“E Rawa Beka niu Nuitaka Dina na Veidusimaki ni Parofita?,” Liaona, Maji 2025.
iTabagone Qase Cake
E Rawa Beka niu Nuitaka Dina na Veidusimaki ni Parofita?
Au a dau digitaka tu ga meu muria na parofita, ia e rawa beka niu nuitaki koya ena gauna oqo?
Droini mai vei Kylee Bodily
Niu sa ciqoma na veikacivi meu na tokitaki mai na noqu kaulotu, au a cudru ka veilecayaki.
Ni vo e vica na vula meu na vagalalataki, eratou sa nanuma na Mataveiliutaki Taumada me ratou talai au mai kei na vica tale na daukaulotu ki vale ka yavutaki ena ka au nanuma ni itukutuku ni dua ga na veisaqasaqa ni veimatanitu. E sega ni dua na ivakadinadina ni na yaco e dua na ka.
Au sega ni vakabauta ni tiko e dua na ka meu leqataka.
Veivakauqeti ni Vakatataro
Au a dau vinakata tu ga meu laki kaulotu ka sa cakacaka vakaukauwa sara meu rawata na takete o ya. E dredre na ilavo, ia au kunea e dua na cakacaka ka vukei au meu rawata na ilavo me saumi kina na noqu kaulotu. Niu dolava na noqu veikacivi, e vaka me dodonu, kau kila ni lako mai vua na Kalou.
Oti, ena vuku ni mate ni COVID-19, au a lesi tale ki na dua na kaulotu mai Utah me ciwa na vula ni bera niu qai lako ki vanua tani ki na noqu ilesilesi taumada. Au vakacegu ka marau vakalevu niu sa mai tiko ena vanua a kacivi au taumada kina na Kalou.
Ni oti ga e vica na vula na noqu tiko e kea, sa vakasauri na noqu kau tani mai vei ira na tamata kei na vanua au dau taleitaka. Au vakila ni vaka me sa kau tani mai vei au na veika kece.
Au vakila niu sa veidabuitaki. Au vakataroga vakaidina se oqo e dua na digidigi veivakauqeti.
Au vuka i Texas ena yalolailai. E sega ni namaki na noqu vakau lesu ka sega mada ga ni ratou mai waraki au ena rara ni waqavuka o tamaqu kei ira na taciqu me ra kidavaki au ki vale.
Na Veivakalougatataki ni Veitaqomaki
Ni oti ga e vica na siga mai na noqu biuta na noqu kaulotu, au kurabui ni a yaco mai e dua na veisaqasaqa rerevaki voleka na vanua au a veiqaravi tiko kina. Ena gauna oya, au qai kila ni muri koya na parofita a taqomaki au ena dua na sala dina. Au luvuci ena vakavinavinaka vua na parofita kei na nona veivakauqeti.
Au a yalataka vei au niu na dau vakarorogo tu ga ki na ka e tukuna na parofita, kevaka mada ga e sega ni vakaibalebale ena gauna o ya.
A kaya wale tikoga oqo o Elder Ulisses Soares ena Kuoramu ni iApositolo Le Tinikarua: “Na nodra tiko na parofita sa ivakatakilakila ni nona lomani ira na Luvena na Kalou. Era na vakatakila na yalayala kei na kedrau ituvaki dina na Kalou kei Jisu Karisito vei ira Nodrau tamata.”
Au vakabauta dina ni o Peresitedi Russell M. Nelson e Nona gusunivosa na Turaga. E cakacaka vakadodonu vata kei na Tamada Vakalomalagi kei na iVakabula me liutaki keda ki na veitaqomaki ka solia vei keda na inuinui kei na veidusimaki ena gauna ni bolebole.
Veivakalougatataki ni nodra Vakamuri na Parofita
Kevaka o se vakataroga tiko se kacivi na parofita mai vua na Kalou, na noqu ivakasala meu cakacakataka na nona veisureti. Tovolea mo wilika tale na vosa ni koniferedi se qai oti toka ga oqo nei Peresitedi Nelson ka vulica na ivolanikalou e vakatura. Cakacakataka na nona veisureti ka vulica na veivakalougatataki a yalataka vata kei na veisureti oqori.
E vakavulica talega o Elder Soares, “Ni da muri ira [na parofita], sa mamarau ka lailai na kena dredre na noda bula, ena rawarawa cake na noda vosota na dredre kei na leqa, ka da bulia e dua na iyaragi vakayalo e vakavolivoliti keda.“
Au sa raica na veivakalougatataki oqo ena noqu bula niu sa muria tiko na ivakasala ni parofita. Au kila ni veivakalougatataki oqo sa vakarautaki tu vei ira kece era vakararavi vua na Kalou kei na Nona parofita.