“Bōk Mennin Letok Kwojarjar Eo Kōn Kajoor jān Ijo Eutiej,” Liaona, M̧aaj 2025.
Jibadbad ko Raorōk Ilo Mweo Im̧ōn Irooj
Bōk Mennin Letok Kwojarjar Eo Kōn Kajoor jān Ijo Eutiej
Āinwōt rikaļoor ro ilo Kallim̧ur Ekāāl, Armej ro Rekwojarjar ro rekar kallm̧ur kōn juon mennin letok kwojarjar kōn kajoor jān Irooj.
Ilo Spring in 1836, Charles Rich kar juon mijenede ej kwaļo̧k gospel eo ekar jepļaaktok ilo turōk in Ohio. Ekar inepata bwe ekar itaaktok ilo Kirtland, Ohio, ilo Eprōļ 12—enan̄in ruo wiik ko ālkin aje eo an Kirtland Temple.
Ekar ito itak kōn steamship itōrerein Ohio River innām etetal turinļo̧k 100 m̧aeļ ko(160 km). Ekar loe m̧weo im̧ōn Irooj ioon ijoko ilōn̄ ej jede ilōn̄ ilo ioon āne kōn bļu waal ko im bōro̧o̧j būrōrō. Bōtaab ekar rum̧wij. Ekar rum̧wiji aje eo, iien kobatok eo ippān doon, im, ekar ļōmņak, kallim̧ur eo an bōk mennin letok kwojarjar eo jān kajoor eo jān ijo eutiej.
Ilo Jeptōm̧ba 1830, jejjo̧ allōn̄ ālkin an kar Kabun̄ eo jepļaaktok kar ejaak, Josep Smith ekar bōk juon revelesōn jān Jisōs Kraist n̄an kūrtok membōr ro an Kabun̄ eo n̄an aiintok doon (lale Katak im Bujen Ko 29:7–8). Jejjo allōn̄ ko tokālik Irooj ekar kwaļo̧k etke. Armej ro Rekwojarjar rekar “etal n̄an Ohio,” ijo, Jisōs ekar kwaļo̧k, “Inaaj lewōj n̄an kom̧ kien eo Aō; im ijeņ kom̧ naaj bōk mennin letok kwojarjar eo kōn kajoor jān ijo eutiej; Im jān ijeņ, jabdewōt eo Ikōņaan enaaj etal ilubwiljin aolep laļ ko,” (Katak im Bujen Ko 38:32–33; eoon eo eaorōk kar kobaiktok). Ro uwaan Kabun̄ eo rekar ron̄ kōn revelesōn in naaj kile bwe kajin in āinwōt itok jān Kalim̧m̧ur Ekāāl.
Rikaļoor ro an Kallim̧urm̧ur Ekāāl Rekar Bōk Menin Letok Kwojarjar eo Kōn Kajoor
Luk 24 ej ijjino ilo juon iien ebbweer. Jisōs ekar dōbwāāl, im juon kūrub in rikaļoor ro An rej kōrā ro rekar ro̧o̧ltok n̄an lōb eo An. Rekar loe bwe ejm̧aan eo em̧ōj dāpilļo̧k, im er “im jab lo ubōn Irooj Jisōs” (eoon 3). Ejjab etto riboktok ennaan ro jān lan̄ rekar leļo̧k n̄an er kōjatdikdik: “E jab pād ijin, a eṃōj An jerkakpeje” (eoon 6).
Tokālik, Irooj eo em̧ōj an jerkakpeje ekar waļo̧k ļo̧k n̄an rikaļoor ro An im jerbal n̄an er. Ekar leļo̧k ta eo Rikūrijin ro ipeļaakin laļ in rej kile āinwōt “Mālim eo Eļap” n̄an kwaļo̧k gospel eo an Jisōs Kraist. Jisōs ekar kōmeļeļeik bwe “naaj kwaḷọk ukeḷọk im jeorḷọk jerọwiwi ko ilo Etan ñan ri aelōñ otemjej” (eoon 47).
