Ļoor Rikanaan eo

Ikōtaan 600 MK, ālkin an Nebuchadnezzar, kiin̄ in Babylon kar ko̧kkure Jerusalem, juon kurup jidikdik jān bwijin Juda raar pād wōt ilo āne eo, ilo an ro jet kar bōk er n̄an rikōm̧akoko n̄an Babylon. Ibwiljin ro raar pād wōt ej Jeremaia rikanaan eo im Johanan, nejin Kareah, juon ritōl in ritariņae.

Ekar juon iien epen im kauwōtata n̄an ro ineen Juda ro raar lo er make ilo ialen tariņae ņae ruo laļ ko rekajoor n̄an tariņaik doon. Armej ro raar ioon juon kāālet epen: ren ke pād wōt ilo Jerusalem, ak, āinwōt an ro jet ba, rej ke aikuj etal n̄an Ijipt im jokwe ie? N̄an pukot tōl, Johanan im armej ro raar ilo̧k n̄an Jeremaia im kajjitōk ippān n̄an kajjitōk ippān Irooj ilo etaer, en ba, “Im Jeova aṃ Anij en kwaḷọk n̄an kōm iaḷ eo kōmin etal ie ḷọk im ta eo kōmin kōṃṃane” (Jeremaia 42).

Jeremaia eaar errā, im ba, “Inaaj jar n̄an Jeova ami Anij ekkar n̄an naan ko ami, im men otemjej Jeova ej uwaak koṃ, Inaaj kwaḷọki ñan koṃ; I ban dāpij jabdewōt jān koṃ.” Armej ro raar kallim̧ur, “Jeova en juon ri kaṃool e tiljek im ṃool ikōtaam eḷan̄n̄e kōmij jab kōṃṃan ekkar n̄an naan otemjej ko Jeova aṃ Anij ej jilkinwōj kōn kōm. Eḷan̄n̄e eṃṃan, ak nana, kōm naaj pokake ainikien Jeova ad Anij.”

Jeremaia eaar pukot tōl jen Irooj, ilo an Johanan im armej ro kar kallim̧ur n̄an pokake jabdewōt ta eo Irooj enaaj kwaļo̧k. Ālkin jon̄oul raan, Jeremaia eaar bōk naan in Irooj. Eaar aiintok armej ro im leļo̧k naan eo: “Āindein Irooj ej ba … Eḷan̄n̄e ilo ṃool koṃnaaj pād wōt ilo āne in, innem Inaaj kalōk im I ban jolaḷḷọk koṃ. … Koṃwin jab mijak Kiin̄ in Babilon, eo koṃij mijak; … Bwe N̄a Ij ippemi bwe In lọmọọren koṃ im kōtḷọk koṃ jān pein. … Koṃwin jab etal n̄an Ijipt.’ Koṃwin lukkuun jeḷā bwe ij kōnnaan ṇae koṃ rainin” (Jeremaia 42–43).

Elmen an armej ro kar uwaak n̄an kapilōk in jān Irooj kōn rikanaan eo An? Ekabūrom̧ōjm̧ōj, ļōmņak ko aer raar oktak. Raar pukot menin kam̧ool ko ijelo̧kin tōl eo em̧ool. Azaraia, Johana, im ritōl ro jet raar kōnanaik Jeremaia kōn riab, im ba, “Kwōj riab, Jeova ad Anij ear jab jilkintok eok im ba, ‘Koṃwin jab etal n̄an Ijipt n̄an jokwe ie.” Kōjekdoon kean̄ eo an Irooj, Johanan, kapin ro, im armej ro raar jab pokake im raar ilo̧k n̄an Ijipt. Āinwōt kar kanaan, raar jorrāān ke Babylon eaar anjo̧ ioon Ijipt ( Jeremaia 43).

Elmen ad mour kaki naan ko an rikanaan ro remour? Irooj eaar ron̄ jar ko an ro bwijin Juda im kar uwaake er kōn jar eo an rikanaan eo An. Rainin, Ej wōnm̧aanļo̧k wōt im kōnono n̄an rikanaan ro remour im ro kar kūr er n̄an tōl. Irooj eaar ba, “Mekarta jān Ainikiō make ak jān ainikien ro rikarejera, ej āinwōt juon” im ekar kallim̧ur bwe “jabdewōt renaaj kōnono n̄e kōm̧akūtkūt er jān Jetōb Kwōjarjar enaaj jeje ekwōjarjar, enaaj ankilaan Irooj, naaj naan eo an Irooj, naaj ainikien Irooj im kajoor eo an Anij n̄an lo̧mo̧o̧r” (Katak im Bujen Ko 1, 68).

Rainin, ekanooj lōn̄ ainikien ko, kajjojo iaer rej kwaļo̧k m̧ool im katak ko aer make. Āinwōt Korior ilo Bok in Mormon, elōn̄ iaan ainikien kein rej kwaļo̧k bwe ejjeļo̧k Kraist, bwe ejjeļo̧k juon emaron̄ jeļā kōn ilju im jekļaj, me jeban tōmake ilo men ko jejjab loi, im bwe aolep armej rej jeraam̧m̧an ekkar n̄an jeļā im anjo̧ ekkar n̄an an kajoor (lale Alma 30). Ļoor ainikien kein renaaj tōlļo̧k kōj n̄an jebwābwe. Ijoke, ro me rekajoor ilo jetōb im rej pokake im̧we ko an Jetōb Kwojarjar reban po. Emaron̄ waļo̧k juon kauwōtata eļap kōn ļōmņak kein, eo me emaron̄ kōm̧m̧an bwe jen pād bajjōk ilo mour in rikaļoor in ad.

Ilo Jepļaaktok eo an Kabun̄ eo an Irooj, jej jeraam̧m̧an n̄an bōk tōl jen juon rikanaan emour, Būreejtōn Russell M. Nelson. Ļōmņak kōn kapilōk eo an eim̧we: kōm̧m̧an bwe Jabōt en juon menin lan̄lōn̄, kōtļo̧k an Anij anjo̧ ilo mour eo am̧, “Ron̄jake E,” ļōmņak kōn selestial, kōm̧m̧an jerbal eo ekwojarjar n̄an bōk revelesōn an juon make, kajoor in Jetōb eo ej Im̧we Jerbal eo, kōjerbal jim̧we in etan Kabun̄ in, ekkatak Bok in Mormon, erom̧ rikōm̧m̧an aenōm̧m̧an, im joļo̧k eļap iien kabun̄jar ilo tampeļ.

Būreejtōn James E. Faust ekar kwaļo̧k, “Kar kallimur kōj bwe Būreejtōn eo an Kabun̄ in enaaj bōk tōl n̄an kōj aolep āinwōt juon ribōk revelesōn n̄an Kabun̄ in. Kōjparok eo ad epād ilo ad eo̧ron̄ ta eo ej ba im ļoor kapilōk eo an.” Kōm̧m̧an bwe jen aolep ļoor rikanaan eo n̄an bōk kōjeraam̧m̧an ko an lan̄.