Sala ni VeitarataraVakalou

Me kilai ni vosa na Kalou e gadrevi kina na vakabauta kei na veivakabauti. Na vakabauta e dau vakaiyaqataki tu ga vei Jisu Karisito. Eda na gadreva talega me da vakararavi Vua. Sa tukuna oti o Koya:

Io, raica, au na tukuna ki na nomu vakasama kei na vu ni yalomu, ena Yalo Tabu, ka na qai lako mai vei iko ia ka na tiko sara ena lomamu.

“Ia oqo, raica, sai koya oqo na yalo ni ivakatakila” (Vunau kei na Veiyalayalati 8:2–3).

Ia na ivakatakila kei na veidusimaki vakalou e sega ni yaco mai ena kena waraki walega e dua na ivakaraitaki vakayalo. Sa dodonu me da cakacaka. Me vaka ga a tukuna vei au o watiqu meu cakava ena noqu vosa ni koniferedi, ena so na gauna e gadrevi me da “tekivu.”

Ni keirau veiqaravi vaka-iliuliu ni kaulotu kei Isabelle ena Tabana ni Kaulotu na France Lyon, au gadreva meu vakatulewataka na vanua me ra lako kina na daukaulotu yadua ena loma ni kaulotu kei na gauna me ia kina na veilesi. Au raica ni na tuberi au na Yalotabu kevaka au masuta na veivuke ka qai vakayagataka na noqu vakatulewa vinaka duadua. Ena qai yaco mai na veivakadeitaki ni sa tu na veika kece.

Ena noqu veikacivi ena gauna oqo, au sa talai ki na iteki taucoko ni Lotu meu tauyavutaka tale na mataveiliutaki ni iteki. Ni keirau vakataroga eso na tamata kei na noqu itokani, e votu mai na vakasama, na vakanananu, kei na veika keirau vakila. Keirau qai veitalanoa ka masu vata. Sa qai dau yaco mai na ivakatakila, ka vakadeitaka vei keirau na Turaga o koya sa kacivi me veiqaravi.

Sa dua na iwalewale me ciqomi ni sa vosa mai na Kalou ka kilai na Lomana. E dodonu meda vakaraitaka nida sa tu vakarau meda cakacaka ena vakabauta kei na veivakabauti.

E dua na sala bibi e vosa kina na Kalou vei ira na Luvena o ya mai vei ira na parofita. Ni tiko e dua na parofita e vuravura nikua sa dua na itukutuku cecere! E ciqoma na ivakatakila mai vua na Kalou me liutaka ka dusimaka na Lotu (raica na Emosi 3:7). Eda rawa talega ni ciqoma na veidusimaki kei na veitaqomaki ena noda muria na nona ivakavuvuli. E sega ni dau rawarawa oqo, ia sa dusimaki keda na Turaga meda muria na parofita “ena vosota kei na vakabauta kecega” (Vunau kei na Veiyalayalati 21:5).

“Na Matavuvale: Ai Vakaro ki Vuravura Raraba,” me kena ivakaraitaki, sa vakadinadinataki na parofisai me tekivu mai na gauna a vakatakilai kina ena 30 na yabaki sa oti. E vakamacalataka e vuqa na kauwai eda sega ni kila ni na yaco vei keda ka solia na veidusimaki eda sega ni kila ni da gadreva—ia eda sa qai kila tiko mai oqo. Na veidusimaki ni parofita ena sega beka ni dau vaka tu ga na ka eda via rogoca. Ena sega beka ni salavata kei na veika e ciqomi raraba tu ena gauna oqo. Se cava ga, eda na tuberi ka taqomaki ena noda muria na parofita.

Taroga na Taro ka Vakasamataka Vakatitobu na Kena iSau

Ena gauna taumada ni Veivakalesui mai, a dau vosa wasoma na Kalou me isau ni taro dina a sotava na Parofita o Josefa Simici kei ira tale eso. Ni rau cakacaka tiko o Josefa kei Oliva Kaudari ena vakadewataki ni iVola i Momani, rau yacova mai na ivakavuvuli ni iVakabula me baleta na ivunau ni papitaiso (raica na 3 Nifai 11:23–33). Erau gadreva me rau vulica e levu tale na ka ka lako ki veikau me rau masu. Sega ni dede, a rairai mai o Joni na Dauveipapitaisotaki ka vakalesuya mai na lewa me ia na papitaiso ena tabadromuci me bokoci kina na ivalavala ca.

