“Ebwe Ke Aō Em̧m̧an?,” Liaona, M̧aaj 2025.
Pija ko kōn Tōmak
Ebwe Ke Aō Em̧m̧an?
Ikar ļōmņak inaaj kar loe tōmak, iakwe, im m̧ool ilo jetōb jān mour in ākeleel. Ikar jab. Ikar lo er ilo Kabun̄ eo an Jisōs Kraist im Armej ro Rekwojarjar im ilo tampeļ eo.
Pija jān Leslie Nilsson
Ke ikar juon jodikdik ilo 1960 eo, Pata eo ilo Vietnam eaar lap jorrān. John F. Kennedy em̧ōj kar ankōmejuri im mej, āinwōt kar bar Martin Luther King Jr. im Robert Kennedy. Ikar jum̧ae jinō im jema im aolep laajrak in mour ko im ta ko raar kōm̧m̧an ilo raan eo. Ikar jab kōņaan m̧are ak kwaļo̧k ajri ņai ioon laļ in me elap nana ie, etao, im ialan kōm̧m̧an jorrān.
Ekar wōtlo̧k eta jān high school kūlaaj jon̄ouljuon eo aō, kar em̧m̧akūt n̄an Haight Ashbury District ilo San Francisco, California, USA, im kar mour einwōt mour in hippie jān 1969 n̄an 1972. Ikar pād ilo doulul in rilale armej im jeļā ņae doon, bōk jabdewōt jerbal imaron̄ tōpare, im kautiej juon ļōmņak im wāween mour in ikkure bajjōk, ekoba kōjerbal uno ko rekajoor.
Ke Randy ekar juon jodikdik, eaar ļōmņak mour eo an ejjeļo̧k an ilju eo elem̧ōņōņō. “Ikar jum̧ae jinō im jema im aolep laajrak in mour ko im ta ko raar kōm̧m̧an an raan eo,” ej ba.
Ilo ejja iien in wōt, ikar pukōt tōmak, iakwe, im m̧ool in jetōb. Ikar kam̧ulaļļo̧k kejōkļo̧kjeņ eo aō im ekkatak kabun̄ ko roktak jān doon, bōk jān er jabdewōt men eo emaron̄ dāil eō āinwōt m̧ool eo ak men eaorōk. Aolepān aō pukōt uwak eo, ijoke, ekar jem̧ļo̧k kōn menin jum̧ae. Ļaddik eo jeiū, John, ejeļā kōn ta eo ij etale, eaar jilkintok juon Bok in Mormon.
“Kwoj aikuj in riiti menin,” John eaar je, eo ear kobatok ilo Kabun̄ eo m̧oktaļo̧k.
Tōre eo kar joļo̧k eō jān jerbal kōn riiti Bok in Mormon eo ilo jikin jerbal eo aō ilo gas station eo, ikar ļōmņak, “Menin ejjab em̧m̧an.” Ikar kadkad kōn bok eo.
Ejjab etto tokālik, John ekar ba tok ej itok n̄an San Francisco Bay Area ippān juon kūrup in al jān Brigham Young University.
“Im̧ōņōņō in lo eok,” ear ba, kōtmene n̄e kōm̧ro maron̄ ioon doon ilo California Oakland Temple.
Ettōrto ettrtak ilo wa ipeļaakin Bay Area ilo bon̄, inej aikuj ikutkut aō loe tampeļ eo. Ekar owar n̄an n̄a ilo jetōb, kōn menin ikar riit kake im kōņaan in deļo̧n̄e lowaan. John im n̄a kar ioon doon jibbon̄ tata juon jibbon̄ ioon meļaaj in tampeļ eo. Ālkin am lo̧ļo̧k, ear ba ej kiiō awa n̄an kurup eo an n̄an deļo̧n̄e tampeļ eo.
“Randy, koban maron̄ in deļo̧n̄e tampeļ eo,” John ekar jiron̄ eō.
“Ijeļā, n̄aij juon hippie,” ikar uwaak, “ak ikar katak kabun̄ ko Iturear, ij juon vegetarian, ikar pād ilo droulul in rilale armij im jeļā ņae doon ijo im kemij jaketo-jaketak aolepmen, im ewōr ippa $20. Emaron̄ jete wōņāān deļo̧n̄e ņe?
“Eļapļo̧k jān jon̄an ņe,” John eaar uwaak. “Ejjab bwe jon̄an am̧ em̧m̧an.”
