Peresitedi Timothy L. Farnes

Ni se qai yabaki 14 o Peresitedi Timothy L. Farnes, a tekivu bolea na nona vakabauta vakalotu e dua na itokani mai na dua tale na vakabauta. Ena imatai ni gauna ena nona bula vaka cauravou, a vakadinadinataka kina o Timothy ni parofita ni Kalou o Josefa Simici ka dina na Lotu i Jisu Karisito ni Yalododonu Edaidai.

“A vakasinaita na rumu na Yalotabu. E laurai dina,” e nanuma lesu o koya. “Keimami vakila kece, ka keimami sa veisau kece.”

E kaya o Peresitedi Farnes ni vinakata mera kila na itabagone ni Lotu nira tiko vakaitaukei ena matavuvale ni Kalou.

“Era luvena na Kalou ka luve ni veiyalayalati,” e kaya o koya, “ka rawa ni ra yaco me tisaipeli i Jisu Karisito kevaka era na ciqomi Koya—ciqoma na isolisoli e nodra ena vuku ni Nona Veisorovaki.”

A sucu o Timothy Lowell Farnes ena ika 29 ni June, 1969, mai Baltimore, Maryland, vei rau o Gary William Farnes kei Mary Ellen Farnes. Ni se gonelailai, eratou a toki na nona matavuvale ki Utah, ka a tubu cake kina. O koya e ulumatua ni ciwa na gone.

A veiqaravi talega vaka daukaulotu o Peresitedi Farnes ena Tabana ni Kaulotu e Porto Alegre, Brazil. A vulica na bula vakailavo ena Brigham Young University ka qai tekivutaka e muri e vica na kabani, oka kina na MedSource Direct, Aspire, kei na World Joy ena veivuke vakamatatamata raraba sega ni vakatubu ilavo.

A vakamautaki Linsey Anne Farnes ena Valetabu e Salt Lake ena ika 27 ni Okosita, 1992. E lima na luvedrau ka ono na makubudrau, ka ra vakaitikotiko mai Bountiful, Utah.

Erau a veiqaravi vaka-iliuliu ni kaulotu o Peresitedi kei Sisita Farnes ena Tabana ni Kaulotu na Brazil São Paulo North mai na 2014 kina 2017. Na veikacivi taumada nei Peresitedi Farnes e oka kina na Vitusagavulu ni iWasewase ena iWasewase e Utah, peresitedi ni iteki, lewe ni matabose e cake, bisopi, kei na bisopi ni itabagone qase cake.