Elder Brian J. Holmes

E kaya o Elder Brian J. Holmes ni o koya kei na watina, o Maggie, erau sa ivakadinadina ni yalayala ni Turaga ena Vunau kei na Veiyalayalati 84:88 ni o Koya e “na liu e matamudou.”

“Oqori na ka sa cakava tu o koya ena neirau bula taucoko,” e kaya o Elder Holmes. “Nida vagolea na noda bula vua na Turaga, ena rawa ni levu cake na ka e rawata mai kina mai na kena eda rawa ni cakava vakataki keda.”

Ena nona itavi vou vaka-Vitusagavulu ni Vakaitutu Raraba, sa nuitaka tiko o Elder Holmes ni na soli vua na madigi me vakadinadinataka na itakele ni itavi nei Jisu Karisito ena ituvatuva nei Tamada Vakalomalagi.

“Sai Koya na iVakabula ka Dauveivueti ni luvena kece sara na Tamada Vakalomalagi,” e kaya o koya.

A sucu o Brian J. Holmes ena ika 5 ni Tiseba, 1977, mai Salt Lake City, Utah, e dua vei iratou na 12 na luvedrau, o Michael H. Holmes kei Marian R. Holmes. Ni se cauravou kina, a laki kaulotu o koya ki Munich, Jamani. Ni oti o ya a vakamautaki Maggie Wilson ena Valetabu e Salt Lake ena ika 29 ni Maji, 1999. O Elder kei Sisita Holmes erau itubutubu ni ono na gone ka ratou a vakaitikotiko mai Queen Creek, Arizona, ena gauna a kacivi kina.

A rawata ruarua o Elder Holmes e dua na diqiri ni bejila ni vakadidike vakapolitiki kei na dua na diqiri ni Dauveituberi ena Lawa, mai na Arizona State University. A cakacaka vaka-ivukevuke ni peresitedi ni Holmes Homes e Arizona, a tauyavutaka na Holmes Law, PLC, ka se qai cakacaka wale tikoga oqo vakadaunivakasala raraba ni Charter One, LLC.

Ni bera ni kacivi me Vakaitutu Raraba ena Vitusagavulu, a veiqaravi voli vaka-Vitusagavulu ni iWasewase ena Ceva kei Amerika o Elder Holmes. Sa veiqaravi oti talega vaka peresitedi ni iteki, lewe ni matabose e cake, kei na bisopi.