Au sa Vinaka Li?

Ena vica na yabaki, erau sega ni kila na noqu itubutubu na vanua au tiko kina. Erau tamata vinaka ka rau tovolea me rau solia vei au na vuli vinaka duadua kau ciqoma ni rau sega ni taleitaka na noqu digidigi. Ni sa tauvimate o tamaqu, a vakauqeti au o tinaqu meu lesu i Washington, D.C. Niu yaco yani, a kunea vei au o Jone e dua na cakacaka ena dua na matacakacaka ka tara tiko na Valetabu e Washington D.C.

Au sega ni kila, ia a vakarautaka meu cakacaka vata kei na dua na matacakacaka era lesu mai ena kaulotu. Au kurabui ni o John Howell, na iliuliu ni cakacaka, ena kerea e dua na lewe ni ilawalawa me masu ena itekivu ni cakacaka ni veisiga yadua—e dua na ka au se bera vakadua ni raica vei ira na ilawalawa au sa cakacaka vata e liu.

Dua na siga ni cakacaka, keitou lewe vica a tovolea tiko me keitou vakadabera e dua na katuba bibi ni valetabu ena gauna e lutu kina ka vakasababataka na iqaqalo ni ligaqu me mamare vaka e dua na sede. A vakatotolo mai o Jone, raica na iqaqalo ni ligaqu, kerea na waiwai vakatabui, ka solia vei au e dua na veivakalougatataki. A totolo sara na mamaca ni iqaqalo ni ligaqu ka sega ni gadrevi meu raici vuniwai.

Ena dua tale na gauna, a soli vei au e dua na batinitoro ka tukuni meu karia laivi na duka era kabi tu ena vuloa simede.

“Baleta?” Au a tarogi koya e dua na neitou ilawalawa. “Ena sega beka ni biu na ibe vavaku?”

“Randy, o sega beka ni kila na vale nei cei oqo?” a sauma mai. “Eda sa vakavinakataka tiko me baleti Koya sa Vinaka sara.”

Ni lutudromu tu ko vuravura ena tawa veivakabauti, na yaloca, na veicacati, kei na nuiqawaqawa, a vakasinaiti au ena inuinui na nodra ivakaraitaki kei na ivakavuvuli na itabagone au cakacaka vata. Ni ra wasea vei au na nodra vakabauta na lewe ni ilawalawa, au kila ni ra dina. Era solia e rua na yabaki ni nodra bula me ra qaravi ira na tani, ka ra sa yalodei sara ga. Au vinakata me dina na nodra ivakavuvuli. Au vakila niu sa rawata tiko na veivakararamataki au a vakasaqara tiko ka sa vakarautaki au tiko vakayalo na Turaga.

E vakatura o John Howell meu sotavi rau na daukaulotu tudei. Ia, au digitaka me vakavulici au o taciqu kei na dua vei ira na nona itokani, e dua tale na daukaulotu sa lesu mai. Ni rau vakavulici au, au vinakata na ivakadinadina, e laurai ka sega ni vakatitiqataki rawa ni dina na ka au vulica tiko. Kevaka e sega na ivakadinadina o ya, au sega ni vinakata e dua tale na lesoni.

Niu taroga se ra kila vakacava na dina, era sauma, “Keimami sa wilika ka masu ka vakila e dua na ivakadinadina mai vua na Yalo Tabu.” Erau tukuna vei au niu gadreva na ivakadinadina vata oya.

Ena bogi oya au a lako ki na dua na veikau volekata na noqu itikotiko. Au sega ni kila se vakacava na dede ni noqu masu, ia au a kitaka ena inaki taucoko. Au dau taroga na Kalou vakawasoma ena va na taro vata oqo: “E vosa beka ni Kalou na iVola i Momani? Drau a rairai beka vata kei na Luvemu vei Josefa Simici? Oqo beka na Lotu dina i Jisu Karisito? Sa rauti au beka meu lewenilotu?“

Na isau ni taro yadua e yaco mai ena vakasolokakana ki yaloqu—“Io”—vaka va. Na vakasolokakana oqori e salavata kei na yalo malumu ka cecere.

Ni cuva na uluqu, tekiduru ena masu ka suasua ena wainimata, au a kaya: “Kevaka oqo na kena isau ko ni na solia vei au, au na qai ciqoma ka solia taucoko na noqu bula vei Kemuni kei na kosipeli oqo me vaka ko ni sa vakatakila vei au.” Na vosa e sega ni rawa ni vakamacalataka na vakasama, veika au vakila, kei na dina e kovuti au.

Na ivakadinadina au a ciqoma ena bogi o ya e sega ni vakatitiqataki rawa, ka sa kaukauwa sara ena gauna oqo me vaka ena gauna o ya. Me tekivu mai na masu oya, sa vakadinadinataka na Kalou na isau ni taro oqori vei au ena udolu na sala veivakurabuitaki ka yaga.

