Elder Aaron T. Hall

E nanuma lesu o Elder Aaron T. Hall na gauna erau a vakatikori kina kei na watina, o Kimberly, me rau iliuliu ni kaulotu ena Tabana ni Kaulotu na Texas Houston South. Erau tukuna vei Elder David A. Bednar ena Kuoramu ni iApositolo Le Tinikarua ni rau vakila me rau uabaleti ka marau sara. E vakaraitaka o Elder Bednar na kena gadrevi meda dau vakavinavinaka.

“Na veika a vakavulica vei keirau ena siga o ya e sega vakadua ni yali mai na noqu vakasama me baleta e dua na veikacivi keirau ciqoma, o ya, ‘Keitou sa vakavinavinaka ga,’” e kaya o koya. “Oni vakataroga se na digitaki kemuni vakacava na Turaga, ia keimami vakadinadinataka ni sa digitaki kemuni vakakina. Baleta nida sa tu vakarau ka tu rawarawa, ena cakava o Koya me da rawata.”

A sucu o Aaron Tracy Hall ena ika 4 ni Maji, 1971, mai Provo, Utah, na luvedrau tagane o Alan Eugene Hall kei Paula Jeanne Nowak Hall. A laki kaulotu tudei ena Tabana ni Kaulotu na Chile Osorno ka qai vakamautaki Kimberly Wade Hall ena ika 28 ni Tiseba, 1993, ena Valetabu e Logan Utah. Erau itubutubu ni lewe va na gone.

Ena gauna ni nona kacivi, a veiqaravi voli o Elder Hall vaka-Vitusagavulu ni iWasewase e Utah. Sa veiqaravi talega vakadaunivakasala ena mataveiliutaki ni iteki, lewe ni matabose e cake, sekeriteri liu ni iteki, bisopi, peresitedi ni kuoramu ni italatala qase, ka peresitedi ni Cauravou ena tabanalevu.

A rawata o Elder Hall e dua na koroi ni bejila ni veivoli cecere mai na Weber State University kei na masita ni veiliutaki vakabisinisi mai na University e Utah. A vakailesilesi iliuliu taumada ni kabani ni tekinolaji kei na kabani vakaitaukei raraba, ka walega oqo nona a cakacaka tiko vakadairekita ena Tabacakacaka ni Kaulotu ni Lotu.