Semati Tikoga vua na iVakabula

Droinitaka o David Miles

Ena dua na vulaikatakata a lako na noqu matavuvale ena dua na gade ki na ceva kei Jaina, ka keitou vodo tolili kina ni veivanua kecega (ATV) ena dua na veikau. Ni keitou yaco yani ki na keba ni ATV, keitou kurabui ni ra solia vei keitou na idusidusi na sutu ni veitaqomaki ena isala vakaitamera kei na matailoilo. E vaka me sa rui sivia vei keimami na se qai tekivu ena dua na siga katakata, suasua, ia keitou a mani dara ga.

Ni keitou ciqoma oti na ivakasala ni vodo, keitou sa biubiu yani ka yaco ki na ulunivanua ni neitou ilakolako. Keitou cegu mai kea me keitou gunu wai ka tavoya na buno mai matai keitou.

Qai vakamacalataka na neitou dauveituberi ni na dredre cake na lako sobu. Keitou na gadreva me keitou veivolekati ka bulia e dua na sitimanivanua ATV, me tara na tolili e liu kei koya e muri dei kina na ilawalawa.

Ni keimami sa tekivu siro sobu, keimami sa veikacivi vakataki keimami me keimami veikilaitaka na neimami siro. Sa tekivu me keimami tawase vakamalua, ka biuta tu e dua na maliwa mai na noqu tolili kei na ATV ka vodoka tiko o tamaqu kei ganequ, o Vivi. Vakasauri ga erau sa viritaki tani mai na nodrau tolili o Vivi kei tamaqu! A rika sara ga o tamaqu e dela i Vivi me taqomaki koya mai na ATV de bikai koya yani.

Keirau vakacegu sara ga ni keirau raici tamaqu kei Vivi ni rau tucake ka taviraka tani na duka ni nodrau tarausese. Vinaka vakalevu na iyaya ni veitaqomaki erau daramaka tu, a mavoa vakalailai ga o tamaqu. A rere o Vivi ia a sega ni mavoa. Ni keimami sa duavata tale, a vakananuma vei keimami na dauveituberi ena domo kaukauwa ni dodonu me keimami veisemati tikoga ena neimami ATV kevaka keimami sega ni vinakata me keimami qiqi sobu mai delana.

Ena bula oqo eda dau temaki ena so na gauna meda nanuma ni rawa ni da cakava ga vakataki keda na ka. Eda vakabauta ni sega ni gadrevi me da dara na iyaragi ni veitaqomaki ni kosipeli, ka rawa ni da vakila ni logaloga ca. Sa vakakina, eda na raica ni dredre ena so na gauna meda semati tikoga vua na Tamada Vakalomalagi. Nida sega ni cakava qori, eda na muria ga vakataki keda na sala rerevaki kei na veivakacalai ni vuravura, ka rawa ni da sotava na vakacalaka vakayalo kei na mavoa.

Kevaka eda vakayagataka na veitaqomaki e solia na kosipeli ka semati tikoga vua na Tamada Vakalomalagi kei Jisu Karisito, eda na rawa ni sotava na bolebole e tu mai liu ena noda bula. Se vakacava sara na kena vakarerevaki se veivakayalolailaitaki na sala, eda na rawa ni qaqa vata kei Rau.