Kōn menin, Ekar kōmeļeļeiki rikaļoor ro An bwe ren jab mōkaj aer etal: “A koṃwin kattar i ilo jikin kweilọk Jerusalem, n̄an tōr eo kajoor jān lan̄ ej imwe kom̧” (verse 49). Endued (ak “endowed” ilo kajin English raan kein) ej juon ukook jān Greek meļeļein naan eo “n̄an kanuknuk.” Rikaļoor ro an Kraist etto rekar kōttar ilo Jerusalem m̧ae iien rekar nuknuk kōn kajoor jān ijo eutiej. Innām rekar kalōk aelōn̄ in kiin̄ an Anij ipeļaakin laļ in.
Mokta jān an kar wanlōn̄ļo̧k n̄an lan̄, Irooj ekar ba n̄an rikaļoor ro An: “A koṃwin kattar i ilo jikin kweilọk Jerusalem, n̄an tōr eo kajoor jān lan̄ ej imwe kom̧” (Luk 24:49).
Armej ro Rekwojarjar Rekar Im̧we Kōn Kajoor
Armej ro Rekwojarjar rekar aiintok doon ilo Ohio ilo 1830 ko kōn ejja jibadbad in. Rekar reim̧aanļo̧k n̄an aer maron̄ “im̧we kōn kajoor jān ijo eutiej;” (Katak im Bujen Ko 38:32) im bōk ennaan eo an Jisōs ipeļaakin laļ in. Ilo jem̧ļo̧kin, Irooj ekar kwaļo̧k n̄an Armej ro Rekwojarjar bwe “ren bōk mennin leļo̧k ekwōjarjar eo aer jān ijo eutiej ilo m̧weo Im̧ō” (Katak im Bujen Ko 105:33, eoon eo eaorōk kar kobaik; bar lale eoon 11–12). N̄an kiiō, elōn̄ Armej ro Rekwojarjar etto rekar jab lukkuun jeļā ta eo kar kōtmāne jān er.
Ejjab etto ālkin kūr im kapiti n̄an Doulul eo an Jon̄oulruo Rijilōk ro ilo 1835, Josep Smith ekar ioon er kōn m̧weo im̧ōn Irooj. Josep ekar kile bwe Jon̄oulruo ro rekar “kijerjer” im kar jab meļeļe ta eo ekar itok. Ekar kōmeļeļeiki bwe rej aikuji juon mennin letok kwojarjar bwe ren maron̄ “maron̄ m̧aanjabpopo im maron̄ anjo̧ ioon men otemjej” im katakin gospel eo kōn kajoor. “Ke kwaar bōk mennin letok kwojarjar eo,” ekar kōmeļeļeiki, Rijilōk ro renaaj “kwaļo̧k gospel eo n̄an aolep laļ, armej, im lo.”
Tokālik, Josep Smith ekar kwaļo̧k kōjeraam̧m̧an ko em̧ōj likūt jon̄ak ko aer ālkin ekkapit eo ekwojarjar an pris ro etto an tampeļ. Ilo m̧aanjabpopo n̄an mennin letok kwojarjar in, aolep priesthood opiija ro rekar kwaļkwōļ im ekkapit “kōn ejja kain oil eo im ilo jekjek eo kar n̄an Moses im Aron, im ro otemjej rekar jutak im̧aan Irooj ilo raan ko etto.”
