ʻi Napeina, kae tokosiʻi pē ʻa e Kāingalotu ʻo e Siasí. ʻOku hoko hono vahevahe ʻa e ongoongoleleí ko ha pole, ka naʻá ma ongoʻi mālohi naʻe ui kimaua ke ngāue tokoni ki he kakaí. Naʻá ma mamata ki heʻenau loto-vilitakí mo e mohu foungá, tautefito ki he houʻeiki tangata naʻa nau taukei ʻi he toutaí. Ka, naʻe vaetuʻua ʻenau tokoni ki honau ngaahi fāmilí ʻe he siʻi ʻa e naunau toutai leleí. ʻI heʻema mātā ʻenau ngaahi faingataʻaʻiá, naʻá ma ongoʻi ha loto-holi mālohi ke tokoni.
Ko ha Ueʻi Fakalangi: Ko e Kole ha Tokoni ʻOfa Fakaetangatá
ʻI ha efiafi ʻe taha, lolotonga ʻema fakakaukauloto ki he ngaahi fiemaʻu ʻa e koló, naʻá ma ongoʻi naʻe ueʻi kimaua ke ma kumi tokoni mei he Paʻanga Tokoni ʻOfa Fakaetangata ʻa e Siasí. Naʻá ma fakakaukauloto atu ki ha polōseki te ne fakaivia ʻa e kau toutaí ke nau tokonaki maʻa honau ngaahi fāmilí mo tokoni ki he ako ʻenau fānaú. ʻI he fakahinohino ʻa ʻEletā mo Sisitā Letimoní, naʻá ma fokotuʻu ʻa e fakakaukau ke ʻomi ha naunau toutai, ko ha vaka papa, mo ha mīsini vaka ʻi tuʻa. Naʻá ma fiefia ʻi hono tali ʻa e kolé pea malava mo hono fakapaʻangá. Naʻe fakaʻilongaʻi heni ʻa e kamataʻanga ʻo ha polōseki te ne fai ha liliu lahi.
Ko Hono Kamataʻi ʻo e Kautaha Māketi Ika Napeiná
ʻI heʻemau ngāue fakataha mo e palesiteni fakakolo fakalotofonuá, Palesiteni Mauea Mauea, naʻa mau fokotuʻu ai ha polokalama naʻe fakataumuʻa ki he toutaí, ʻi he koló, ʻo lesisita fakaʻofisiale ko e Kautaha Māketi Ika Napeiná. Naʻe mahulu hake ia ʻi he feinga fakaʻekonōmiká pē, naʻe fakatupu ʻe he langa ngāue ko ʻení ha uouangataha mo e moʻui fakafalala pē kiate kita ʻi he kakai ʻo Napeiná.
Ko e Tau Mai ʻa e Naunau Toutaí mo e Vaká
Naʻe ʻuluaki aʻu mai ʻa e ngaahi kupengá, pea naʻe kamata fakaʻaongaʻi leva ʻe he koló ʻi he taimi pē ko iá. Lolotonga ʻa e tatali ki he vaka papá, naʻá ku tuku atu ʻeku vaka faipá ke ngāue ʻaki ʻe he kau toutaí. ʻI he ʻaho 9 ʻo Fēpueli, 2025, naʻe faifai kuo tau mai ʻa e vaka papá mo e mīsiní. Naʻe fakatahatahaʻi mai ʻe ha kātoanga hopoki makehe, ʻa e koló, ʻi he houngaʻia mo e lotu. Naʻe mātuʻaki fakalaumālie ʻa e momeniti ko iá, ʻo ne fakapapauʻi ʻemau fakamoʻoni ki he toʻukupu ʻo e ʻEikí ʻi he ngāue ko ʻení.
Alanima mo e Fengāueʻaki Fakataha ʻa e Koló
Naʻe fakafalala ʻa e lavameʻa ʻo e polōseki Kautaha Māketi Ika Napeiná ki he fengāueʻaki fakatahá. Naʻe ʻomi ʻe he kau tangata toutaí ʻi he uike kotoa pē ʻa e ngaahi kupengá ʻo monomono lolotonga ia hono fakalele ha ngaahi fakataha ke aleaʻi ha ngaahi ʻekitivitī toutai mo e tūkunga lelei ʻo e koló. Lolotonga ʻa e ngaahi fakataha ko ʻení, naʻe fakahaaʻi ʻe ha tokolahi ʻa hono tāpuekina ʻe he polōseki ko ʻení ʻa ʻenau moʻuí. Naʻe pehē ʻe ha tangata toutai loʻimataʻia, “ʻOku ʻikai ko ha kiʻi vaka pē ʻeni; ka ko ha meʻaʻofa ia mei he ʻOtuá. Kuó ne ʻomi kiate kitautolu ha ʻamanaki lelei mo ha kahaʻu.”
