Elder Steven C. Barlow

E dua vei ira na veika momona duadua a sotava o Elder Steven C. Barlow vata kei na Yalo Tabu sai koya na “veivakauqeti sega ni cakitaki rawa mai lomalagi ni sa dodonu [vua] me vakamautaki Christina Evans.” Erau vakamau ena Valetabu e Salt Lake ena 1991 ka lima na luvedrau.

Erau veiqaravi vaka-iliuliu ni kaulotu e Ecuador o Elder kei Sisita Barlow mai na 2017 kina 2020, oka kina na itekivu ni mate veitauvi na COVID-19. Ena gauna oya, era sa lesu tale ki vale e vuqa na daukaulotu, ka ra lesi vou tale eso na daukaulotu kina tabana ni kaulotu ni Barlow. Erau vakadinadinataka o Elder kei Sisita Barlow na liga ni Turaga ni dusimaka tiko na sasaga ni kaulotu oqori.

“Keimami sa vakararavi ga vua na Turaga,” a nanuma lesu o koya. “Eso na gauna keimami sega ni kila na cava ena yaco ena siga ka tarava. Keirau tu nanamaki ka tu vakavakarau. Keirau masumasu ga, ka sa vinaka taucoko mai.”

Na veika a sotavi oqo e vaqaqacotaka na lesoni a vakavulici taumada vua ni sa veiliutaki tiko na Turaga ka sa rawa ni da vakararavi tikoga Vua.

A rawata o Elder Barlow e dua na diqiri ni bejila ni vuli ni tiko bulabula mai na Univesiti e Utah ena 1993. Sa cakacaka oti vaka-vakailesilesi ena vakadidike ni itukutuku kei na vakatorocaketaki ni ivakarau ni veiqaravi ni bula. Ena gauna a kacivi kina, a veiqaravi voli o Elder Barlow vaka-Vitusagavulu ni iWasewase o Utah.

A sucu o Steven Chad Barlow mai Bountiful, Utah, ena ika 1 ni Janueri, 1969, vei rau o Jon Kay Barlow kei Becky Christensen Barlow. A “susugi cake mai vei rau na itubutubu qaqa totoka, ka yalodina” ka rau vakavulica vua na kosipeli mai na gauna e se gone kina.