Ilo iien in, mennin letok kwojarjar eo kōn kajoor ekar kōm̧m̧an juon lutōkleplep in kajoor in jetōb eo ilo juon kweilo̧k ejenolo̧k im eaorōk. Āinwōt Elijah Able—Rikilmeej eo jinointata jiljilimjuonn̄oul ilo Kabun̄ in—priesthood opiija ro rekar jitlo̧k, jar, im m̧ōn̄ā kwojkwoj eo an Kijoone eo an Irooj āinwōt juon m̧ōn̄ā in ajej. Rekar kam̧ool im kanaan, im Anij ekar kōjeraam̧m̧an er kōn kajoor. Ro otemjej rekar bōk mennin letok kwojarjar eo innām rekar diwōjļo̧k n̄an kalōk aelōn̄ in kiin̄ eo an Anij jān kwaļo̧k gospel eo em̧ōj an jepļaaktok. Mekarta jum̧ae, rekar lo kōjparok ilo ito itak ko aer, kōļapļo̧k ilo kwaļo̧k eo aer, im kōjeraam̧m̧an ilo baam̧le ko aer.
Ilo Kirtland, em̧m̧aan wōt rekar bōk koņaer ilo kweilo̧k aiintok doon eo eaorōk ijo rekar bōk mennin letok kwojarjar eo kōn kajoor jān ijo eutiej. Ijoke, ilo jejjo iiō ko, Armej ro Rekwojarjar rekar kalōk Nauvoo Temple. Innām Josep Smith ekar kwaļo̧k kōļapļo̧k kōjeraam̧m̧an ko tampeļ me rej kiiō pedped in en̄jake ko ad ilo tampeļ rainin. Ilo Nauvoo, kōrā ro barāinwōt em̧m̧aan ro rekar bōk mennin letok kwojarjar eo kōn kajoor.
Kōnono n̄an sister ro ilo Doulul eo an Kōrā ro, Josep Smith ekar kallim̧ur bwe ilo mennin letok kwojarjar eo “kii ko an aelōn̄ in kiin̄ eo” naaj maron̄ “leļo̧k n̄an er,” ejja āinwōt “barāinwōt n̄an Elders.” Men̄e enaaj enaaj bōk n̄oul iiō ko m̧okta jān an kōrā ro kūr āinwōt mijenede ro rej ito itak im kwaļo̧k, kōrā ro im jerbal eo aer ekar kōm̧m̧an n̄an kalōk aelōn̄ in kiin̄ an Anij ioon laļ in.
Mekart Charles Rich ekar rum̧wiji aje eo an Kirtland Temple, ekar jeļā bwe e im mijenede ro jet ro rekar rum̧wij in itaakļo̧k n̄an Kirtland renaaj en̄jake bōk mennin letok kwojarjar eo. Ālkin jon̄ak eo an pris in Israel ro etto (lale Exodus 29; 40), ekar kwaļkwōļ im ekkapit. Ekar kobatok ippān ro jet, jitlo̧k, jar, im m̧ōn̄ā ilo Kejota eo Āliktata an Irooj.
“Kōm̧ ar kanaan aolepān bon̄ōn̄ eo,” Charles ekar jeje. “Ekar kanaan bwe lo̧mo̧o̧r ekar jeje ioon aolep jipijuļ im makwoj” in ānbwinnin. “Ikar obrak kōn jetōb in kanaan, im ikar bōk mennin letok kwojarjar eo kōn kajoor eo jān ijo eutiej.”
Ekar joļo̧k jem̧ļo̧kin mour eo an—47 iiō ko—jerbal āinwōt juon rikaļoor an Jisōs Kraist, kalōk aelōn̄ in kiin̄ an Anij.
Jān tōre ņe, Armej ro Rekwojarjar ilo Raan Ko Āliktata ipeļaakin laļ in rekar etal n̄an m̧weo im̧ōn Irooj bwe ren maron̄ bōk mennin letok kwojarjar eo kōn kajoor jān ijo eutiej. Im āinwōt Armej ro Rekwojarjar etto, mennin letok kwojarjar eo ej kōpooje kōj n̄an kalōk aelōn̄ in kiin̄ an Anij āinwōt rijilōk ro an Jisōs Kraist im juon raan bōk mour ijo eutiejtata kōn tūriam̧o̧ eo An im jouj.