Elder John D. Amos

Ena 2020, a ciqoma o Elder John D. Amos e dua na veikacivi veisau ni bula me peresitedi ni kaulotu ena Tabana ni Kaulotu na Baton Rouge Louisiana. E vuqa na ka ena nona bula a gadrevi kina na veisau ena vuku ni veikacivi, ia erau a ciqoma ena yalololoma o Elder kei Sisita Amos na ilesilesi oqo ena vakabauta.

“Na vakatulewa kei na veivakadeitaki a sa vakayacori oti ena dua na gauna balavu sa oti,” e kaya o Elder Amos. “Ni sa kaci mai na Turaga, eda na sauma ga.”

A sucu o John D. Amos ena 2 ni Noveba, 1961, mai Lafayette, Louisiana, vei rau o John N. Amos Sr. kei Dorothy Victorian Amos. A sotavi Michelle Evette Wright, me watina, ena kalasi erau taura vata ena koliji, ka wasea e dua na koroi cecere ena idinia ni livaliva.

O Michelle, sa lewena oti tu na Lotu, a sureti John kina dua na danisi ni lotu ena imatai ni nodrau veigadivi. Ni oti o ya, sa tekivu vulica e levu tale na ka me baleta na Lotu kei na itakele ni nona itavi na iVakabula ena kosipeli vakalesui mai.

“Na ka kece e baleti Jisu Karisito,” e kaya o koya. “Sa ikoya sa lomadonu ni veika kece ga.”

Erau a vakamau o Elder Amos kei Michelle ena ika 9 ni June, 1990, ena Valetabu e Atlanta Georgia. E lewe 3 na luvedrau ka ono na makubudrau.

Sa rawata o Elder Amos na diqiri ni idinia ni livaliva kei na nukilia. Ena gauna ni nona cakacaka, a veiqaravi ena Mataivalu e Wai ni Amerika, cakacaka ena Siemens Energy Inc., ka veivakavulici ena University e Central Florida.

A veikacivi taumada ena Lotu e oka kina na Vitusagavulu ni iWasewase (iWasewase o North America Southeast), peresitedi ni kaulotu, daunivakasala ena mataveiliutaki ni iteki, bisopi, daunivakasala ni matabisopi, peresitedi ni Matawilivola ni Sigatabu ni tabanalevu, sekeriteri liu ni tabanalevu, iliuliu ni ilawalawa ni bete levu, ka iliuliu ni isususu.