“Wāween Kōnono ko Rekwojarjar,” Liaona, M̧aaj. 2025.
Wāween Kōnono ko Rekwojarjar
Anij ej kōnono n̄an kōj ilo wāween ko rāinjuon jān doon. Im elōn̄ men ko jemaron̄ kōm̧m̧ani n̄an lukkuun etale bwe iaļan kenono in en etal wōt.
Kōmeļeļe ko jān David Green
Ilo aō kar jino kōpooj kōnono eo aō n̄an kweilo̧k eo eļap kein kajuon, ikar kile kōn ta eddo in emaron̄ kaitoktoklimo. Rikōnono ro ilo kweilo̧k eo eļap rejjab leļo̧k n̄an er unin kōnono ko, kōn menin ikar aikuj in pukote n̄an n̄a make ta eo Irooj enaaj kōņaan bwe in ba.
Ikar jar im kar kōttar n̄an tōl. Ālkin jet iien, kōrā eo pāleeō, Isabelle, eo emāletlet im lukkuun jeļā kajjeeō, ekar loe an pen n̄an aō jinoe.
“Reitok, kwoj aikuj kar kōm̧m̧ane juon men,” ekar ba. “Jinoe im je juon men!”
En̄iin ta eo ikar kōm̧m̧ane. Ilo jerbal in, ikar jino jiljino ak jijlimjuon kōnono ko. Ilo aō kar ļōmņak kōn elōn̄ wāween ko, ikar jino aenōm̧m̧an kōn juon iaer im kar en̄jake ke ej kōnono eo ij aikuj kōnono kake. Jetōb ekar kaenōm̧m̧an kōļmenļo̧kjeņ eo aō, im ko jet ilo kōnono in ekar pād wōt.
Ilo Oktoba 2023 in kweilo̧k eo eļap, ikar kōnono bwe jej aolep ro nejin Anij. Ej iakwe kōj, ejeļā kar wōn kōj, im E ej ilo tarlep in mour ko ad. Ej ron̄jake kōj n̄e jej jar im ekōņaan kōnono n̄an kōj.
Ekkatak wāween an Anij kōnono n̄an kōj kajjojo ej juon en̄jake an kajjojo n̄an jelā. Ak ewōr jet wāween ko n̄an kapidodoikļo̧k ialan kenono eo Jemedwōj Ilan̄ ekōņaan letok n̄an kōj n̄an kōjeraam̧m̧an mour ko ad.
Jerbal kōn Tōmak im Lōke
Kile n̄e Anij ej kōnono ej aikuji tōmak im lōke. Tōmak ej aolep iien kar an̄kō ilo Jisōs Kraist. Jej barāinwōt aikuj in lōke E. E ear ba:
“Lo, I naaj ba n̄an eok ilo ļōmņak eo am im ilo būruōm̧, jān Jetōb Kwōjarjar, eo enaaj itok ioom̧ im eo enaaj pād ilo būruōm̧.
“Kiiō, lo, en̄in ej jetōb in revelesōn” (Katak im Bujen Ko 8:2–3).
Ak revelesōn im ialan tōl eo ekwojarjar rejjab itok jān kōttar wōt n̄an juon kōkaļļe in en̄jake an jetōb. Jej aikuj em̧m̧akūt. Āinwōt an kōrā eo pāleeō ba in kōm̧m̧ane kōn bwebwenato in kōnono eo aō ilo kweilo̧k eo eļap, kōj jet iien jej aikuj in “jino jerbale.”
Ke Isabelle im n̄a kar jerbal āinwōt ritōl in mijen ilo France Lyon Mission, ikar aikuj in loloorjake ia eo kajjojo mijenede ej aikuj etal n̄ane ilo tōreen mijen eo im n̄āāt n̄an kōm̧m̧ane jerbal ijitōn̄ eo. Ikar loe bwe Jetōb enaaj kar tōl eō eļan̄n̄e inaaj jar kōn jipan̄ innām kōjerbale kāāle eo aō ejim̧we tata. Kūrm̧ool enaaj kiiō itok eļan̄n̄e aolep men naaj kar pād ilo jikier.
