“Jerbal in Kwaļo̧k an Rijilōk ro: Juon Jerbal Me Ejjeļo̧k Bar Juon Emaron̄ Kōm̧m̧ane,” Liaona, M̧aaj. 2025.
Jerbal in Kwaļo̧k an Rijilōk ro: Juon Jerbal Me Ejjeļo̧k Bar Juon Emaron̄ Kōm̧m̧ane
Ewi wāween an jerbal in kwaļo̧k eo an Rijilōk ro raan kein an Irooj un̄ūr kajjojo armej n̄an em̧m̧an eo.
Doulul eo an Jon̄oulruo Rijilōk ro rej jutak āinwōt rikam̧ool ro an Jisōs Kraist ilo aolepān laļ in. Kūr eo aer ejenolo̧k im eļap an eddo. Ālkin kar kūr er n̄an jerbal, rej kili kōjem̧ ko an jerbal ko aer im wūjlepļo̧k e aolepān iien eo aer im tōļan ko n̄an kōjeraam̧m̧an ro jet. Kajjojo ej bōktok mennin letok ko rejenolo̧k im tōļan ko n̄an kūr ko aer, katakin im ekkatak gospel eo, im anjo jān apan̄ ko kōn tōmak ilo Irooj.
Elder Ronald A. Rasband jān Doulul eo an Jon̄oulruo Rijilōk im kōrā eo pāleen, Melanie, rej kab baj jijetļo̧k ilo jea ko aer n̄an aer ron̄jake al in Kūrijm̧ōj an jikuuļ eo an ļaddik eo jibwier ke principle eo ekar kepaake im kar kajjitōk eļan̄n̄e Elder Rasband emaron̄ karuwaineneik jarlepju eo.
Ekar jutak im reilo̧k n̄an jarlepju eo im band eo—aolep rekar kijoroor bwe būrookraam̧ eo en jinoe—ekar ļōmņak n̄an karuwaineneik rilotok ro im kōjeraam̧m̧an er kōn juon joteen eaiboojoj. Innām ekar keememej kūr in an āinwōt rijilōk n̄an aolep iien jutak āinwōt juon rikam̧ool ejenolo̧k ilo aolep jikin ko. “Kōrā im m̧aan ro,” ekar ba, “Ij jab maron̄ joļo̧k iien in em̧m̧an [ilo season] in raan in ļotak eo an Kraist n̄an kwaļo̧k aō kam̧ool kōn et eo Etan im kōn jerbal in kwaļo̧k eo An.”
Jekdo̧o̧n ia rej etal ie ļo̧k, jekdo̧o̧n wōn ro rej ioon e, ennaan eo an Rijilōk ro ej juon kam̧ool kōn Jisōs Kraist āinwōt ripinmuur eo Nejin Anij. “Men eo aorōk tata, aolep iien, kōmij rikam̧ool ro kōn m̧ool eo emour kōn Irooj Jisōs Kraist,” Elder David A. Bednar eaar ba.
“Jisōs Kraist ej un eo jej pād ijin,” Elder Dale G. Renlund ekar jiron̄ļo̧k sister ro an Doulul eo an Kōrā ro ilo juon nokon ilo London iiō eo ļo̧k. “Ij lukkuun jeļā bwe Ej mour! … Lukkuun kabwilōn̄lōn̄ eo ej waļo̧k ilo mour eo am̧ n̄e kwoj jeļā kōn menin kōn kwe make.”
“Ewi wāween aō jipan̄ kalōk tōmak eo aer ilo Jisōs Kraist?” Elder Quentin L. Cook ekar ba membōr ro ilo Sydney, Australia, bar jiron̄ er ewi wāween an kajjitōk in kar ejaak ium̧win elōn̄ iiō ko.
