Muria na Parofita

Rauta na 600 B.K., ni oti na nona vakarusai Jerusalemi o Nepukanesa, na tui Papiloni, a vakatarai e dua na ilawalawa lailai mai na yavusa i Juta mera tikoga ena vanua, nira kau vakavesu na kena vo ki Papiloni. Maliwai ira era tiko kina oya o Jeremaia na parofita kei Joenani, na luvei Karea, e dua na iliuliu ni mataivalu.

Oqo e dua na gauna dredre ka drakidrakita vei ira na ivovo ni Juta oqo era mai kunei ira tu ena kedrau maliwa e rua na matanitu kaukauwa ka rau sa vakarau me rau vala ena ivalu. Era a sotava na tamata e dua na vakatulewa bibi: mera na tiko beka ga e Jerusalemi, se, me vaka e levu era vinakata, mera lako i Ijipita mera laki bula kina? Ni ra vakasaqara na veidusimaki, era a vuki vei Jeremaia ko Joenani kei ira na tamata ka kerei koya me taroga vua na Turaga ena vukudra, ka kaya, “Me vakatakila vei keimami ko Jiova na nomu Kalou na sala me keimami lako kina, kei na ka me keimami cakava” (Jeremaia 42).

A vakadonuya o Jeremaia, ka kaya, “Au na vakamasuti Jiova na nomudou Kalou me vaka na nomudou vosa; ia ka’u na tukuna yani vei kemudou na ka kecega ena kaya mai ko Jiova vei kemudou; au na sega ni vunia e dua na ka maivei kemudou.” Era yalataka na tamata, “Me qai vakayacora vei keimami ko Jiova na lewa dina ka dodonu, kevaka keimami sa sega ni cakava na ka kecega ena talai iko kina vei keimami ko Jiova na nomu Kalou. Se vinaka, se ca ga, keimami na vakarorogo ki na vosa i Jiova na noda Kalou.”

A vakasaqara o Jeremaia na ivakasala ni Turaga, ka ra yalataka o Joenani kei ira na tamata ni ra na talairawarawa ki na veika kecega sa vakatakila mai na Turaga. Ni oti e tini na siga, a ciqoma o Jeremaia na vosa ni Turaga. A vakasoqoni ira vata na tamata ka solia na itukutuku: “Sa kaya vakaoqo ko Jiova … Kevaka dou na tiko dina ga ena vanua oqo, au na qai tarai kemudou cake, ka sega ni talaraki kemudou sobu, au na tei kemudou, ka sega ni cavuti kemudou cake. … Dou kakua ni rerevaki tui Papiloni, ko koya dou sa rerevaka tiko; … ni’u sa tiko vata kei kemudou me’u vakabulai kemudou, io me’u kaliraki kemudou mai na ligana. … Dou kakua ni lako ki Ijipita: dou kila deivaki ni’u sa tukuna sara vei kemudou edaidai” (Jeremaia 42–43).

Era a ciqoma vakacava na tamata na ivakasala oqo mai vua na Turaga mai vua na Nona parofita? E ka ni rarawa, ni ra sa vakatulewataka oti tu e lomadra. Era a vakasaqara na veivakadeitaki ka sega ni veidusimaki dina. Era a beitaki Jeremaia ni lasu o Asaraia, Joenani, kei ira na so tale na iliuliu dokadoka, nira kaya, “E lasu na ka ko sa vosataka: sa sega ni talai iko ko Jiova na noda Kalou me kaya, Dou kakua ni lako yani ki Ijipita me tiko vulagi kikea.” Ni ra sega ni kauwaitaka na ivakasala ni Turaga, a talaidredre o Joenani, na turaganivalu, kei ira na tamata ka lako ki Ijipita. Me vaka a parofisaitaki, era a vakarusai ni sa vakadrukai Ijipita o Papiloni (Jeremaia 43).

Eda na taura vakacava na nodra vosa na parofita bula? A rogoca na Turaga na nodra masu na ivovo ni Juta oqo ka sauma mai vua na Nona parofita. Nikua, e tomana tikoga o Koya na nona vosa mai vei ira na parofita bula kei ira era kacivi mera veiliutaki. A vakaraitaka na Turaga, “se mai na domoqu ga se mai na domodra na noqu tamata e sa tautauvata ga.” ka yalataka ni “ka kecega era sa tukuna ena veivakauqeti ni Yalo Tabu sa ivolanikalou, sa loma ni Turaga, sa nanuma ni Turaga, sa vosa ni Turaga, sa domo ni Turaga, ka sa kaukauwa ni Kalou me ia kina na veivakabulai.” (Vunau kei na Veiyalayalati 1, 68).

Nikua, eda sa vakavolivoliti tu ena domo e sega ni wiliki rawa, era vakaraitaka yadua na nodra dui dina kei na ivakavuvuli. Me vakataki Korio ena iVola i Momani, e vuqa vei ira na domo oqo era kaya ni sega na Karisito, ni sega ni dua e kila rawa na veisiga ni mataka, ni da sega ni rawa ni vakabauta na veika eda sega ni raica rawa, ka ni tamata yadua ena tiko sautu me vaka na nona vuku ga kei na nona qaqa me vaka na nona kaukauwa ga (raica na Alama 30). Ni da muria na domo vakaoqori ena vagolei keda tani. Ia, o ira era kaukauwa tu vakayalo ka muria na veivakauqeti ni Yalo Tabu era na sega ni vakacalai. Ia e dua na ka rerevaki levu cake ena rawa ni yaco mai ena noda ciqomi ira na vakasama oqo, ka na rawa ni vakavuna me da tu ga ka vakawelewele ena noda bula vakatisaipeli.

Ena Lotu Vakalesuimai ni Turaga, eda sa kalougata ni sa tiko vei keda na veidusimaki ni dua na parofita bula, o Peresitedi Russell M. Nelson. Vakasamataka mada na nona ivakasala veivakauqeti: me ka e rekitaki na Siga ni Vakacecegu, me qaqa duadua ga na Kalou ena nomu bula, “Mo Rogoci Koya,” vakasama vakasilesitieli, cakava na cakacaka vakayalo mo ciqoma na ivakatakila yadua, ciqoma na kaukauwa ni igu vakayalo, vakayagataka na yaca donu ni Lotu, vulica na iVola i Momani, mo dua na dautataro, kei na vakayagataka e levu cake na gauna ena sokalou e valetabu.

A vakavulica o Peresitedi James E. Faust, “Sa yalataki vei keda ni na ciqoma na Peresitedi ni Lotu na veidusimaki me baleti keda kece vaka-dauvakatakila me baleta na Lotu. Na noda taqomaki e koto ena noda rogoca na veika e tukuna ka muria na nona ivakasala.” Meda sa qai muria kece na parofita ka ciqoma na veivakalougatataki mai lomalagi.