Sa Vinakata na Tamada Vakalomalagi me Vosa vei Iko

Vei Atama kei Ivi kei ira kece era na muri rau mai, a vakarota e dua na agilosi, “Mo veivutuni ka masuta tikoga na Kalou ena yaca ni Luvena me tawamudu” (Mosese 5:8).

E vakavuvulitaka ko Jisu, Dou kerekere ka na soli vei kemudou, vakasaqara ka dou na kunea; tukituki, ka na dolavi vei kemudou” (Maciu 7:7 “Ni ko sa masu, masu vua na Tamamu ena ka vuni” (Maciu 6:6). “O koya mo dou qai dau masu vakaoqo: Tamai keimami mai lomalagi, Me vakarokorokotaki na yacamuni” (Maciu 6:9).

Sa dau masu tiko ga vei Tamana ko Jisu. “Sa lako ko Koya ki na ulunivanua me masu, a sa masu tiko vua na Kalou e na bogi ka siga vaka” (Luke 6:12). “Ia sa lako ki na ulunivanua me laki masu” (Marika 6:46). “A ra sa lako ki na dua na vanua na yacana ko Kecisemani: a sa kaya vei iratou na nona tisaipeli, Dou dabe eke, niu sa masu tiko” (Marika 14:32). Ni tiko ena kauveilatai, a masulaki ira na sotia era vakoti Koya ki na kauveilatai o Jisu: “I Tamaqu, kakua ni cudruvi ira; ni ra sa sega ni kila na ka era sa kitaka” (Luke 23:34).

E vakasalataki keda na ivolanikalou meda “dau masu tikoga” (Luke 21:36; 2 Nifai 32:9; 3 Nifai 18:15; Vunau kei na Veiyalayalati 10:5; 19:38; 20:33; 31:12). A vakavulica talega o Alama, “Mo vakarorogotaka vua na Turaga na ka kecega ko kitaka, ia ena dusimaki iko ena veika vinaka ko koya” (Alama 37:37). Me kena ikuri, eda na “tabalaka tiko na vakavinavinaka kei na vakacaucau ena kena kaukauwa taucoko ka taukena tu na yaloda” (Mosaia 2:20), ka kila na veika kece e cakava vei keda na Tamada.

E vakamacalataka o Peresitedi Russell M. Nelson: “Na tudei vakayalo e tekivu ena kena kilai ni veimataka vou yadua e isolisoli mai vua na Kalou. … E mororoi keda e veisiga ka tokoni keda mai na dua na gauna ki na dua tale (raica na Mosaia 2:21).”.

E kaya ko Nifai, “Ia kevaka dou vakarorogo vua na Yalo o koya sa vakavulica vua na tamata me dau masu, dou na kila ni sa dodonu mo dou dau masu; ia na yalo ca, sa sega ni dau vakavulica na tamata me dau masu; sa vakavulica ga vua me kakua ni dau masu” (2 Nifai 32:8).

Matailalai mai na Karisito ni Vakabula na Luvei Jairo Goneyalewa, mai vei Greg K. Olsen.

Ena ivakaraitaki ni noda iVakabula kei na nodra ivakasala na agilosi kei na parofita ena veisenitiuri sa oti, eda sa kila vakamatata sara me da masu ena veisiga me da vakaraitaka kina na noda vakavinavinaka ena vuku ni noda veivakalougatataki, ka dau masu tikoga e yaloda. Sa noda itavi meda veitaratara kei na Tamada.

Ia e lagilagi cake sara, ni dau sauma na Tamada Vakalomalagi na noda masu. E dua na taro vakasamataki vinaka ena vuravura oqo sai koya, eda na ciqoma vakacava vakavinaka cake ka kila vakavinaka cake na isaunitaro, veidusimaki, kei na vakacegu e lako mai vua na Tamada?

Ena noqu bula sa sivia e vitu na yabakitini, au kila ni dau vosa vei keda na Tamada. Eda sega ni tiko duaduaga. Era sa wanonovi keda ka vukei keda na tamata vakalomalagi ni da segata meda muria na iVakabula.

Na ciqomi ni isau ni noda masu e tekivu ena noda vakabauta na Tamada Vakalomalagi kei na Luvena, o Jisu Karisito. E kaya ko Jisu, “Kakua ni yalolailai, vakadinata ga” (Marika 5:36). Eda vakararavi Vua, cakava na noda vinaka taucoko meda muria na ivakaro, ka vakasaqara na Ligana ena veika kecega. ”Sa sega na ka sa vakacudruya kina na Kalou na tamata ia ko ira sa sega ni vakatusa na ligana ena ka kecega, ka sega ni muria na nona ivakaro” (Vunau kei na Veiyalayalati 59:21).