Katak ko aer rej kwaļo̧k juon en̄jake in kijerjer im kōņaan eo rej en̄jake n̄an ro jet n̄an aer wanlōn̄tak ilo kwojarjar n̄an lale im en̄jake Rilo̧mo̧o̧r im en̄jake tūriamo̧ in pinmuur eo An (lale 3 Nipai 11:15). Katak ko rej kōn iakwe im meļeļe. Aer akweļap n̄an ukweļo̧k eaorōk im pen. Aer kōņaan bwe membōr ro ren eddōkļo̧k ilo men ko an Anij ej āinwōt kam̧ool eo jab maron̄ kariabe. N̄e armej ro rej ron̄jake naan in kam̧ool eo kar kam̧ool jān juon Rijilōk, bōro ko remaron̄ m̧weiur im mour ko rej oktak.
Rikam̧ool ro an Jisōs Kraist
Kajjojo Rijilōk ej bōktok tōļan ko rejenolo̧k im en̄jake ko n̄an kwaļo̧k kōn jerbal eo an. Kajjojo iaer eļap nōbar e ilo jerbal eo an. Kajjojo ej oktak ilo m̧wil im wāween, ak rej kwaļo̧k ejja kain wāween ko raorōk. Rej m̧ōņōņō, laudin̄din̄, im lōke n̄an pād ipeļaakin. Elukkuun emakijkij, ro rej ioon juon Rijilōk an Jisōs Kraist rej bwilōn̄ kōn piktokin jouj im iakwe eo aer.
Ewōr juon men eaorōk kōn Rijilōk ro kōm̧m̧an bwe men otemjej rej tōprak—juon tūreep n̄an kōjeraam̧m̧an, bōktok naan in kaenōm̧m̧an, im kwaļo̧k kam̧ool.
“Ium̧win jiln̄uuļ iiō ko, eaar juon aō uteej im jeraam̧m̧an n̄an iiaio ippān ro uwaan Doulul eo an Rijilōk ro Jon̄oulruo jān Kabun̄ eo an Jisōs Kraist im Armej ro Rekwojarjar ilo Raan Ko Āliktata,” Būreejtōn Jeffrey R. Holland eaar ba, Ripenej Jenkwan Būreejtōn eo an Doulul eo an Jon̄oulruo Rijilōk ro. “Ilo ejjeļo̧k kajjitōk, aolep em̧m̧aan rein rekar jipan̄ eō erom̧ juon rikaļoor em̧m̧anļo̧k an Jisōs Kraist.
“Ilo am̧ kobatok n̄an bōk pija eo amean̄ ekāāl, ikar en̄jake juon en̄jake in kam̧m̧oolol n̄an erom̧ m̧ōttan juon kōllaajrak in jān etto im rikaļoor ro an raan kein an Jisōs Kraist.
“Āt ko im māj ko … ilo doulul in ej oktak iien n̄an iien, ak men eo ej aorōk ej pād wōt: kajjojo rijilōk ekar errā kōn eddo in ‘rikam̧ool ro rejenolo̧k kōn etan Kraist ilo aolepān laļ’ [lale Katak im Bujen Ko 107:23]. Ejjeļo̧k jerbal em̧m̧anļo̧k maron̄ kar leļo̧k n̄an jabdewōt, barāinwōt jabdewōt kūrub in em̧m̧aan ro rem̧m̧an n̄an kōm̧m̧ane menin.”
Elder Dieter F. Uchtdorf ej kōnono ilo juon kweilo̧k eļap ejenolo̧k an Jerusalem District ilo BYU eo ilo Jerusalem Center ilo Eprōļ 22, 2023.
“En̄jake in kam̧m̧oolol kōn Rilo̧mo̧o̧r eo ekar kobrak eō rainin ilo ad kile katok eo An ilo ruo jikin ko rejenolo̧k,” Elder Dieter F. Uchtdorf ekar ba, iien eo ej loļo̧k jikin kein ilo Israel ilo 2023. “Kōm̧ kar loļo̧k Lōb eo ilo Jikin Kallib eo,” ijo im ānbwinnin Kraist kar maron̄ kōbabuki ie.
“Kōm̧ kar barāinwōt loļo̧k jikin eo jet armej ro rekar kile bwe ekar jikin kallib Gethsemane. Ilo am kar etetal ilubwilijin wōjke olive kein, kōm̧ kar ron̄jake eoon ko jān jeje ko rekwojarjar rej kōmeļeļeiki kallim̧ur in katok eo an Rilo̧mo̧o̧r kōn tōmak eo ad ilo jikin kallib in im ioon dōbwāāl eo.
