Jemedwōj Ilan̄ Ekōņaan Kōnono N̄an Eok

N̄an Adam im Iv im aolep ro renaaj ļoore er, juon enjeļ ekar kōmeļeļe, “Kwōn ukeļo̧k im kūr ioon Anij ilo etan Nejin jān kiiō n̄an indeeo” (Moses 5:8).

Jisōs ekar katakin: “Kajjitōk im naaj lewōj n̄an kom̧; kappukot im kom̧ naaj lo; kōļļaļļaļ, im naaj kapeļļo̧k n̄an kom̧” (Matu 7:7). “N̄e kwōj jar, … jar n̄an Jemaṃ … lo ijo ettino” (Matu 6:6). “Ilo wāween in kōn menin kom̧in jar: Jemāmwōj eo ej pād ilan̄, en kwōjarjar Etam̧” (Matu 6:9).

Jisōs ekar jab bōjrak an jar n̄an Jemen. “Ear ilo̧k ilo toļ bwe En jar, im pād aolepen bon̄ ilo jar n̄an Anij” (Luk 6:12). “Im … Ej ilọk n̄an juon toḷ bwe En jar” (Mark 6:46). “Im rej itok ñan ijo jikin etan Getsemane: im E ba ñan ro rū kaḷoran, Koṃwin jijet ijin ilo iien Aō jar” (Mark 14:32). Ilo ioon dōbwāāl eo, Jisōs ekar jar kōn ritariņae ro rekar dōbwāāl E: “Jema, Kwōn joḷọk rueir; bwe re jaje ta eo rej kōṃṃane” (Luk 23:34).

Jeje ko rekwojarjar rej kōkkapilōklōke kōj n̄an “jar iien otemjej” (Luk 21:36; 2 Nipai 32:9; 3 Nipai 18:15; Katak im Bujen Ko 10:5; 19:38; 20:33; 31:12). “Pepe ippān Irooj ilo aolep kōm̧m̧an ko am̧, im Enaaj tōl eok n̄an aenōm̧m̧an” (Alma 37:37). Ilo kakkobaba, jej “wūjlepļo̧k aolep kam̧m̧oolol ko im nebar ko aolepān [ad] ewōr an kajoor n̄an būki” (Mosaia 2:20), kile aolep men ko me Jemed ej kōm̧m̧ani n̄an kōj.

Būreejtōn Russell M. Nelson ekar kōmeļeļeiki: “Lōke eo ad make ilo Jetōb ej ijjino kōn juon kile bwe kajjojo jibbon̄ ej juon mennin letok jān Anij. … E ej kōjparok kōj jān raan n̄an raan im rie kōj jān juon iien n̄an bar juon (lale Mosaia 2:21).”

Nipai ekar ba, “Bwe eļan̄n̄e kar eo̧ron̄ e jetōb eo ej katakin juon armej n̄an jar, kom̧ naaj kar jeļā bwe kom̧ij aikuj jar; bwe jetōb nana ej jab katakin armej n̄an jar, ak ej katakin e bwe e ej jab aikuj jar” (2 Nipai 32:8).

Kōmeļeļe ko jān Kraist ej Kōjerkak Leddik eo Nejin Jairus, jān Greg K. Olsen

Kōn waanjon̄ak eo an Rilo̧mo̧o̧r eo im ko̧o̧njeļ eo an enjeļ ro im rikanaan ro jān epepen ko, jej lukkuun jeļā n̄an jar aolep iien n̄an kwaļo̧k kam̧m̧oolol kōn kōjeraam̧m̧an ko, im n̄an kōm̧m̧ane juon jar ilo būruwōd iien otemjej. Ad eddo n̄an kōnono ippān Jemed.

Ak aaet eaiboojojļo̧k, Jemed ilo Lan̄ ej uwaaki jar ko ad. Juon kajjitōk eļap tokjān ilo mour in laļ in ej, ewi em̧m̧an in ad bōk im meļeļe uwaak ko, tōl, im kaenōm̧m̧an ko rej itok jān Jemed?

