O Cei e Vakasinaita na Tobu?

Droinitaka o David Miles

Ni oti na neirau calata e dua na basi mai Nairobi, Kenya, keirau sa mani nanuma kei noqu itokani me keirau wasea na kosipeli vei ira kece keirau raica ni keirau waraka tiko e dua tale na basi ki na neirau vanua ni veiqaravi. Keirau a veivosaki kei na sivia ni 400 na tamata.

E dua vei ira o Benard, ka cakacaka voleka toka ga ena taravale. Keirau solia vua e dua na iVola i Momani ka bolei koya me wilika ka taroga na Kalou kevaka e dina.

Ni oti e va na vula, au sa toki i Nairobi. Ena imatai ni noqu soqoni ni sakaramede e kea, au a raici Benard. Me tekivu mai na gauna o ya sa papitaiso ka tabaki ki na Matabete i Eroni.

A sureti keirau ena marau o Benard me keirau sikova na nona vale ka vakavulici watina, o Megan. Ni keirau sota kei Megan, keirau kurabuitaka na nona vakabauta cecere. Ni masu me kila se dina na neirau itukutuku, a sauma na Kalou na nona masu.

Keirau sureti Megan me papitaiso ena Sigatabu ka tarava. Ia, ena macawa oya, a kacivaki ena siti o Nairobi ni na sogo na wai me 10 na siga! Ni oti na veivakatarogi ni papitaiso nei Megan ena Vakarauwai, keirau a masu kei noqu itokani me rawa ni yaco nona papitaiso ena siga ka tarava.

Keitou lolo, veivakasalataki vata kei ira na neitou iliuliu, ka tovolea na sala duidui eso me keitou rawata na wai—ka sega ni yaga. Ena yakavi oya keirau a vakavakarau ga ki na papitaiso. Keirau qai tekiduru ka masu tale. Keirau a vakauqeti me keirau cobara e dua na mua ni osipaipo ki na paipo e valenikuro ni valenilotu sa maca tu na kena wai ka biuta na muana kadua ki na tobu ni papitaiso. Keirau masu tale, lokata, ka biubiu ki vale.

Ena mataka ka tarava ni keirau gole ki na valenilotu, keirau kurabui ni sa sinai tu ena wai na tobu! Keirau raica na paipo ni valenikuro, se sega tikoga ni basika mai na wai. E sega ni dua ena tabana e kila se a tawa vakacava na tobu.

A papitaiso o Megan ena siga oya. Era lako mai na tabanalevu taucoko me ra vakadinadinataka na nona papitaiso ka kidavaki koya ki na Lotu. E mamaca tu ga na paipo, ia e suasua na matadra kece sara ena vakavinavinaka.

E vakavulica o Peresitedi Russell M. Nelson, “Ena vakalougatataki iko na Turaga ena cakamana kevaka o vakabauti Koya, ‘sega ni vakatitiqataka e dua na ka’ [Momani 9:21]. Cakava na cakacaka vakayalo mo qara kina na cakacaka mana.” Au kila oqori baleta ni keirau a cakava kei noqu itokani na cakacaka vakayago ka vakayalo—masu, tovolea na digidigi duidui eso, ka muria na veivakauqeti vakayalo—keirau a raica e dua na cakamana mai vua na Turaga.