Ilo iien eo, ikar kile n̄a make loļātāt, kijenmej, im ejetōbtōb rōļe im̧aan. Ekōjkan aō maron̄ jab bwe aō em̧m̧an?
Obrak kōn Kōjatdikdik
Ium̧win jet iiō ko, jinō im jema rekar jab jeļā ia ipād ie. Rekar armej ro rem̧m̧an ro rekar kajjieon̄ letok n̄an eō jeļāļo̧kjeņ eo em̧m̧antata remaron̄e im rar kanooj jab meļeļe ilo kāālet ko aō. Ke jema ekar jino nan̄inmej, jinō ekar kareel eō bwe n̄an ro̧o̧l n̄an m̧weo ilo Washington, D.C. Ke ikar itaakļo̧k, John eaar loe juon aō jerbal ippān juon kumi rej kalōke Washington D.C Temple eo.
Ikar jab jeļā, ak ekar karōke tok n̄an n̄a bwe n̄an jerbal ippān juon kumi in mijenede ro rekar ro̧o̧l jān mijen ko aer. Ekar ļo̧kjenaō bwe John Howell, lead foreman eo, maron̄ kajjitōk juon iaan membōr in kumi eo n̄an jar ilo jinoin kajjojo raan in jerbal—juon men ij jan̄in kar loe ippān kumi ko ikar jerbal ippāer m̧oktaļo̧k.
Juon raan ilo jikin jerbal, jejjo iaam̧ kar kōļaake juon iaan kōjem̧ in tampeļ eo eddo im̧aan kōjem ko ilo tōre eo ej wōtlo̧k im kar jibede addi in peiū māni in wot jo̧n̄aoul jāān. John ekar ekkairir tok, lale addiin peiū, kajjitōk jidik oil in kōjeraam̧m̧an, im kar letok n̄an eō juon kōjeraam̧m̧an. Addiin peiū ear m̧ōkaj an mo jon̄an ikar jab aikuj etal im loļo̧k juon taktō.
Ilo bar juon iien, kar letok juon mejān rāja im ba in kūrijiļo̧k m̧ōttan meno̧kno̧k ko jān ioon jimāān eo.
“Etke?” Ikar kajjitōk ippān juon iaan uwaan kumi eo. “Rjjab naaj illūk carpet ilaļ?”
“Randy, kwojjab jeļā m̧ōn wōn in, kwoj ke?” ekar uwaak. “Jej kōm̧anm̧ane n̄an Eo Ewāppen.”
Laļ in ekar libobo ilo kōraat, kitōtō, dike, im mijak, bōtaab waanjon̄ak eo im katak ko an likao rein reddik ikar jerbaļ ipper rar kobrak eō kōn kōjatdikdik. Āinwōt iaan kumi eo tiļmaake tōmak ko aer n̄an n̄a, ikar jeļā ke rekar jim̧we im m̧ool. Rekar joļo̧k ruo iiō in mour ko aer n̄an jerbal n̄an ro jet, im rekar kijejeto kōn lo̧ļātāt. Ikar kōņaan katak ko aer bwe ren m̧ool. Ikar en̄jake aō bōk tarlep in meļeļe eo ikar pukote im bwe Irooj ekar kōpooje eō ilo jetōb.
John Howell ekar kōm̧m̧an pepe bwe in kweļo̧k ippān mijenede ro rej jerbal aolep raan. Ijjelo̧kin, iaar kāālet bwe ļaddik eo jatū im juon iaan ro m̧ōttan, bar juon mijenede eo ej kab ro̧o̧ltok, ren katakin eō. Ilo aer kar katakin eō, ikar kōņaan kam̧ool ko itulik, ko ejjjab menin kōjejtokjān ta ko ikar katak rōkar m̧ool. Ijjeļo̧kin menin kam̧ooli eo, ikar jab kōņaan elōn̄ļo̧k kōmmeļeļe ko.
Ke iaar kajjitōk eļmen aer jeļā m̧ool eo, rekar uwaak, “Kōm̧ kar riit im jar im kar im en̄jake juon kam̧ool jān Jetōb Kwojarjar eo.” Rekar jiron̄ eō bwe ij aikuji ejjeļo̧k oktak jān kein kam̧ool eo aō.