Ilo kūr eo aō kiiō, kar jilkinlo̧k eō n̄an stake ko kajjojo iaan Kabun̄ in n̄an ukōt kobban stake būreejtōnji ko. Ilo aō im eo m̧ōtta intōrpiuki kajjojo armej, ekar wōr ļōmņak ko ippām, en̄jake ko, im kōļmeļo̧kjen ko reitok n̄an kōm̧. Innām kōm̧ kar bōk kōkapilōklōk im jar ippān doon. Ilo m̧ool, revelesōn ej itok, im Irooj ej kam̧ool n̄an kōj wōn ro Ekar kūri n̄an jerbal.
Ej juon jerbal n̄an kūle bwe n̄e Anij ej kōnono im n̄an loe Ankilaan. Kōm̧ij aikuj in kwaļo̧k bwe kōm̧ naaj maron̄ in em̧m̧akūt kōn tōmak im lōke.
Ļoor Rikanaan eo
Wāween eo eaorōk Anij ej kōnno n̄an ro Nejin ej jān rikanaan ro. Wōr juon rikanaan ippād ioon laļ in rainin ej juon enaan eļap an em̧m̧an! Ej bōk revelesōn jān Anij n̄an tōl im jiniet e Kabun̄ eo (lale Amos 3:7). Jemaron̄ barāinwōt bōk tōl im kōjparok n̄an ļoor katak ko an. Menin ejjab aolep iien pidodo, ak Irooj eaar tōl kōj n̄an ļoore rikanaan eo “ilo aolep kijenmej im tōmak” (Katak im Bujen Ko 21:5).
“Baam̧le eo: Juon Naan in Kean̄ n̄an Laļ in,” n̄an waanjon̄ak, eaar kam̧oole naan in kanaan in ālkin kar kwaļo̧k kadkadin 30 iiō ko rem̧ootļo̧k. Ej uwaaki elōn̄ ļōmņak ko jaar jaje jen kar jeļā im letok tōl ko jejjab lukkuun jeļā jen kar aikuji—bōtaab kiiō jejeļā. Jerbal in tōl eo an rikanaan eo emaron̄ jab aolep iien ta eo jej kōņaan ron̄. Emaron̄ jab jokkin wōt juon ippān aorōk eo an mour in kiiō. Mekarta, jenaaj kar tōl im pād ilo kōjparok eļan̄n̄e jenaaj ļoor rikanaan eo.
Kajjitōk Kajjitōk ko im Pukot Uwaak ko
Ilo raan ko m̧oktaļo̧k an Jepļaaktok in, Anij emakijkij an kōnono ilo uwaak n̄an kajjitōk ko rem̧ool an Rikanaan Josep Smith im ippān ro jet. Ke Josep im Oliver Cowdery raar jerbale ukook eo an Bok in Mormon, raar tōpar ijo Rilo̧mo̧o̧r ej kwaļo̧k kōn katak eo kōn peptaij (lale 3 Nipai 11:23–33). Rekar kōņaan jeļā eļapļo̧k im kar etal n̄an būļōn wōjke ko im jar. Ejjab etto, Jon Ripeptaij eaar waļo̧k im kōjepļaaktok mālim eo n̄an peptaij kōn tuļo̧k n̄an bōk jeorļo̧k in jerawiwi ko.
Juon bar iien, kōrā eo pāleen Josep, Emma, ekar kwaļo̧k an inepata kōn kopej eo epād jān paip in jikka im tōbako ko rej mei ilo iien kweilo̧k ko. Josep eaar bōk menin n̄an Irooj im kar bōk juon revelesōn—“juon Naan in Mālōtlōt” (Katak im Bujen Ko 89:1)—kōn imminene ko rājmour n̄an jeraam̧m̧an eo an ānbwin im jetōb an ro nejin Anij.