Jān elōn̄ļo̧k jān jimjuonn̄oul iiō ko in aō mour, ijeļā bwe Jemedwōj ej kōnono n̄an kōj. Jejjab make iaad. Armej ro ilan̄ rej emmejraake kōj im jipan̄ kōj ilo ad kappukot n̄an ļoore Rilo̧mo̧o̧r eo.

Bōk uwaak n̄an jar ko ad ej ijjino kōn tōmak ilo Jemedwōj Ilan̄ im ilo Nejin, Jisōs Kraist. Jisōs ekar ba “Kwōn jab lōļn̄o̧n̄, kwōn tōmak wōt” (Mark 5:36). Jej lōke E, kōm̧m̧an jon̄an eo em̧m̧antata n̄an kōjparok kien ko, im lale Pein ilo men otemjej. “Ilo ejjeļo̧k men armej ej kainepataik Anij, … ijello̧kin wōt ro rej jab kile Pein ilo men ko otemjeļo̧k, im jab pokake kein ko An” (Katak im Bujen Ko 59:21).

Pein Anij ilo mour ko ad ejjab meļeļe bwe Ej kōm̧m̧an men ko renana ak kabūrom̧ōjm̧ōj ko renana ko rej pād ilo laļ eo ad. Ijoke, ej meļeļe bwe ilo iien ko ad reppen im rekaljekļo̧k, E jutak iturūm̧, kōkajoorļo̧k maron̄ ko am̧, kaenōm̧m̧an eok, im “ukōti en̄taan ko am̧ n̄an am̧ ļapļo̧k” (2 Nipai 2:2).

Ilo an lōn̄ ad tōmak ilo E im kōjparok kien ko An, jej lukkuun ekkatak n̄an em̧m̧anļo̧k ad ron̄jake Ainikien.

Ilo Jeptōm̧ba 1993, iiō eo aō jinointata āinwōt juon Ritōl Eutiej, Būreejtōn James E. Faust (1920–2007), innām juon uwaan Doulul eo an Rijilōk ro Jon̄oulruo ro, kar karuwaineneik kōrā eo pāleeō, Kathy, im n̄a n̄an etal n̄an juon nokon an Brigham Young University ippān. Keememej, 1993 ekar m̧okta jān ajedeed im wōr smartphone ko, social media ko, im intōrnōt.

Ilo kōnono eo an, taitōl eo “Ainikien Jetōb Eo,” Būreejtōn Faust ekar kakkōl: “Ilo epepen eo ami kom̧ naaj ron̄ ainikien kōmetak ko jān elōn̄ ainikien ko rej jiron̄ kom̧ wāween ami mour, wāween ami kam̧ōņōņōik kōņaan ko ami, wāween būki aolepāer. Kom̧ naaj wōr ami lim̧am̧būki jānōļ in alooj tv ilo adiin peimi. Enaaj aolepāer laajrak in software ko, modem in kam̧putōr ko, meleļe ko, im bulletin boot ko; enaaj lōn̄ desktop publishing, kein ebbōk meļeļe im pija ilo jetļait ko, im communication network ko me renaaj kobrak kom̧ kōn meļeļe ko. … Ainikien eo kwoj aikuj in ekkatak n̄an eo̧ron̄e ej ainikien eo an Jetōb.”

Būreejtōn Boyd K. Packer (1924–2015), Būreejtōn eo an Doulul eo an Jon̄oulruo Rijilōk ro, ekar katakin ainikien emera, ainikien eo emera ilo bwebwenato eo an John Burrought, juon naturalist, ilo an kar etetal ippān ro m̧ōttan ilo juon baak eobrak kōn armej. Erkein naan ko an Būreejtōn Packer:

“Ilōn̄ in ainikien ko an mour in bukwōn in [Mr. Burroughs] ekar ron̄ al eo kōn juon bao.