Bon̄ōn eo ikar etal n̄an iturin in wōjke ko turin melan eo aō. Ijjab jeļā ewi aetokan aō kar jar, ak ikar kōm̧m̧ane kōn aolepān aō ļo̧mņak. Ikar āliji aō kajjitōkin Anij ejja kajitōk ko emān: “Bok in Mormon ej ke naan an Anij? Kwe im Ļaddik eo Nejūm̧ kar ke waļo̧kļo̧k n̄an Josep Smith? Ej ke Kabun̄ eo em̧ool in an Jisōs Kraist? Ebwe ke aō em̧m̧an n̄an erom̧ juon membōr?
Uwaak eo n̄an kajjojo kajjitōk rekar itok ilo juon unoojdikdik n̄an aō jetōb—“Aaet”—emān kattōn. Unoojdikdik kein rekar boktok lur im en̄jake ko rōwejepdik.
Ilo an bōrā jillo̧k, bukwelōlō ilo jar im m̧oujlep kōn kōm̧jaļaal, ikar lam̧ōj ilo jan̄: “Eļan̄n̄e uwaak eo in Kwonaaj letok n̄an eō, innām ij bōke im inaaj kallim̧ur kōn aolepān mour eo aō n̄an Kwe im gospel in ilo Am kwaļo̧k tok n̄an n̄a.” Naan ko rejabwe kōmeļeļeik ļōmņak ko, en̄jake ko, im m̧ool ko me rekar kalipopoik eō.
Kam̧ool eo ikar bōke bon̄ōn eo jeban kabwijōr n̄an ukōte, im ej kajoor kiiō āinwōt ilo kar jinoun. Jān iien jar eo, Anij eaar kein kam̧ool n̄an uwaak ko n̄an n̄a ilo taujin ko kōn kabwilōn̄lōn̄ im ialan pedped in m̧ool ko.
“Kabun̄ in ej juon kōkaļļe,” Randy ej ba, eaar pija ijin juon allōn̄ ālkin peptaij eo an. “Im mour eo aō ilo Kabun̄ in ear lukkun em̧m̧an.”
Juon Kijeek Eurur Ilowaaō
Kiiō ālkin aō kar peptaij ilo 1974, ikar pād ilo kweilo̧k eo eļap kein kajuon ilo Salt Lake City ippān būratōr eo aō, John. Ikar ilbōk ke Elder Boyd K. Packer (1924–2015) jān Doulul eo an Jon̄oulruo Rijilōk ro, eo eaar jelm̧ae aunt eo aō ilo New York city jilu wiik ko m̧okta jān kweilo̧k eo eļap, kōnono kōn John im n̄an ilo iien kōnono eo an ilo jibbon̄in Jabōt eo.
Bar āliji naan eo an jinō, Elder Packer eaar ba: “Ruo iaan ļaddik ro man̄da rekar kobawaj ilo Kabun̄ eo am̧. Ekar pen aō tōmak oktak eo ekar kōm̧m̧an ilo mour ko aer.”
Kōnke kōn wōt oktak eo eaorōk (lale Alma 5:14), juon kijeek eurur Ilowaaō me ikar kōņaan tilmaake. Kiiō wōt, ikar lo eō make ilo Idaho āinwōt juon mijenede ej jerbal aolep raan. Lukōnļo̧k mijen eo aō, jema, eo ekar juon eo ebun̄bun̄ ilo peran im m̧ōtta eo epaak eō, ear ilo̧k jān mour in. Jinō ear kūrļo̧k mijen būreejtōn eo aō im kar kajjitōk n̄e in ro̧o̧l n̄an ijo jikū n̄an tilmaake naan in kautiej ilo nōbar eo emootļo̧k. Tōre eo mijen būreejtōn eo aō likūt kālet eo bwe en aō men̄e n̄an em̧m̧akūt, iaar ba n̄an e ikar kōņaan jar im jitlo̧k iumin 24 awa ko m̧okta jān pepe.
Bon̄ōn eo ear wōr juon aō ettōņak. Jema ear waļo̧ktok n̄an eō. Ilo lukoļepen wōt men eo aiboojoj im em̧ulaļ kōmeļeļein ko ippān, ekar jiron̄ eō, “Nejū, pād wōt ilo mijen eo am̧.”
Ikar ļoore naan in kakpilōklōk eo an Jema im pād wōt.
Kōnke kōn wōt oktak eo em̧wilaļ eo ear ļoor kōm̧m̧ao eo an, “juon kijeek ebwil ilowaa” Randy eo ear kōņaan tilmaake āinwōt juon mijenede ej jerbal aolep raan.