“En̄taan eo an Jisōs Kraist ilo Jikin Kallib Gethsemane im ioon dōbwāāl eo jej aikuj lukkuun kaorōk im kōjparoke. Āinļo̧k wōt, m̧akūtkūt ko rekabwilōn̄lōn̄ me rekar waļo̧k ilo raan eo kein kajilu ālkin dōbwāāl eo An ej aikuj in juon jikin kabun̄ im kam̧m̧oolol eļap ilo būruwōd im ļōmņak ko ad
“Āinwōt juon rikaļoor an Kraist, ij jeraam̧m̧an n̄an kwaļo̧k naan in kam̧ool eo aō bwe E ej mour!”
Ilo juon post ilo social media n̄an kautiej Irooj, Elder Gerrit W. Gong ekar rōjan̄, “Jen aolep iien kōnono kōn kam̧m̧oolol kōn jouj im kautiej kōn jerbal im aiboojoj eo an Anij im wānōk ko, tūriamo̧ ko, im jouj eo an Jisōs Kraist im katok in pinmuur eo An.”
Kōpooje juon Rijilōk
“Ebōk juon iien eatok an Irooj n̄an kajikuuļi juon Rijilōk,” Būreejtōn Russell M. Nelson ekar ba. “N̄e juon em̧m̧aan ej kūr n̄an Jon̄oulruo, Irooj make ewōr An men eo ejenolo̧k ippān em̧m̧aan eo n̄an leļo̧k.”
Ilo iaļ in an kajjojo Rijilōk ej itok mālijjon̄ ko—“kakkōlkōl ko ilo peran im kijenmej”—aolep iien pukot jetōb eo, jet iien kauwōtata ko rej kam̧ijak er.
“Aolep iien ewōr juon mālijjon̄,” Būreejtōn Nelson ekar ba, kōmeļeļeiki jerbal in ilo jerbal in jipan̄ eo an Irooj. “Kwoj ke m̧ōņōņō in kōm̧m̧ani men ko reppen? N̄e kwonaaj kwaļo̧k am̧ m̧ōņōņō in kōm̧m̧ane ijo koņaam̧, Enaaj jipan̄ eok.”
Ilo tōre eo ej kōnono n̄an membōr ro ilo Australia, Elder Cook ekar kwaļo̧k juon an en̄jake ilo an kar jiron̄ ewi wāween an membōr ro an Doulul eo an Rijilōk ro Jon̄oulruo kar en̄jake ilo aer jab pojak im likjab āinwōt ritōl ro an ward jet iien rej en̄jake. “N̄an erom̧ juon Rijilōk, ilo jerbal in jipan̄ eo an Irooj, elukkuun in ettā,” ekar ba.
Āinwōt juon Rijilōk ej kab m̧ōj kūri, Elder Neil L. Andersen ekar kōmeļeļeiki bwe men̄e ekar en̄jake likjab im ettā, ekar bōk kaenōm̧m̧an eo bwe Irooj ekar kōjeraam̧m̧an e kōn diktata juon men ekar ekkar kake: “Ijeļā kōn alikkar eo ewāppen im m̧ool eo kōn kajoor eo an Jetōb Kwojarjar bwe Jisōs ej RiKraist eo, Nejin Anij Ejitōn Bōro.”
“Kar kajjōtikin eō kain rot en̄jake eo kwoj en̄jake n̄an erom̧ juon Rijilōk ekāāl,” Elder Patrick Kearon ekar ba raan eo ālkin kūr eo an n̄an Doulul eo an Jon̄oulruo Rijilōk ro.