Na liga ni Kalou ena noda bula e sega ni kena ibalebale ni vakavuna na ca se leqa rerevaki e tu ena noda vuravura. Ia, e kena ibalebale ni gauna ni nomu dredre kei na veika tawadodonu, ena tu e yasamu o Koya, vaqaqacotaka na nomu rawa ka, vakacegui iko, ka “vakatabuya na nomu rarawa mo vinaka kina” (2 Nifai 2:2).

Ni da vakabauti Koya ka muria na Nona ivakaro, eda sa vulica vakavinaka cake meda rogoca na domona.

Ena Sepiteba ni 1993, na imatai ni noqu yabaki ni Vakaitutu Raraba, a sureti keirau kei watiqu, o Kathy, o Peresitedi James E. Faust (1920–2007), ka dua na lewe ni Kuoramu ni iApositolo Le Tinikarua ena gauna o ya, me keirau lako vata kaya ki na dua na lotu ni Brigham Young University. Nanuma tiko, ena 1993 se bera kina na tete na talevoni vuku, itukutuku raraba, kei na initaneti.

Ena nona vosa, ka kena ulutaga “Na Domo ni Yalotabu,” a veivakasalataki kina o Peresitedi Faust: “Ena nomuni itabatamata o ni na veivakauqeti tiko ena vuqa na domo ka tukuna vei kemuni na ivakarau mo ni bula kina, na sala mo ni vakaceguya kina na nomuni gagadre, na sala mo ni rawata kece kina. Ena tiko vei iko e lima na drau na sala ni retioyaloyalo ena nomu iqaqalo ni liga. Ena tiko na veimataqali parokaramu ni kompiuta, modems ni kompiuta, kato ni itukutuku, kei na papa ni itukutuku; ena tiko na tabaki ni delanidesi, iciqociqo ni setilaiti, kei na isema ni veitaratara ka na kidomoki kemuni ena itukutuku. … Na domo mo vulica mo rogoca sai koya na domo ni Yalotabu.”

O Peresitedi Boyd K. Packer (1924–2015), Peresitedi ni Kuoramu ni iApositolo Le Tinikarua, a vakavulica na domo lailai, malumu ni Yalotabu ena nona tukuna e dua na ka a sotava o John Burroughs, e dua na kenadau ena ibulibuli ni Kalou, ni taubale voli kei ira na nona itokani ena loma ni dua na vanua ni gade osooso. Qo na ka e tukuna o Peresitedi Packer:

“E sivia na rorogo ni bula ena siti . A rogoca o Mr.Burroughs] na sere ni manumanu vuka.

“A cegu ka vakarorogo! Era sega ni rogoca o ira era tiko vata kei koya. A veiraiyaki. E sega tale ni dua e raica.

“E kauwaitaka sara ni ra calata na tamata kece e dua na ka totoka sara.

“A taura e dua na siliva mai na nona taga ka vidika cake ki macawa. E tau ki gaunisala ena dua na taqiri, sega ni rogo levu cake mai na sere ni manumanu vuka. Era vuki kece; era rogoca rawa oya!

“E dredre me tawasei mai na rorogo kece ni motoka ena siti na sere ni manumanu vuka. “Ko na rogoca sara ga. E rawa ni o rogoca vakamatata kevaka o vulica mo vakarorogo kina.”

A yaco na ivakavuvuli nei Peresitedi Packer me baleta na Yalo Tabu ena 1979, e dua na gauna a vakanomodi kina vakalevu na bula ka vagalui vakalevu cake na rorogo ni vuravura mai na kena ena gauna oqo.

E vakavulica o Peresitedi Nelson, “Kevaka o sa vakarorogo tiko vakalevu cake ena cariba ni itukutuku raraba mai na vakasolokakana ni Yalotabu, o sa biuti iko tiko ena dua na vanua rerevaki vakayalo.”

E kaya o Peresitedi Faust, “Kevaka meda na vakarorogo ki na domo ni Yalotabu, sa dodonu talega meda dolava na daligada, vagolea na mata ni vakabauta ki na ivurevure ni domo, ka rai matua ki lomalagi.”

Na domo ni Yalotabu oqo e lako mai ki na noda vakasama kei na veika eda vakila. “Raica ena vakatakila vei iko na Yalo Tabu, io ena lako yani vei iko ko koya ka tukutuku sara ki lomamu” (Vunau kei na Veiyalayalati 8:2 Vakarorogo ki na nomu lewaeloma—e dau tekivu e kea na ivakatakila.

