Ena Daku ni Cakacaka: Vakavakadewa kei na Veiqaravi

Ena dua na mua ni macawa ena veivula ono eda na marautaka kina na koniferedi raraba. Ia ena daku ni cakacaka, e udolu vakaudolu na volodia kei ira na tamata cakacaka ni Lotu era cakacaka tiko me vica vata na vula me vakayacori kina.

Era biuta donu na veika kece me kaburaki kina na itukutuku vakaparofita vei ira na milioni e vuravura raraba. Oqo e dua na ivakaraitaki lailai ni cakacaka vakaitamera oqo.

Veiqaravi ni Vakavakadewa

E dua na drau vasagavulu katolu na timi ni vosa e vuravura raraba era na vakadewataka na vosa ni koniferedi raraba ena gauna donu me rawa kina vei ira na lewenilotu mera vakarorogo ena nodra vosa ni vanua. E 57 ga vei ira na timi oqori era vakavakadewa tiko mai na itikotiko liu ni Lotu e Salt Lake City.

Na vakadewa e gusu e duidui mai na vakadewa e volai, e okati kina na veisautaki ni vosa volai ki na dua tale na vosa. Ena vakadewa vosa, e dodonu mera tu vakarau na timi ni vosa mera vakadewataka na veisau kei na vosa e vakayacori ena itutu ni vunau. O ira na dauvakadewa vosa ena vukei ira na lewenilotu e vuravura raraba mera rogoca na kosipeli ena nodra vosa ni vanua (raica na Vunau kei na Veiyalayalati 90:11).

Veiqaravi ni Vulagi

Kevaka o sa tiko oti ena koniferedi raraba mai Salt Lake City, Amerika, o na raica nira dusimaki iko tiko na dauveiqaravi kina nomu idabedabe. E rauta ni 400 na daukaulotu ena Lomanibai ni Valetabu era bole me rauta ni 9,000 na auwa ena gauna ni koniferedi raraba mera vukei ira na vulagi me ra curuma yani vakamalua na Vale ni Koniferedi ka curu lesu mai.

Era na dusimaki ira e 20,000 na vulagi ena veisoqoni yadua ni koniferedi raraba. Ni sa oti e dua na soqoni, era na cakacaka mera kauti ira yani na vulagi ena kena totolo duadua me rawa nira samaka na sala me baleti ira era na tiko ena soqoni e tarava.