“Ekar wōr ippa aolep en̄jake ko imaron̄ ļōmņaki, im ijeļā menin eļap n̄an n̄a. Ak inaaj akweļap kōn jipan̄. Ij lukkuun in tōmak kōn juon Jemedwōj Ilan̄ eo ej iakwe im Nejin, ad Rilo̧mo̧o̧r. Im ijeļā bwe Renaaj jipan̄. Im ij pedped ilo menin. Im inaaj kōm̧m̧ane ijo em̧m̧antata n̄an erom̧, eļapļo̧k iien otemjej, juon men eo enaaj etal ippān lo̧k m̧akūtkūt ko an juon Rijilōk bwe kwōn maron̄ pād ilo am̧ kōļmenļo̧kjeņ.
“Im kōn menin, ilo raan in ke ikar kakkōt, 24 awa ko ālkin kar kūr eo, n̄an itok n̄an meļeļe ko ippān menin, eļan̄n̄e ewōr juon am̧ raan me kwoj en̄jake am̧ kōttōbar juon men … ilōn̄ in kōļmenļo̧kjeņ eo am̧, ekwe, ij pād ijeņ ippām.”
Būreejtōn Russell M. Nelson ekar tōl juon kum̧in in ritōl ro an Kabun̄, ekoba Elder Gerrit W. Gong, ilo juon loļo̧k ippān kiin̄ im lerooj eo an Tonga ilo 2019. Rijilōk ro rekar kweilo̧k ippān ro kar kāālet er im jeban ro an laļ eo ilo eddo eo aer n̄an kōppeļļo̧k kōjem̧ ko n̄an laļ ko n̄an gospel in. Elōn̄ iiō ko rej aikuj n̄an m̧aanjappopoik Rijilōk ro kōn jerbal eo aer eļap, Būreejtōn Nelson ekar ba.
Ambassador ro n̄an laļ in
Kōnono kōn Katak im Bujen Ko 107:23, eo me Irooj ej kūr Jon̄oulruo Rijilōk ro n̄an erom̧ “rikam̧ool ro rejenolo̧k ilo etan Kraist ilo aolepān laļin,” Būreejtōn Nelson ekar lale: “Kajjojo membōr ro an Jon̄oulruo ro rej juon Rijilōk n̄an aolepān laļ in. Ej aikuj in ekkatak kōn aolep m̧ōttan ko an laļin, ippānļo̧k armej ro im kajin ko im bwebwenato.”
Jerbal eo aer ej ajeededļo̧k n̄an aolepān laļ in. Rej kweilo̧k ippān jeban ro an laļ eo, ro kāālet er jān bukwōn eo, media, im membōr ro an Kabun̄ in ilo kweilo̧k ko reļļap im ko rejenolo̧k. Awa ko remaron̄ in aitok im ļap aikuji. Āinwōt ambasssador ro an Irooj Jisōs Kraist, mour ko aer ejako aer make.
Ilo juon iien eo bwe an eapan̄, 12-raan in iien loļo̧k im kwaļo̧k kar iiō eo ļo̧k n̄an jiljino laļ ko ilo Europe—ijo me ekkā wōt aō kiki ilo kajjojo kōtaan bon̄in ekāke ko n̄an laļ kein—Elder D. Todd Christofferson ekar ioon ritōl ro an kien, mijenede ro, im membōr ro an Kabun̄ in ilo jikin kein.
Jān juon note ilo kar kweilo̧k eo ippān Minister eo an Culture im Media ilo Croatia, ijo ekar leļo̧k jipan̄ an Kabun̄ n̄an jipan̄ elōn̄ rijipakwe ro rej deļo̧n̄tok n̄an laļ in jān Ukraine eo ejorrāān jān tariņae. “Kōm̧ … kar loe bwe ekar lōn̄ wāween ko roktak … kōm̧ maron̄ kar kōnono kaki, eļaptata [ilo jipan̄] ro otemjej rej pād ilo aikuj eļap,” Elder Christofferson ekar ba.
Ālkin loļo̧k ritōl rein an jikin kein ilo Dar es Salaam, Tanzania, n̄an kōjjeļļā kōn juon jipan̄ jān Kabun̄ in n̄an juon jerbal eļap humanitarian ilo 2024, Elder Gary E. Stevenson ekar kweilo̧k ippān membōr ro im mijenede ro.