Dua tale na gauna, a vakaraitaka kina o Ema na wati Josefa, na kauwai me baleta na nodra dau vakadukaduka na turaga era dau vakatavako paipo ka mama tavako ena gauna ni bose. A kauta o Josefa na ka oqo vua na Turaga ka ciqoma e dua na ivakatakila—“e dua na Vosa ni Vuku” (Vunau kei na Veiyalayalati 89:1)—ena ivakarau bulabula me yaga vakayago ka vakayalo vei ira na luve ni Kalou.

Na veigauna oqo—kei na vuqa tale—e vakananuma vei keda ni sega ni dua na leqa ni vakatataro ia me da vakasaqara na kena isau ena sala dodonu. Kevaka eda kauta na noda taro vua na Turaga, eda na kunea na kena isau. Ena so na gauna ena yaco mai na kena isau ena dua ga na gauna. Ia, e vakavuqa, na kena isau e yaco mai ena “vosa ena vosa, na ivakavuvuli ena ivakavuvuli, vakalailai eke ka vakalailai e kea” (2 Nifai 28:30). Eda na rairai waraka beka na isau ni taro me vukei keda meda vuli ka tubu cake, ia na Kalou ena sauma mai vei keda me vaka na Nona lewa, sala, kei na gauna.

Ni sa dodonu meda waraka me vosa vei keda na Kalou, sa ka bibi meda taura matua na veika eda sa kila kei na veika eda sa sotava. Ena rawa ni yali kevaka e sega. Eda sega ni vinakata me da vakatitiqataka na veika eda sa sotava oti vata kei na Yalotabu baleta walega ni da sa sotava tiko na dredre ena gauna oqo. Ena gauna oqori, e dodonu meda lesu tale ki na noda vakasama ka nanuma na veika eda vakila ni da voleka vua na Kalou.

A taroga ena dua na gauna o Alama na taro vei ira na tamata mai Saraemala:

“Ko ni sa sucu li vakayalo vua na Kalou? Ko ni sa ucui koya tiko li ena kemu irairai? Ko ni sa vakila li na veisau levu oqo e lomamuni? …

“Ia oqo raica, au sa kaya vei kemuni, na wekaqu, kevaka ko ni sa sotava oti na veisau ni lomamuni, ka ko ni sa nanuma mo ni lagata na sere ni veisereki loloma, au na taroga, e rawa mo ni sa vakila ena gauna oqo?” (Alama 5:14, 26).

E dodonu meda vakadeitaka ni da nanuma tiko na veika vakayalo eda sotava ka kakua ni vakatikitikitaka. E dodonu meda dau tarogi keda vakawasoma, “E rawa beka niu vakila ena gauna oqo?” Oqo ena vaqaqacotaki keda ena gauna e vaka me galu kina na Kalou. Eda na rawa talega ni kila na gauna e vosa kina vei keda o Koya.

Na veitaratara kei na Tamada Vakalomalagi e ka bula. Eda cakava na noda itavi meda vakabula tiko ga ena noda vakasaqara ka tauyavutaka na madigi ni veitaratara vakalou. E rawa ni da masuta vakawasoma na Kalou me baleta na vakacegu, veituberi, kei na veidusimaki. E rawa ni da vulica na Nona vosa ena ivolanikalou ka vakila na veivakayarayarataki ni Yalotabu. E rawa talega ni da muria na veidusimaki vakaparofita.

Ni da veisemati tikoga kei na Tamada Vakalomalagi dauloloma, sa rawa meda iyaya ni cakacaka ena Ligana me da vukei Koya ena Nona cakacaka veivakurabuitaki. Ni da muria na rai kei na veivakauqeti eda ciqoma, eda na rawa ni vukei ira na tani me ra vakila ni kilai ira ka lomani ira na Kalou ka gadreva me vosa vei ira.

Na veivakadeitaki ni Kalou e rogoci ira ka vosa vei ira na Luvena sa dua na veivakalougatataki levu. Na veitaratara vakalou kei Koya e vakarautaka na veidusimaki eda gadreva meda lakova kina na ilakolako ni bula.