Elder Ronald M. Barcellos

Ni se qai yabaki 12, a wilika kina o Elder Ronald M. Barcellos na iVola i Momani ena imatai ni gauna. Ni sa wiliwili oti, a gole vua na qasenivuli ni semineri ena nona tabanalevu ka kerea ke rawa ni sa lewena na kalasi ni semineri.

“Au lewena na semineri mai na yabaki 12 kina 18 baleta niu taleitaka meu tiko e kea ka vakarorogo kina italanoa ni iVolatabu kei na iVola i Momani,” e kaya o koya. “Au dau vakila tu ga na lomana na kosipeli, kau dau vakila tu ga ni sa ka dina.”

Na nona laki kaulotu e muri a vaqaqacotaka na nona vakabauta, ka yalataka me dau vakaliuca tikoga na kosipeli ena nona bula.

“Mo volekata tikoga na [Tamada Vakalomalagi], rokova na nomu veiyalayalati, ena yaco na Nona ituvatuva me baleti iko,” e kaya o koya.

A sucu o Ronald Maldonado Barcellos mai São Paulo, Brazil, ena ika 4 ni Noveba, 1975, vei rau o Sérgio Barcellos Silveira kei Marcia Maldonado Barcellos Silveira. A vakamautaki Karin Spat Albino Barcellos Silveira ena Valetabu e São Paulo Brazil ena ika 4 ni Tiseba, 1999. Erau nodratou itubutubu e tolu na gone.

A vulica o Elder Barcellos na liutaki ni bisinisi ena Univesiti e São Marcos mai São Paulo. Na nona cakacaka cecere e oka kina na cakacaka ena vica na kabani ena itavi ni volivolitaki kei na makete ka dua na daunibisinisi. A tauyavutaka vakaitokani e vica na bisinisi, oka kina na GreenMile, LLC, ka a vakailesilesi liu tiko kina me vica vata na yabaki.

Se qai mai cava walega oqo na veiqaravi nei Elder Barcellos vakaperesitedi ni kaulotu ena Tabana ni Kaulotu e Potukali Lisbon. Sa veiqaravi oti talega vakadaunivakasala ena mataveiliutaki ni iteki, lewe ni matabose e cake, peresitedi ni Cauravou ni iteki, bisopi, daunivakasala ni matabisopi, iliuliu ni ilawalawa ni bete levu, peresitedi ni kuoramu ni italatala qase, ka qasenivuli ni semineri.