Elder Michael Cziesla

E nanuma vinaka tu o Elder Michael Cziesla na dredre ni 2017. Ena dua na Tusiti, ena Janueri, a vakayalia na nona cakacaka ena dua na kabani ni loya ni veiyasai vuravura ena gauna a kacivaka kina na kabani ni sa na sogo. Ena siga ka tarava a luvu na nona vale ena kena ramusu e dua na sala ni wai. Era curuma na nona vale na daubutako ena ikatolu ni siga ena nodra tovolea me ra taura na iyaya talei ni matavuvale. Ena vica ga na siga, sa vakatoboicu na nona bula.

“Au matadredredre ena Sigatabu o ya me vaka na kena ivakarau niu dabe toka ena vatavata niu peresitedi ni iteki,” e kaya o koya. “E sega ni dua e kila na ka e yaco tiko. Ia e lomaqu au sa rarawa sara vakalevu. Au sa tiko ena dua na vanua butobuto sara.”

Ni oti na soqoni, a tarogi koya e dua na turaga dokai ka malua ena tabanalevu se cava e leqa. “A vakarorogo ga, ka mokoti au,” a kaya o Elder Cziesla. “Au vakila ni mokoti au tiko na Turaga, ni kila o Koya na leqa au sotava tiko, ni na donu na veika kece.”

A sucu o Michael Cziesla vei rau o Armin Ludwig kei Irmtraut Hanna mai Neumünster, Jamani, enai ka 26 ni Julai, 1972. A tubu cake mai Schleswig-Holstein ka qai laki veiqaravi e muri ena Tabana ni Kaulotu e Utah Ogden. Na watina, o Margret Anne Rauh, a veiqaravi ena Tabana ni Kaulotu na Temple Square. Rau a vakamau ena Valetabu mai Frankfurt Jamani ena ika 4 ni Epereli, 1997. Ena gauna a kacivi kina, erau a vakaitikotiko vata kei na lima na luvedrau mai Griesheim, Jamani, ka rau dau taleitaka na veilakoyaki ena veikau kei na vakacagicagi ena dua na yanuyanu mai Denmark.

A rawata o Elder Cziesla e dua na diqiri ni lawa mai na University ni Mainz ena 2000. A vakacavara na nona cakacaka vakalawa vaka-itokani qase ni kabani ena McDermott Will & Emery.

Ni bera na nona kacivi me dua na Vitusagavulu ni Vakaitutu Raraba, a veiqaravi tu o Elder Cziesla vaka-Vitusagavulu ni iWasewase ena iWasewase o Europe Central, peresitedi ni kaulotu vakawawa ena Tabana ni Kaulotu na Germany Frankfurt, peresitedi ni iteki, lewe ni matabose e cake, ka daunivakasala ni matabisopi.