Ilo juon iien ito itak ratimjuon raan aetokan n̄an jejjo̧ jikin ko ilo Africa iiō eo ļo̧k, Elder Gary E. Stevenson ekar loļo̧k Makuburi Health Center ilo Dar es Salaam, Tanzania, ijo Kabun̄ in ej jipan̄ n̄an kakilepļo̧k center eo. “Ke kōm̧ ar loe bwe jipan̄ ko ekar kōm̧m̧an jān m̧am̧a im ajri ro ijin,” Elder Stevenson ekar ba, “būruwōm̧ rekar m̧weiur.”
N̄an m̧aake 30-iiō in an pād Kabun̄ in ilo Cambodia, Elder Renlund ekar kweilo̧k ippān prime minister eo an Cambodia, eo ekar kōmeļeļeiki āinwōt “juon armej ekabwilōn̄lōn̄.”
Rijilōk eo, juon cardiologist kar m̧oktaļo̧k, ekar jiron̄ prime minister eo ke Kabun̄ eo an Jisōs Kraist ear jipan̄ļo̧k kōn enan̄in US $2.2 milien bwe juon cardiac center en maron̄ koba ippān n̄an juon im̧ōn taktō ilo Siem Reap, pād ilo enan̄in 200 m̧aeļ ko (320 km) turear in Phnom Penh, n̄an bōkļo̧k ājmour eo em̧m̧anļo̧k n̄an ro āinwōt eo unlepen prime minister eo, eo ekar mej jān juon nan̄inmej in coronary syndrome eo elap ippān.
Elder Dale G. Renlund ej idik pein Samdech Moha Borvor Thipadei HUN Manet, Prime Minister eo an Kingdom in Cambodia, ilo Phnom Penh ilo Jānode 22, 2024. Kweilo̧k in ej bōk jikin loļo̧k eo kein kajuon an juon ritōl in Kabun̄ in ippān juon membōr in kien eo an Kingdom in Cambodia.
“Ikar jeraam̧m̧an n̄an maron̄ ioon membōr ro, ritōl ro, im mijenede ro ilo Ulaanbaatar, Mongolia, im ilo Kyoto, Hiroshima, Fukuoka, Sapporo, im Tokyo, Japan,” Elder Ulisses Soares ekar ba ālkin loļo̧k Asia North Area ilo 2024. “Ilo aolep kweilo̧k ak m̧akūtkūt ko aō, ikar en̄jake iakwe eo em̧m̧an im tōmak n̄an armej rein n̄an aer Irooj. Bwebwenato in oktak kein aer rekabwilōn̄lōn̄ ekar un̄ūr eō im kōkajoorļo̧k naan in kam̧ool eo aō n̄an Jisōs Kraist im n̄an gospel eo An ekar jepļaaktok n̄an laļ in.
“… Ekar juon kōjeraam̧m̧an n̄an n̄a n̄an en̄jake Jetōb eo an Irooj im iakwe eo An ilubwiljin rikaļoor rein reļļap an Kraist ilo laļ kein.”
Jerbal ko an Rijilōk ro
Kōppeļļo̧k kōjem̧ ko n̄an gospel eo ilo elōn̄ laļ ko ilo juon eddo an rijilōk eaorōk: “Jon̄oulruo ro jilkinļo̧k er, rej kabwijer ki ko, n̄an kōpeļļo̧k kōjām eo jān kabun̄bun̄ļo̧k gospel eo an Jisōs Kraist” (Katak im Bujen Ko 107:35).
Ilo en̄jake eo an Būreejtōn Nelson āinwōt juon membōr an Jon̄oulruo, kōjem̧ ko n̄an gospel eo rekar oktak aer peļļo̧k. Jet iien Jetōb eo ekar jerbal ilo juon ritōl an kien m̧ae iien “ekar jino in ukōt ļōmņak eo an kōn kōj,” Būreejtōn Nelson ekar ba. Bar juon iien juon em̧m̧aan eo ekar jab kōņaan in kōnnaan ippān ritōl ro an Kabun̄ in ekar kōm̧akūt jān opiij, im Irooj ekar letok n̄an “kōm̧ juon em̧m̧aan jemaron̄ kōnono n̄ane.” Ilo kajjojo jekjek, Būreejtōn Nelson ekar ba, “ennaan eo [jān lan̄] n̄an n̄a ekar juon wōt: ‘Jerbal e būruwōm̧. … Bōk kauwōtata ko. Innām n̄e kwojjab maron̄ etal m̧aanļo̧k, inaaj jipan̄ eok.’”
