Wōn eo Ekar Teen̄i Jikin Kōpeptaij eo?

Kōmeļeļe jān David Miles

Ālkin am kar rum̧wiji juon baj ilo Nairobi, Kenya, kōm̧pānien eo aō im n̄a kar pepe n̄an jaketo-jaketak naan in gospel eo ippān aolep armej kōm̧ij loe ilo am kōttar n̄an bar juon baj n̄an erai eo am̧ro. Kōm̧ ar kōnono n̄an elapļo̧k jān 400 armej.

Juon iaer eaar Benard, eo eaar jerbal ilo jerbal in ekkāl epaak. Kōm̧ kar leļo̧k n̄an e juon Bok in Mormon im melijjon̄ e ippān n̄an riiti im kajjitōk ippān Anij eļan̄n̄e em̧ool.

Emān allōn̄ tokālik, ikar em̧m̧akūt ļo̧k n̄an Nairobi. Ilo kweilo̧k in kwojkwoj eo aō kein kajuon ijeņ, ikar loe Benard. Ekar m̧ōj an peptaij im ekkapit n̄an Priesthood eo an Aron

Benard ekar m̧ōņōņō in karuwainenei kōm̧ n̄an m̧weeo im̧ōn n̄an katakin kōrā eo pālee, Megan. Ke kōm̧ij ioon Megan, kōm̧ kar ilbōk kōn an ļap an tōmak. Ke ekar jar n̄an jeļā eļan̄n̄e ennaan eo am ekar m̧ool, Anij ekar uwaake jar eo an.

Kōm̧ kar karuwaineneik Megan n̄an peptaij Jabōt eo juon. Ilo wiik eo, kōn menin, bukwōn eo ilo Nairobi ekar kōjjeļļā bwe enaaj ejjeļo̧k dān ium̧win 10 raan! Ālkin an Megan kar intōrpiu n̄an peptaij ilo Jādede eo, eo m̧ōtta im n̄a kar jar bwe peptaij eo an enaaj maron̄ to̧rto̧r m̧aanļo̧k n̄an raan eo juon.

Kōm̧ kar jitlo̧k, bōk kōkapilōklōk jān ritōl ro am, im kajjieon̄ elōn̄ wāween ko roktak n̄an ebbōk dān—ekar ejjeļo̧k an aolep. Jekdo̧o̧n ak joteen eo kōm kar kepooj peptaij eo. Innām kōm̧ kar bukwelōlō im bar jar. Kōm̧ kar en̄jake im̧we n̄an kōļaake jabōn juon hose n̄an po̧jet eo ilo jikin m̧ōn̄ā eo ilo im̧ōnjar eo ejjeļo̧k dān ie im likūt jabōn eo juon ilowaan jikin kōpeptaij eo. Kōm̧ kar bar jar, ļake aolep jikin, im ro̧o̧l n̄an m̧weeo im̧ōm̧.

Jibbon̄ eo juon ke kōm̧ kar etal n̄an m̧ōnjar eo, kōn bwilōn̄ eo am jikin peptaij eo ekar obrak kōn dān! Kōm̧ kar etale po̧jet eo ilo jikin m̧ōn̄ā eo, ak ekar ejjeļo̧k dān ekar to̧o̧r tok jāne. Ejjeļo̧k juon armej jān branch eo ekar wōr an jeļā ewi wāween an jikin peptaij eo kar etteen̄.

Megan ekar peptaij raan eo. Aolep ward eo rekar itok n̄an kam̧oole peptaij eo an im karuwaineneiki n̄an Kabun̄ in. Po̧jet eo ekar mōrā wōt, ak aolepān mejān armej ro rekar kōm̧jaļaaļ kōn kam̧m̧oolol.

Būreejtōn Russell M. Nelson ekar katakin, “Irooj enaaj kōjeraam̧m̧an eok kōn kabwilōn̄lōn̄ ko eļan̄n̄e kom̧ij tōmak ilo E, ‘ejjeļo̧k pere’ [Mormon 9:21]. Kōm̧m̧ane jerbal eo an jetōb n̄an kappukot kabwilōn̄lōn̄ ko.” Ijeļā bwe kōnke kōm̧pānien eo aō im n̄a kar kōm̧m̧ane jerbal ilo ānbwin im jetōb—jar, kajjieon̄ kālet ko roktak, im ļoore im̧we ko an jetōb—kōm̧ ar loe juon kabwilōn̄lōn̄ jān Irooj.