Elder Ozani Farias

Na nona dau masulaka na vakatulewa dredre a yaco me yavubula vei Elder Ozani Farias mai na gauna se gone kina. A masu o Elder Farias ni oti na nona sotavi rau na daukaulotu ni se qai yabaki 15. A masulaka me baleta na kaulotu tudei, vuli, vakamau, kei na madigi ni cakacaka.

Ena gauna mada ga e sega ni matata kina na sala, e kila o koya na ka me cakava.

“E dau liu na Kalou,” e kaya o koya. “Qaravi Koya e liu. Keitou sa raica na veivakalougatataki levu ena kena caka oqo.”

Na muri ni veivakauqeti ni Yalo Tabu e sega vakadua ni kauti koya vakatani kei na watina, e kaya o koya. “Au sa vulica na kaukauwa ni ivakatakila kina tamata yadua. Sa dau vosa na Kalou vei ira na Luvena Sa tiko na ituvatuva ni Kalou baleti keda.”

A sucu o Ozani Barboza Marques Farias mai Recife, Brazil, ena ika 19 ni Okotova, 1969, vei rau o José Osanã Farias kei Severina Barbosa Marques. Erau a vauci vata kei watina, o Giovanna de Medeiros Prata Farias, ena Valetabu e São Paulo Brazil ena ika 18 ni Janueri, 1994. E tolu na luvedrau.

A rawata o Elder Farias e dua na diqiri ni bejila ni akaudetaki na ilavo mai na Catholic University e Pernambuco, e dua na imuri ni diqiri ni veika vakailavo mai na University e Pernambuco, kei na dua na masita ni veiliutaki vakabisinisi mai na Getulio Vargas Foundation. Sa cakacaka oti ena Lotu ena veitutu duidui, oka kina vakamanidia ni veika vakailavo, manidia ni ivurevure ni tamata, ka se qai oti toka ga oqo me dairekita ni veika vakayago ena iWasewase o Brazil.

Ena gauna oqo sa veiqaravi tiko o Elder Farias vakaperesitedi ni kaulotu ena Tabana ni Kaulotu na Georgia Atlanta. Sa veiqaravi oti talega vakadaunivakasala ena mataveiliutaki ni iteki, vunivola ni iteki, lewe ni matabose e cake, bisopi, daunivakasala ni matabisopi, ka qasenivuli ni Lalai.