“Ekar bōjrak im ron̄jake! Ro raar pād ippān rej jan̄in kar ron̄. Ekar reito reitak. Ejjeļo̧k bar juon ekar kile.

“Ekar kaenepataiki bwe aolep armej remaron̄ ron̄jake menin eaiboojoj.

“Ekar jibwetok juon jāān jān bōjo̧ eo an im kōro̧o̧lol lōn̄ļo̧k imejatoto. Ekar jok ioon iaļ eo kōn juon ainikien, ekar jab ļap ainikien jān al eo an bao eo. Aolep rekar oktakļo̧k; rekar maron̄ ron̄ ainikien eo!

“Epen n̄an kōjenolo̧ke jān aolep ainikien ko an emmajenjen in wa ilo bukwōn eo ainikien juon bao. Ak komaron̄ ron̄ ainikien. Kwomaron̄ lukkuun ron̄ ainikien eļan̄n̄e kwoj kammineneik eok make n̄an ron̄jake.”

Katak ko an Būreejtōn Packer kōn Jetōb Kwojarjar rekar waļo̧k ilo 1979, juon iien ke mour ekar ļapļo̧k an meļak im ainikien laļ in ekar lur jān in kiiō.

Būreejtōn Nelson ekar katakin, “Eļan̄n̄e eļap am̧ leļo̧k am̧ n̄an meļeļe ko an social media jān am̧ kar aikuj in leļo̧k am̧ n̄an unoojdikdik ko an Jetōb, innām kwoj likūt eok make ilo kauwōtata an jetōb.”

Būreejtōn Faust ekar ba, “Eļan̄n̄e jej eo̧ron̄ ainikien Jetōb, jej barāinwōt aikuj kōppeļļo̧k lo̧jilūd, ukōtļo̧k māj in tōmak ko n̄an ijo ainikien eo ej itok jāne, im reilōn̄ļo̧k n̄an lan̄.”

Ainikien in an Jetōb eo ej itok n̄an jim̧or jeļāļo̧kjeņ eo ad im en̄jake ko ad. “I naaj ba n̄an eok ilo ļōmņak eo am im ilo būruōm̧, jān Jetōb Kwōjarjar, eo enaaj itok ioom̧ im eo enaaj pād ilo būruōm̧” (Katak im Bujen Ko 8:2). Ron̄jake ainikien eo ilo en̄jake eo am̧—revelesōn emakijkij an ijjino ijin.

Jar kōn juon Būruwōn Tōmak

Uwaak ko im im̧we ko jab maron̄ kipeli. Jej jar im jej kōttar kōn juon būruwōn tōmak. Jet uwaak rej jāmin itok ilo mour in, ak n̄an ro rewāppen, Irooj enaaj aolep iien jilkintok aenōm̧m̧an eo An (lale Jon 14:27). Uwaak ko remakijkij aer itok n̄e jej jar n̄an jipan̄ ro ipeļaakid. Ilo iien ko, rej itok “lain ioon lain, kain̄i ioon kain̄i” (Katak im Bujen Ko 98:12).

Ainikien eo jān lan̄ emaron̄ itok n̄an kōj ilo iien ko jejjab kōtmāne im ilo jikin ko jekar jab kōtmāne, ak eļap wōt ad kile iien kein rem̧m̧an ilo jikin ko remeļak im jikin ko rekwojarjar. Ilo ainikien eo elur an jar ko im kejōkļo̧kjeņ ko aō ilo joraanļo̧k in raan eo, ij loe kōjeraam̧m̧an ko ejej uwaer. Juon iien aolep raan, riiti jeje ko aō rekwojarjar, im kōm̧m̧ane wāween in elōn̄ iien ko, ej bōktok ainikien Jetōb eo n̄an būruwōd āinwōt kijek ilo iien ko jet.

