Je, Ninaweza Kweli Kuamini Mwongozo wa Nabii?

Na Savanna Cummings

Daima nilikuwa nimechagua kumfuata nabii, lakini ningeweza kumwamini katika tukio hili?

Nilipopata simu kwamba ningehamishwa kutoka kwenye misheni yangu, nilikasirika na kuchanganyikiwa.

Miezi kadhaa kabla nilipaswa kupumzishwa, Urais wa Kwanza uliamua kunituma mimi na wamisionari wengine kadhaa nyumbani kulingana na kile nilichofikiria kuwa ni uvumi tu wa uwezekano wa mzozo wa kimataifa. Hakukuwa na ushahidi wowote kwamba chochote kitatokea.

Sikufikiria kulikuwa na chochote cha kuwa na wasiwasi juu yake.

Kuhoji Mwongozo wa Kiungu

Daima nilikuwa nikitaka kuhudumu misheni na nilikuwa nimefanya kazi kwa bidii sana kutimiza lengo hilo. Pesa zilikuwa haba, lakini nilipata kazi ambayo ilinisaidia kupata kipato cha kutosha kulipia misheni yangu. Nilipofungua wito wangu, ilionekana sawa, na nilijua wito ulitoka kwa Mungu.

Kisha, kwa sababu ya janga la dunia la UVIKO-19, nilipangiwa upya kwenda misheni kule Utah kwa miezi tisa kabla sijafika nje ya nchi kwenye jukumu langu la asili. Nilipata faraja na kufurahi sana hatimaye kuwa mahali ambapo Mungu awali alikuwa ameniita niwe.

Kisha, baada tu ya miezi michache ya kuwa huko, ghafla niling’olewa kutoka kwa watu na nchi ambayo niliipenda. Nilihisi kama kila kitu kilikuwa kimeondolewa kutoka kwangu.

Nilihisi nimesalitiwa. Nilijiuliza kwa dhati kama huu ulikuwa ni uchaguzi wenye mwongozo wa kiungu.

Kwa kushuku, niliruka na ndege kwenda nyumbani Texas. Uhamisho wangu haukuwa na matarajio kwamba baba yangu na ndugu zangu hawakuwa hata uwanja wa ndege kunikaribisha nyumbani.

Baraka ya Usalama

Siku chache tu baada ya kuondoka misheni yangu, nilishtushwa wakati mgogoro hatari ulipozuka karibu na mahali ambapo nilikuwa nikihudumu. Katika wakati huo, nilitambua kwamba kumfuata nabii kuliniweka salama katika njia ya kweli kabisa. Nilijawa na shukrani kwa nabii na mwongozo wake wa kiungu.

Nilitoa ahadi kwangu kwamba daima ningetii kile nabii alichosema, hata kama haikuleta maana kwa wakati huo.

Mzee Ulisses Soares wa Akidi ya Mitume Kumi na Wawili hivi karibuni alisema: “Kuwa na manabii ni ishara ya upendo wa Mungu kwa watoto Wake. Wanafanya ijulikane ahadi na asili ya kweli ya Mungu na Yesu Kristo kwa watu Wao.”

Kwa kweli ninaamini kwamba Rais Russell M. Nelson ni kinywa cha Bwana. Yeye hufanya kazi moja kwa moja na Baba wa Mbinguni na Mwokozi ili kutuongoza kwenye usalama na kutupatia tumaini na mwelekeo wakati wa changamoto.

Baraka za Kumfuata Nabii

Ikiwa bado unajiuliza kama nabii ameitwa na Mungu, ushauri wangu ni kutenda kulingana na mialiko yake. Jaribu kusoma tena hotuba ya Rais Nelson ya hivi karibuni ya mkutano mkuu na kujifunza maandiko anayopendekeza. Fanyia kazi mialiko yake na kujifunza baraka anazoahidi pamoja na mialiko hiyo.

Mzee Soares pia alifundisha, “Kwa kuwafuata [manabii], maisha yetu yana furaha na si magumu, magumu na matatizo yetu ni rahisi kuvumilia, na tunatengeneza silaha za kiroho kutuzunguka.”

Nimeona baraka hizi maishani mwangu nilipofuata ushauri wa nabii. Ninajua kwamba baraka hizi zipo kwa kila mtu anayeweka imani yake kwa Mungu na nabii Wake.