Lan̄lōn̄ eo ilo jerbal eo an juon Rijilōk, rej ba, rej itok n̄e jej kajukun wōt juon aikuj ko rapan̄ ilo kōnono n̄an kūrub ko reļļap barāinwōt ilo jerbal in karejar n̄an kajjojo armej. Rej loļo̧k membōr ro ilo m̧ōko m̧weer n̄an leļo̧k juon kōjeraam̧m̧an, kwaļo̧k kam̧m̧oolol, ak leļo̧k kapilōk eo emenin aikuj.
Elder Bednar ekar ba: “Irooj ej jilkinļo̧k juon uwaan Doulul eo an Jon̄oulruo Rijilōk ro n̄an jikin ko rejenlo̧k ilo iien ko rejejjet ijo kōmij ioon Armej ro Rekwōjarjar ilo Raan Ko Āliktata im ro jet me ekkā aer kakkōt ak rej pād ilo aikuj kaenōm̧m̧an im kōketak. Anij ej karōk m̧akūtkūt kein.”
Elder David A. Bednar kōrā eo pāleen, Susan, iakiakwe armej ro ālkin kōnono ilo juon kweilo̧k ilo Toluca, Mexico, ilo Nobōm̧ba 5, 2023.
Ilo elōn̄ iien ko, jerbal in jipan̄ ko aer ej n̄an public, āinwōt ke Elder Stevenson ekar bōk koņaan ilo juon nuuj conference ilo Nairobi, Kenya, me ekar diwōjļo̧k ilo live national television. “Juon kajjitōk emaron̄ pād ilo … ļōmņak eo am̧ ej, ‘Ta in Rijilōk?’” Elder Stevenson ekar ba ilo iien kadiwōjļo̧k eo imejatoto. “Kōm̧ij … kūr n̄an etal n̄an āne ko ilo laļ in im kwaļo̧k kam̧ool eo ekwojarjar kōn Nejin Jisōs Kraist, Nejin Anij eo emour.”
“Aolep men rej kōn E ,” Elder Dieter F. Uchtdorf ekar ba. “Kōmij jerbal ilo Etan. Men otemjej ej kōn Anij im em̧m̧an eo An im aorōk eo An n̄an lem̧ōņōņō eo an ajri ro Nejin.”
Jerbal eo aer ej jet iien epaakeļo̧k kapijuknen—ilo m̧ool. Elder Bednar ekar kōkāāl bōro̧o̧j in m̧weo im̧ōn juon raan im etal n̄an juon m̧ōn wia n̄an wia jet menin aikuj. Ekar kōņak nuknuk in jerbal ko: jero̧jij in ekkōņak bajjōk im juuj ko, juon Jiiln̄ij, im juon at in iakiu.
“Juon em̧m̧aan ekar kepaake eō ilo aō kar kāālet menin aikuj ko aō im ba, ‘Elder Bednar, men jab e ejjab jerbal.’ Kōm̧ kar ettōn̄, innām ekar kajjitōk, ‘Kwoj ke ļōmņak eļan̄n̄e ij kajjitōk ippam̧ juon kajjitōk?’
“Ikar uwaak, ‘Ekwe, en̄in ej unin aō pād ijin.’
“Ekar uwaak ilo bwilōn̄, ‘Ta meļeļein am̧ ba?’
“Ikar ba, ‘… ij pād ijin kōnke Anij ekar jeļā ke kōm̧ kar itōn ioon doon ilo m̧ōn wia in im bwe ewōr ippam juon men eo kwoj kōņaan kajjitōk. Jouj etal wōt im kwaļo̧k n̄an n̄a kajjitōk eo am̧.’