Ilo iien kein, im̧we ko rej jejjet itok jān ta eo jej riiti, im ilo iien ko jet, ta eo jej kejōkļo̧kjeņ kake rej bōktok juon uwaak n̄an juon abōņōņō eoktak. Keememej naan ko an Elder Robert D. Hales: “N̄e jej kōņaan kōnono n̄an Anij, jej jar. Im n̄e jej kōņaan bwe En kōnono n̄an kōj, jej etali jeje ko rekwojarjar.”

Ilo an ainikien eo im kareel ko an laļ in em̧akūtkūt ipeļaakid, Irooj ekar tōl rikanaan eo An n̄an kalōk elōn̄ļo̧k im elōn̄ļo̧k tampeļ ko. Ilo m̧wōkein rekwojarjar im̧ōn Irooj, ilo ad likūt apan̄ ko ad inam̧ōj ak deļo̧n̄ļo̧k kōn jar ko ad im abōņōņō ko, jej ekkatak m̧ool ko an indeeo.

Juon iiō em̧ootļo̧k, Būreejtōn Nelson ekar letok n̄an kōj kallim̧ur in ekabwilōn̄lōn̄: “Ro jeiū im jatū rejitenbōro, en̄in ej kallim̧ur eo aō. Ejjeļo̧k juon men enaaj jipan̄ eok eļapļo̧k n̄an jirok likatōttōt ilo aen in dābdep eo eļapļo̧k jān kabun̄jar ilo tampeļ eo aolep iien ilo an jekjek ko am̧ kōtļo̧k. Ejjeļo̧k men enaaj kōjparok eok eļapļo̧k ilo am̧ ioon tarpok ko an laļin. Ejjeļo̧k men enaaj kam̧ōjņo̧ik naan in kam̧ool eo am̧ kōn Irooj Jisōs Kraist im Pinmuur eo An ak jipan̄ eok meļeļe karōk eo eļapļo̧kan Anij Ejjeļo̧k men enaaj kaenōm̧m̧an jetōb eo am̧ eļapļo̧k ilo iien ko reppen. Ejjeļo̧k men enaaj kōpeļļo̧k lan̄ ko eļapļo̧k. Ejjeļo̧k!”

Kajjojo kweilo̧k eo eļap ej bōktok bar kōjeraam̧m̧an ko reļļap. Ilo allōn̄ in ej itok an Eprōļ, bar juon alen, jenaaj ioon doon ilo kweilo̧k eo eļap n̄an ron̄jake ainikien eo an Irooj. Jej itok n̄an kweilo̧k eo eļap kar jar im m̧aanjabpopo. N̄an kōj kajjojo, ewōr ad inepata ko raorōk im kajjitōk ko rem̧ool. Jej itok n̄an bar kōkāāl ad tōmak ilo ad Rilo̧mo̧o̧r, Jisōs Kraist, im kōkajoorļo̧k maron̄ eo ad n̄an jum̧ae kapo im julo̧k kein kōm̧ad ko. Jej itok n̄an katakin jān ijo eutiej. Ij kallim̧uri eok bwe ilo am̧ m̧aanjabpopo im itok kōn jar n̄an m̧wen̄an ko an kweilo̧k eo eļap, kwonaaj en̄jake uwaak ko n̄an abōņōņō ko am̧, im kwonaaj jeļā bwe “pein ilo lan̄” ej pād ioom̧.

Kwon tōmak bwe Jemedwōj Ilan̄ ej kōnono n̄an eok. E ej! Kōtļo̧k bwe tōmak eo am ilo Jemedwōj Ilan̄ im Nejin Jitōn Bōro en jipan̄ eok kōppeļļo̧ke rōn̄ōl eo im bōk ainikien Jemed. Ij kam̧ool bwe E ej pād ijeņ im iakwe eok eļapļo̧k jān an naan maron̄ ba.