Loto-Houngaʻiá mo e Ngaahi Fakamoʻoní
ʻOku matuʻaki houngaʻia ʻa e kakai ʻo Napeiná ʻi he poupou ʻa e Tokoni ʻOfa Fakaetangata ʻa e LDS. Kuo tali ʻe he naunau toutaí mo e vaká ha ngaahi lotu, ʻo ne ʻomi ki he ngaahi fāmilí ʻa e founga ke tokonaki ai maʻanautolu. Lolotonga ʻa e ngaahi fakataha ko ʻení, naʻe vahevahe ʻe ha niʻihi tokolahi ʻenau ngaahi fakamoʻoni ki hono fakamālohia ʻe he tokoni ko ʻení ʻa ʻenau tuí. Naʻe pehē ʻe ha fefine ʻe taha, “Kuo mau lotua maʻu pē ha founga ke tokonaki ai maʻa ʻemau fānaú. ʻI heʻemau maʻu ko ʻeni ʻa e vaká mo e ngaahi kupengá, ʻoku mau lava ai ʻo sio ki he toʻukupu ʻa e ʻOtuá ʻi heʻemau moʻuí. Kuo ʻikai ke ne fakangaloʻi kimautolu.ˮ
ʻOfa mo e Ngāue Tokoni ʻo Ope Atu ʻi he Tuí
Neongo ko e tokolahi taha ʻo e koló ʻoku ʻi ha fungavaka kehe, ka naʻá ma tui maʻu pē mo Sisitā Pilita ki hono tokoniʻi ʻa e fānau ʻa e ʻOtuá. Naʻe ʻikai ko ʻema taumuʻá ke fakahāhā ʻema tui fakalotú ka ke fakahaaʻi ʻa e ʻofa faka-Kalaisí ʻo fakafou ʻi he ngāué. Naʻe fakatahatahaʻi mai ʻe he polōseki ko ʻení ʻa e kakaí neongo pe ko e hā ʻenau tui fakalotú, pea ʻokú ma houngaʻia ʻi heʻema hoko ko ha meʻangāue ʻi he toʻukupu ʻa e ʻEikí.
Ko e polōseki Kautaha Māketi Ika Napeiná ko ha fakamoʻoni ia ki he mālohi ʻo e tuí, ngāue tokoní, mo e koló. Makatuʻunga ʻi he fakahinohino ʻa e ʻEikí, tokoni ʻofa fakaetangatá, mo e ngāue mateaki ʻa e kakai Napeiná, kuo fokotuʻu ai ha tuʻunga moʻui ʻoku tuʻuloá. ʻOku ope atu ʻa e ngaahi tāpuakí ʻi he faingamālie fakaʻekonōmiká, ʻo ne langaki ʻa e uouangatahá mo e moʻui fakafalala pē kiate kitá.
Kuó u mātā mo Sisitā Pilita ʻa e toʻukupu ʻo e ʻEikí ʻi he foʻi laka kotoa pē, talu mei he ueʻi fakalaumālie ʻi he kamataʻangá ʻo aʻu ki hono hopoki ʻo e vaká. ʻOkú ma ʻiloʻi ko e kamataʻangá pē ʻeni ki Napeiná, pea ʻokú ma fakatuʻamelie atu ke mamata ki he hokohoko atu hono tāpuekina kinautolu ʻe he ʻEikí.
“He naʻá ku fiekaia, pea naʻa mou foaki ʻa e meʻakai kiate au: naʻá ku fieinua, pea naʻa mou foaki ʻa e inu kiate au: ko e muli au, pea naʻa mou fakaafeʻi au” (Mātiu 25:35).
ʻOku fakafofongaʻi ʻe he polōseki Kautaha Māketi Ika Napeiná ʻa e potufolofola ko ʻení ʻi he fakatahataha mai ʻa e koló ke fefakamālohiaʻaki kinautolu ʻi he tui mo e ngāue tokoni.