Masu ena Yalo Vakabauta

E sega ni rawa ni vakasaurarataki na isaunitaro kei na veivakauqeti. Eda masu ka wawa ena yalo vakabauta. Eso na isaunitaro ena sega ni yaco mai ena bula oqo, ia vei ira na yalododonu, ena dau vakauta tikoga na Turaga na Nona vakacegu (raica na Joni 14:27). E dau yaco mai na kena isau ni da masu tiko meda vukei ira era tu wavoliti keda. Ena so na gauna, era dau lako mai ena “vosa ki na vosa, na ivakavuvuli ena ivakavuvuli” (Vunau kei na Veiyalayalati 98:12).

E rawa ni rogo mai vei keda na domo ni lomalagi ena veigauna sega ni namaki kei na veivanua sega ni namaki, ia eda raica na noda madigi kilai levu duadua ena vanua vakanomodi kei na veivanua tabu. Ena vakanomodi ni noqu masu ena mataka lailai kei na noqu vakanananu vakatitobu, au kunea kina na veivakalougatataki matalia. Na wiliki ni ivolanikalou ena veisiga, yadua, ka sega ni tarovi rawa, ka dau yaco ena so na gauna, e kauta mai na domo ni Yalotabu ki yaloda me vaka na bukawaqa ena so tale na gauna.

Ena so na gauna, na vakasama oqo e dau vakamatatataki mai na veika eda wilika tiko, ena so tale na gauna, na ka eda vakasamataka tiko e kauta mai na isau ni duatani na kauwai. E vakatavulica o Elder Robert D. Hales: “Ni da vinakata meda vosa vua na Kalou, eda masu. Kei na gauna e via vosa kina vei keda o Koya, eda na vakasaqaqara ena ivolanikalou.”

Ni sa wavoliti keda tu na rorogo kei na veivagolei tani ni vuravura, sa dusimaka na Nona parofita na Turaga me tara e levu cake na valetabu. Ena vale tabu ni Turaga oqo, ni da biuta tu mai na noda bolebole ia eda curuma ena noda masu kei na kauwai, eda sa vakavulici ena dina ni tawamudu.

Ena dua na yabaki sa oti, a solia vei keda o Peresitedi Nelson na yalayala vakasakiti oqo: “Kemuni na taciqu kei na ganequ lomani, oqo na noqu yalayala. Ena sega ni dua na ka ena vukei iko vakalevu cake mo tautauri matua ki na itoko kaukamea mai na sokalou vakawasoma ena valetabu ena gauna kece o rawata kina. Sega ni dua na ka ena taqomaki iko vakalevu nio lako curuma na butobuto. Ena sega ni dua na ka ena vakaukauwataka na nomu ivakadinadina baleta na Turaga o Jisu Karisito kei na Nona Veisorovaki se vukei iko mo kila na nona ituvatuva maqosa na Kalou vakalevu. Ena sega ni dua na ka ena vakamalumutaka na yalomu vakalevu ena gauna ni mosi. Ena sega ni dua na ka ena dolavi lomalagi vakalevu. E sega sara!”

Na koniferedi raraba yadua e kauta mai na ikuri ni veivakalougatataki e levu cake. Ena vula mai oqo ena Epereli, eda na sota tale ena koniferedi raraba me da rogoca na domo ni Turaga. Eda lako mai ki na koniferedi raraba ni da sa masu ka vakavakarau. Vei keda yadua, e tiko na lomaleqa bibi kei na taro bibi. Eda lako mai me da vakavouya na noda vakabauta na noda iVakabula, o Jisu Karisito, ka vaqaqacotaka na noda rawa ni vorata na veitemaki. Eda lako mai me mai vakavulici mai cake. Au yalataka vei kemuni ni ko ni vakavakarau ka lako mai ena masumasu ki na soqoni ni koniferedi raraba, ko na vakila na isau ni nomu leqa, ka ko na kila ni sa tiko vei iko na “ligai lomalagi”.

Mo vakabauta ni sa vosa tiko vei iko na Tamamu Vakalomalagi. Io e dina! Me vukei iko na nomu vakabauti Koya kei na Luvena Lomani mo wasea na ilati ka ciqoma na domoi Tamamu. Au vakadinadinataka ni tiko e kea o Koya ka lomani iko vakalevu cake mai na vosa e rawa ni vakamacalataka.