Wāween kein—im ko jet rellōn̄—rōkakeememej kōj ke EM̧M̧AN n̄an kōm̧m̧an kajjitōk ko raettok to̧o̧n wōt ad pukot uwaak ko ilo ial eo ejim̧we. Eļan̄n̄e jej bōk kajjitōk ko n̄an Irooj, jenaaj loi uwaak ko. Jet iien uwaak ko renaaj itok ilo juon wōt tiroro. Āinwōt iien otemjej, ijoke, uwaak ko rej itok “ļain im bar ļain, kain̄i im bar kain̄i, ijin jidik im ijjuweo jidik” (2 Nipai 28:30). Jemaron̄ kar kōttar an uwaak ko jipan̄ kōj katak im eddōkļo̧k, bōtaab Anij enaaj uwaake kōj ekkar n̄an Ankilaan, ial, im iien.
Keememej Katak ko kar būki Moktaļo̧k
Eļan̄n̄e jej aikuj kōttar an Anij kōnono n̄an kōj, eaorōk bwe jen dāpdeb wōt n̄an ta eo jejeļā im katak ko jaar būki ippād. Jemaron̄ luuji barāinwōt. Jejjab kōņaan pere ta ko jaar ekatak m̧oktaļo̧k kōn Jetōb kōn menin jemaron̄ apan̄ kiiō. Ilo iien rot kein, jej aikuj ro̧o̧l likļo̧k ilo kōļmenļo̧kjeņ ko ad im keememej ewi wāween ad kar en̄jake tōre eo jaar en̄jake ad epaake Anij.
Juon tōre Alma eaar kajjitōk n̄an etale kajjitōk kein n̄an armej ro ilo Zarahemla:
“Kom̧ nan̄in ke ilo jetōb kar ļotak jān Anij? Kom̧ ar bōk ke nememen ilo paotok ko ami? Kom̧ ar bōk ke oktak in ekajoor ilo būruōmi? …
“Im kiiō lo, ij ba n̄an kom̧, … eļan̄n̄e kom̧ ar imminene kōn juon oktak in bōro, im eļan̄n̄e kom̧ ar en̄jake n̄an al, al in iakwe em̧ool in pinmuur, ikōņaan kajjitōk, kom̧ maron̄ ke en̄jake kiiō?” (Alma 5:14, 26).
Jej aikuj lukkuun lale jej keememej jeļā ko ad kōn jetōb im jab iuniļo̧k iturājet. Jej aikuj aolep iien kajjitōk ippād make, “Imaron̄ ke en̄jake emman kiiō?” Menin ej kōkajoorļo̧k kōj ilo iien ko elan̄e Anij ejab uwaak. Jej barāinwōt maron̄ em̧m̧anļo̧k ad kūle iien ko elan̄n̄e Ej kōnono n̄an kōj.
Pād im Ekkeijōlļo̧k Wōt
Bwebwenato ippān Jemedwōj Ilan̄ ilo juon men emour. Jej kōm̧m̧ane ijo koņaad n̄an ad dāpiji ilo lale iien otemjej n̄an ejake iien ko rōm̧m̧an kōn kōnono eo ekwojarjar. Aolep iien emaron̄ emakijkij ad jar n̄an Anij kōn aenōm̧m̧an, ineem̧m̧an, im tōl. Jemaron̄ katak naan ko An ilo jeje ko rekwojarjar im en̄jake kajoor an Jetōb eo. Jemaron̄ barāinwōt ļoor naan in kanaan in tōl eo.
Ilo ad pād im kar ekkeijōlļo̧k ippān Jemedwoj Ilan̄ eo ej iakwe, jemaron̄ āinwōt kein jerbal ko ilo pā ko Pein n̄an rejetak E ilo jerbal in An eaiboojoj. Jān leļo̧k n̄an ad kajjieon̄ meļeļe im kakeemejmej ko jej bōki, jemaron̄ jipan̄ ro jet en̄jake bwe Anij ejeļā im iakwe er im kōnaan kōnono n̄an er.
Naan in jiron̄ eo em̧ool eo Anij ej ron̄jake im kōnono n̄an ajri ro Nejin ej juon jon̄ak in kōjeraam̧m̧an eo em̧m̧an. Emakijkij in kōnono ko rekwojarjar Ippān rej letok tōl eo jej aikuji n̄an etal ilo iaļen mour in.