Ewi Wāween An Bujen Ko Ad Jipan̄ Kōj Epaakeļo̧k Kajoor Eo An Anij?

Pija jān Connor Johnson

Kōj kajjojo ewōr ad iien em̧m̧an n̄an kōm̧m̧ani bujen ko rekwojarjar ippān Anij eo ej make wōt in lan̄. Jej kōm̧m̧ani bujen kein ilo ad bōk koņaad ilo kien ko an priesthood. Ilo ad kōjparok bujen kein, Ej kōjeraam̧m̧an kōj kōn kajoor eo An.

Eememej ilo n̄a tōl in kanaan eo an Būreejtōn Russell M. Nelson jelōt wāween n̄an mālim in deļo̧n̄ kajoor jān Anij: “Aolep em̧m̧aan im aolep kōrā ro im rej bōk koņaer ilo kain̄i ko an priesthood im ro rej kōm̧m̧ane im kōjparoke bujen ko ippān Anij ewōr jim̧we n̄an kajju deļo̧n̄e kajoor eo an Anij.” Menin jim̧we n̄an kajju deļo̧n̄e kajoor eo an Anij ej juon menin letok Ej kwaļo̧k n̄an ro Nejin.

Ta kajoor in, ej waļo̧k itok wōt jen pokake bujen ko jej kōm̧m̧ani kōn kain̄i ko an priesthood, ej ke āinwōt mour kake jen raan n̄an raan? Ewi wāween an juon kōrā in bujen kepaakļo̧k kajoor in ekwojarjar?

Ij kōjatdikdik juon aō make waanjon̄ak enaaj jipan̄ eok ilo am̧ kōm̧m̧ane jerbal in bar kōkāāl jetōb n̄an katakin eok make ta meļeļein eo n̄an bōk menin letok kwojarjar eo ekajoor an Anij.

Juon raan ikar bōk juon text message jān leddik eo ippān ļaddik eo nejū Amy: “Jar kōn Dottie.”

Leddik eo jibū Dottie ej jan̄in kiki jen bon̄ōn̄ eo juon. Amy ekar emej aolepen bon̄on eo ippān im eaar ba ke Dottie eaar piba. Amy ekar leļo̧k n̄an e jet uno, ak Dottie eļakkar bwiļ im jaje kiki. Im ļaddik eo nejū Connor ekar etetal etto̧ļo̧k jen jerbal im jab kar jikejuuļ in ro̧o̧ltok n̄an m̧weeo m̧ae bar ruo raan.

Jibbon̄in raan eo juon, Amy ekar loe an būļū tien Dottie. Pein rekar āinwōt bar būļū im m̧ōļo n̄an jibwi. Amy ekar m̧ōkaj an wōr an en̄jake, “Bōk Dottie n̄an jikin taktō eo an ajri.” Ekar aikuji naan in rōjan̄ eo, ekar kūrļo̧k opiij eo an jikin taktō an ajri, im kar bōklōkōt in aer naaj kadeļo̧n̄e Dottie.

Ilo m̧ool, opiij in jikin taktō eo an ajri ej pād ikjeen iaļ eo jān m̧weo im̧ōn jinō. Amy ekar en̄jake kar em̧m̧akūt n̄an kattōrļo̧k iturin m̧weo im̧ōn jinō. Jinō ear jerbal ilo yard eo an im kar m̧ōņōņō in bōk leddik eo emān an iiō jein Dottie, Goldie, ilo an Amy bōkļo̧k Dottie n̄an taktō eo an ajri. Eaar juon uwaak n̄an inepata eo an Amy bwe en aikuj in etale Goldie im n̄an pād ippān Dottie ilo juon wōt iien.

Taktō eo an ajri Pediatrician eaar lo ke Dottie ewōr an nimonia, itok wōt jen an kar tutu jejjo̧ raan m̧oktaļo̧k. Dottie ekar kōm̧adm̧ōdin idin̄ kōn antibiotics im joļo̧k aolepen raan eo ilo ioon pein jinen, kar kotake bwe en peļļo̧k baib in menono im kabidodoik an menono.

Iaar ba ke inaaj bōk jet m̧ōn̄ā in kōjeto ilo iaļ eo aō ļo̧k n̄an m̧weeo. Im Amy ekar kōtļo̧k aō kōm̧m̧ane, eo me ikar lukkuun kam̧m̧oolol kake. Ikar bwilōn̄ ewi wāween an Amy kar eļļā ālkin juon bon̄ ekar jab kiki, m̧ōk eo an ippān juon nin̄nin̄ eo enan̄inmej, im aikuj eo n̄an pād ippān Goldie.

Ikar etetal ilowaan m̧weo im̧weer ippān pakij in take-out m̧ōn̄ā ko im kar lo Amy im leddik ro raenōm̧m̧an. Ekar wōr juon jon̄ak em̧m̧an ilo Amy kōn meram ilo paoktokin. Eaar aenōm̧m̧an, ilo an bar jelm̧ae juon bon̄ makeļo̧k iaan kōn Dottie eo enan̄inmej. Eaar jab mijak. Eaar lōke. Ekar juon aenōm̧m̧an me ejum̧ae meļeļe. Ikar kōņaan wōt jijet ilo iien eo im jojoki ilowaan.

Amy eaar kajjieon̄ n̄an kōjparok bujen ko an ippān Anij im eaar jeraam̧m̧an jān kajoor in kōkajoor eo An. Jetōb eo ekar im̧we e n̄an m̧akūtkūt ekar kōm̧m̧ane n̄an kōjparok Dottie. Im kajoor eo an Irooj ekar kōkajoorļo̧k maron̄ eo an n̄an kwaļo̧k aikuj eo an baam̧le eo an ilo kijenmej im iakwe im kōn ainem̧m̧an in tōmak ke men otemjej renaaj em̧m̧an.

En̄in ej kōjeraam̧m̧an in kajoor eo an Anij, rej peļļo̧k n̄an kōj kōn kar kōjeram̧m̧an in bujen im kōn wōt en̄taan in pinmuur eo an Rilo̧mo̧o̧r. Kajoor in ej ukōt kōj, kōkajoorļo̧k kōj, kaenōm̧m̧an kōj, letok n̄an kōj lōke, bōktok n̄an kōj aenōm̧m̧an, im kōlapļo̧k maron̄ eo ad n̄an kakūrm̧ool eddo ko ad rekwojarjar kar litok āinwōt kōrā ro.