Jiljino allōn̄ ālkin mijen eo aō, ikar kabwijer pein jinō ke ear bōk kōto eo an āliktata. Jon̄oul iiō tokālik, kōrā eo pāleeū, Lisa, ekar loe juon leta jān ro jinō im jema ilo juon bo̧o̧k emor. Jema ekar je n̄an n̄a ilo iien mijen eo aō bōtaab earkar mej m̧okta jān an jijlōk e
“Būruwōm̧ rekar im rej im aolep iien naaj obrak kōn iakwe n̄an eok. Ij kile bwe men otemjej rōjan̄ in kar aolep iien wājabdik, ak menin ej mour. … Kraist ekar jab ba, ‘Ļoore Eō im ej naaj wōt pidodo.’ Eaar ba, ‘Bōk [am̧] dābwāāl, im ļoor Eō’ [Matu 16:24]. Ekar ineek dōbwāāl eo, ak kōj aolep ewōr ad kurbalōklōk ko. Bōlen jikin eo ad ilo lan̄ enaaj pedped ioon wāween ad kōm̧m̧anmōni ko ad. Nejū, kōm̧ lukkuun lap am iakwe eok.”
Ta eo Iaar Pukote
Rūttoļo̧k, eaar nana tam̧m̧ū n̄an ro jinō im jema, ak ikar jab pere iakwe eo aer. Iien eo iar loe Kabun̄ in, ikar lukkuun jerbal n̄an kam̧m̧oolol er im wūjtak er.
Ilo Pāpode 17, 2018, ruo wiik ko m̧okta jān an kar Washington D.C. Temple kilōk n̄an kōkkāāl, ikar liāp n̄an jema im jinō, 42 iiō ko ālkin aer kar em̧m̧akūt jān mour ilo eļļāļo̧k jān rōn̄ōl in nuknuk eo n̄an mour indeeo. Ļaddik eo nejū erūtto, William, eaar jerbal āinwōt ribōk jikin jema, im Lisa ear jerbal āinwōt ribōk jikin jinō. Ikar en̄jake ke ro jinō im jema, ro rekar liāp n̄an doon m̧oktaļo̧k, rekar jim̧or pād ijo ilo jetōb.
Ilo tampeļ eo jemaron̄ loe to in ekkijaak ko rej likwōje kōj n̄an indeeo n̄an ro jej iakwe er. Ij lukkuun in kam̧ool kōn menin.
Ke ikar dik, ikar jab kōņaan m̧are ak wōr nejū ajri ro. Ak rainin kōrā eo pāleeū, ajri ro, im ajri ro jibū rej menin aorōk ko reļļaptata. Kabun̄ in ej juon kakōļļe, im mour eo aō ilo Kabun̄ in ekar kabwilōn̄lōn̄. Ippān Josep Smith, ij ba, “Eļan̄n̄e in kar jab katak im jeļā ta eo epād ippa, in kar jabtōmake e n̄a make.”
Nemn̄oul iiō ko rem̧ootļo̧k, ikar juon rijerbal in ekkal ilo Washington D.C. Temple eo. Ikar lukkuun jeļāe bwe mour eo ejjeļo̧k an ilju eo elem̧ōņōņō . Rainin ij juon rijerbal in kien ilo ejja tampeļ eo wōt, bōke bwe en mwien kūr eo an Irooj n̄an ļo̧o̧r E, bōk kōmour eo An, atartar wōt ilo kien ko An, im kakkōt n̄an erom̧ āinwōt E.
Randy im kōrā eo pāleen, Lisa, rej jerbal ilo Washington D.C. Temple eo, eo ekar jipan̄ kalōke 50 iiō ko rem̧ootļo̧k.
Pija jān Leslie Nilsson
Kabun̄ eo em̧ōj an jepļaaktok ejjab juon men eo ej kōmleleik juon ļōm̧ņak, juon iakwe an loļātāt, ak juon jukjukinpād ak m̧anit wōt. Ej Kabun̄ eo em̧ool an Irooj im Rilo̧mo̧o̧r, Jisōs Kraist.
Ikar ļōmņak inaaj kar loe ta eo ikar pukote ilo San Francisco. Ikar jab. Ikar lo e ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata im ilo m̧weo im̧ōn Irooj, “kūrawūn eo aurōk an Jepļaaktok eo.”