Ni oti ga vakalailai na noqu papitaiso ena 1974, au a tiko ena imatai ni noqu koniferedi raraba mai Salt Lake City vata kei taciqu, o Jone. Au kurabui ni a cavuti keirau kei na taciqu o Jone ena nona vosa ena mataka ni Sigatabu o Elder Boyd K. Packer (1924–2015) ena Kuoramu ni iApositolo Le Tinikaruao, erau a sota kei noqu nei mai Niu Ioka ena tolu na macawa ni bera na koniferedi oya.

Ni cavuta nona vosa noqu nei, a kaya kina o Elder Packer: “E rua na vugoqu erau sa lewena na nomu Lotu. Au sega ni vakabauta rawa na veisau e yaco ena nodrau bula.”

Ena vuku ni veisau bibi oya (raica na Alama 5:14), a kama e lomaqu kau vinakata meu wasea. Sega ni dede, au sa mai tiko e Idaho niu sa dua na daukaulotu tudei. Ena veimama ni noqu kaulotu, a takali yani o tamaqu, ka noqu qaqa cecere duadua ka itokani vinaka duadua. A qiriti noqu peresitedi ni kaulotu o tinaqu ka kerea meu lesu mai vale meu mai cavuta e dua na vosa ni vakacaucau. Ni sa biuta vei au na noqu peresitedi ni kaulotu na vakatulewa meu biubiu, au tukuna vua niu vinakata meu masu ka lolo me 24 na auwa ni bera niu vakatulewa.

Ena bogi oya, au a tadra. A rairai vei au o tamaqu. Ena loma ni veivosaki cecere ka vakaibalebale vata kei koya, a kaya vei au, “Luvequ, mo tiko ga ena nomu kaulotu.”

Au a muria na ivakasala nei Ta ka tiko ga.

Ni oti e ono na vula mai na noqu kaulotu, au a taura na ligai tinaqu ni sa solia tiko na iotioti ni nona icegu. Ni oti e vica vata na yabaki, a kunea o Lisa na watiqu e dua na ivola mai vei rau na noqu itubutubu ena dua na kato makawa. A vola vei au o Ta ena gauna ni noqu kaulotu ia a mate ni bera ni vakauta.

“Na yaloi keirau sa dau tu ga ka na dau tu ga ka na sinai tu ena lomani iko. Au kila ni veika e sega ni dau vinaka sara, ia oqori na bula. … A sega ni kaya na Karisito, ‘Muri au ka na rawarawa.’ A kaya, ‘Mo colata na nomu kauveilatai, ka muri au’ [Maciu 16:24]. A colata na kauveilatai, ia e dui tu na noda veitikina. De na vakatau beka na noda itikotiko mai lomalagi ena ivakarau eda qarava kina na noda. Luvequ keirau lomani iko vakalevu.

Au dau voravora vei rau na noqu itubutubu niu tubu cake tiko, ia au sega ni vakatitiqataka na nodrau loloma. Me tekivu mai na gauna au kunea kina na Lotu, au sa cakacaka vakaukauwa meu vakavinavinakataki rau ka rokovi rau.

Ena ika 17 ni Feperueri, 2018, ni vo e rua na macawa me sogo na Valetabu e Washington D.C. me vakavoui, au a vauci vei tamaqu kei tinaqu, ni oti e 42 na yabaki mai na nodrau lako sivita na ilati ki na tawamudu. A sosomitaki tamaqu na luvequ tagane qase duadua o William, ka sosomitaki tinaqu o Lisa. Au vakila ni rau a tiko ruarua e kea vakayalo na noqu itubutubu, ka rau a vauci taumada.

Eda na kunea ena valetabu na dali ka na vauci keda me tawamudu vei ira na noda daulomani. Au sa vakadeitaka oqori.

Niu se gone, au sega ni vinakata meu vakamau se vakaluveni. Ia nikua sa noqu iyau cecere duadua o watiqu, luvequ, kei ira na makubuqu. Na Lotu e dua na cakamana, ka sa dau yaco na mana ena noqu bula ena Lotu. Au kaya vata kei Josefa Simici, “Kevaka au a sega ni sotava na veika au a sotava, au na sega tale beka ga ni vakabauta.”

Ena limasagavulu na yabaki sa oti, au a dua na daucakacaka ni taravale ena Valetabu e Washington D.C. Au vakadeitaka ni na sega na marau ena noqu bula ena veisiga ni mataka. Nikua au sa dua na liganicakacaka vakalotu ena valetabu vata o ya, niu sa ciqoma na veisureti ni Turaga meu muri Koya, ciqoma na Nona veivakabulai, ciqoma na Nona cakacaka vakalotu, ka segata mo yaco me vakataki Koya.

iTaba mai vei Leslie Nilsson

Na Lotu vakalesui mai e sega ni vakasama, e dua na filosofi, se dua ga na itikotiko se itovo vakavanua. Oqo na Lotu dina ni noda Turaga ka iVakabula o Jisu Karisito.

Au nanuma niu na kunea na ka au vaqara tiko e San Francisco. E sega. Au kunea ena Lotu i Jisu Karisito ni Yalododonu Edaidai kei na vale ni Turaga, “na isala vakatui vatutalei ni Veivakalesui mai.”