“Kōm̧ kar kōnono ilo kōtaan jeļōb ko enan̄in 15 minit, im ikar kajjieon̄ jipan̄ e pukot uwaak eo n̄an kajjitōk eo an. Ekar ke juon jide bwe in ioon em̧m̧aan in em̧m̧an ilo m̧ōn wia eo? Ak menin ekar juon karōk em̧m̧an jān juon Rilo̧mo̧o̧r eo ej iakwe … ekar uwaak n̄an inepata ko an juon em̧m̧aan etiljek—juon?
“Ij tōmak bwe ilo jerbal eo an Irooj ejjeļo̧k juon men āinwōt juon jide. Aorōk in jetōb ko ekanooj ļap ilo im̧aan mejān Anij.”
Elder Neil L. Andersen ej kajim̧weiki n̄an kōm̧m̧ane juon pija ilo Pāpode 22, 2024, ilo Jaime Cardinal Sin Village, Manila, Philippines, ijo Kabun̄ ekar kōkōm̧anm̧ani jilu tāān̄ in dān ko.
Jelm̧ae Apan̄ ko kōn Tōmak ilo Irooj
Jorrāān ko reļļap im kaipokpok rej jelm̧ae Rijilōk ro rainin. Rej kappukot im̧we ilo aer katakin im jerbal in karejar n̄an aolepān jarlepju ko laļ in im elōn̄ļo̧k jān 17 milien membōr ro an Kabun̄ in ro rekar idajon̄jon̄ jān apan̄ ko āinwōt iktōltōl in makūtkūt ko rejelet kien rejjab bōjrak, pija ko rettoonon, kajoor in jum̧ae ko rekajoor an social media, ak jeraam̧m̧an ko jab lukkuun jeļā kaki. Tarpok ikōtaan laļ ko rej kabōjrak jerbal eo. Wāween eo ettonoon an aorōk ko an m̧anit rej kapan̄ kajoor in iiaio ko.
Ro uwaan Jon̄oulruo ro rej jab jelet eddo ko aer im aer kōņaan in kalōk tōmak ilo juon laļ eo jab tōmak eo an ej ļapļo̧k.
“Elukkuun alikkar bwe kajoor eo an Irooj ej em̧m̧akūt ioon ritōl ro an Kabun̄ in ej kareel er kōn … m̧ool,” Būreejtōn M. Russell Ballard ekar ba (1928–2023), Ripenej Jenkwan Būreejtōn eo an Rijilōk ro Jon̄oulruo. “Kajjitōk eo kōj aolep jej aikuj kajjōtikin kōj make ej, ‘Jej ke pād ilo ad ļoore [ritōl ro ad]?’ Kōj kajjojo ej aikuj in m̧aanjabpopo n̄an uwaake kajjitōk in. Imaron̄ kam̧ool n̄an kwe bwe ej juon unin kōnono aikuj in kōnono kake ilubwilijin Doulul eo an Jon̄oulruo Rijilōk ro. … Iien in ejjab juon iien kakkije ak jerbal ilo ejjeļo̧k kijejeto ilo kūr ko ad. …”
“… Jej aikuj in m̧aanjabpopo n̄an pād im ļoore ritōl ro ad, bōk bun̄tōn ko raitok n̄an aolep etetal aitok ko aer.”
“Āinwōt rikaļoor ro an Jisōs Kraist, jej kappukot n̄an erom̧ āinwōt Rilo̧mo̧o̧r eo ad im ļoore waanjon̄ak eo An ilo aolep men jej kōm̧m̧ani,” Elder Uchtdorf ekar ba. “Jān lukkuun iien ņe ikar likūt neeō ioon iaļ in rikaļoor eo, loe im jab loe kōjeraam̧m̧an ko jān Anij rej jino itok n̄an kōj.
“Jekdo̧o̧n ia jej pād ie, kwe im n̄a maron̄ etetal ilo iaļ in rikaļoor eo rainin. Jen ettā bōro; jen jar n̄an Jemedwōj Ilan̄ kōn aolepān būruwōd im kwaļo̧k ad ikdeleel n̄an epaakeļo̧k E im ekkatak kōn E.”