Ena Vukei Keda Vakacava na Noda Veiyalayalati Meda Vakayagataka na Kaukauwa ni Kalou?

iTaba mai vei Connor Johnson

Sa tu vei keda yadua na madigi meda cakava na veiyalayalati tabu vata kei na Kalou ni lomalagi. Era dau cakava na veiyalayalati oqo na lewenilotu ni ra sa ciqoma na cakacaka vakalotu ni matabete. Ia, ni da maroroya na veiyalayalati oqo, ena vakalougatataki keda o Koya ena Nona kaukauwa.

Nanuma lesu vata kei au na veidusimaki vakaparofita nei Peresitedi Russell M. Nelson me baleta na sala me rawati kina na kaukauwa mai vua na Kalou: “Na tagane kei na yalewa yadua era vakaitavi ena cakacaka vakalotu ni matabete ka ra cakava ka maroroya na veiyalayalati vata kei na Kalou sa rawa ni ra rawata vakadodonu na kaukauwa ni Kalou.” Na rawa-ka vakadodonu oqo ki na kaukauwa ni Kalou sa isolisoli ni Nona wasea ena lomasoli vei ira na Luvena.

Na cava na irairai ni kaukauwa oqo, ka drodro mai na maroroi ni veiyalayalati eda cakava mai na cakacaka vakalotu ni matabete, ena nomu bula nikua? E vakayagataka vakacava e dua na marama ni veiyalayalati na kaukauwa vakalou oqo?

Au nuitaka ni na vukei iko e dua na ivakaraitaki yadua ni ko cakava na cakacaka vakabulabulataki vakayalo mo vulica vakataki iko na ibalebale ni noda vakalougatataki ena kaukauwa ni Kalou.

Dua na siga au a ciqoma e dua na itukutuku ena tex mai vei vugoqu o Amy: “Masulaki Dottie.”

A sega ni moce na makubuqu yalewa o Dottie ena bogi yani i liu. A yadra tiko o Amy ena bogi taucoko ka kaya ni katakata o Dottie. A solia vua o Amy eso na wainimate, ia e se katakata tiko ga o Dottie ka masa. E lako tu vakacakacaka na luvequ o Connor ka na sega ni lesu mai me yacova ni oti e rua na siga.

Ni sa yaco mai na mataka, a raica o Amy na tebenigusui Dottie ni sa karakarawa mai. E karakarawa talega vakakina na ligana ka batabata ni da tara. A vakauqeti o Amy, “Kauti Dottie vei ira na vuniwai ni gone.” A muria na veivakauqeti oya, qirita na vuniwai ni gone, ka vakadeitaki ni na vakacurumi o Dottie.

E kalougata, ni valenivolavola ni vuniwai ni gone e tiko ena tai kadua ni gaunisala mai na vale nei tinaqu. A vakauqeti o Amy me draiva ki na vale nei tinaqu. A cakacaka tiko o tinaqu ena nona lomanibai ka marautaka me raici ganei Dottie yabaki va o Goldie, ka kauti Dottie o Amy vei ira na vuniwai ni gone. Oqo na isau ni nona kauwai o Amy ena nona gadreva me vakatawani tiko o Goldie ka tiko vata kei Dottie ena gauna vata ga.

E raica na vuniwai ni tauvi niumonia o Dottie, e rairai mai na nona ceruma eso na wai ni sili ena vica na siga yani ki liu. A qaravi o Dottie ena vuanikau ka roqoti koya toka o tinana ena vo ni siga oya, me vakamatari toka na uluna me tadola na sala ni cagi ka rawarawa kina ni cegu.

Au a solia meu kauta mai eso na vakayakavi niu lesu tiko i vale. A vakadonuya o Amy, kau vakavinavinakataka. Au vakataroga se rawata vakacava o Amy ni sega ni moce, na lomaocaoca ni tauvimate e dua na gonelailai, ka gadrevi me qaravi o Goldie.

Au curu yani ki nodratou vale kei na taga kakana buta ka kunea ni ratou sa vakacegu toka o Amy kei rau na goneyalewa. E cariba toka na ikalawa nei Amy ka serau na matana. E vakacegu, ni vakarau sara mada ga me sotava e dua na bogi duadua kei Dottie ka tauvimate tiko. E sega ni rere o Koya. E dei na yalona. Oqo e dua na vakacegu ka sega ni kila rawa na vakasama. Au vinakata ga meu dabe ena gauna oqo ka vakananuma.

E saga o Amy me maroroya na nona veiyalayalati kei na Kalou ka vakalougatataki ena Nona kaukauwa veivaqaqacotaki. A vakauqeti koya na Yalotabu me cakava na ka e cakava me qaravi Dottie. Ka sa vakalevutaka cake na kaukauwa ni Turaga na nona rawa ka me sotava na gagadre ni nona matavuvale ena vosota kei na loloma kei na veivakadeitaki malumu ni na vinaka na veika kece.

Oqo na veivakalougatataki ni kaukauwa ni Kalou, ka rawa ni da rawata mai na veiyalayalati tabu kei na nona isoro ni veivakaduavatataki na iVakabula. Na kaukauwa oqo ena veisautaki keda, vaqaqacotaki keda, vakayalovinakataki keda, solia vei keda na yalodei, kauta mai vei keda na vakacegu, ka vakalevutaka na noda rawa ni vakayacora na noda itavi lesi vakalou vakayalewa.