Noqu Sala ni Vosota Vakadede

iTaba ni dauvolavola mai vei Shaun Sutton

Niu lesu i vale ki na ceva kei Filipaini ena 2016 ni oti na noqu qarava e dua na kaulotu dokai ena vualiku kei Filipaini, au sa vakanamata tiko meu laki vuli ena Brigham Young University–Hawaii ka sotava na ilakolako kece sara e waraki ira tu na itabagone qase cake.

Ia vakasauri ga, sa tekivu me lutu na kequ bibi. E raica na noqu vuniwai ni hyperthyroidism. E vakarerei au ke sega ni qaravi na mate oqo.

Dina ga niu qaravi, ia sa tekivu me veisau na yagoqu. Sa tekivu me vuce na mataqu, au sa lila sara. Au sa sega ni dau taba ka sega ni raici au sara mada ga ena iloilo baleta na kequ irairai.

Sa tekivu me veivuke na wainimate. Ia ni oti e tolu na yabaki, a kunei niu tauvi au tiko e dua na ikarua ni mate—e dua na leqa ni ituvaki ni yalo. Na tauvimate ruarua oqo e butakoca na noqu yalodei. Sa dau dredre meu duri mai na noqu imocemoce meu laki vuli, kau vakila niu sega ni rawa ni veiqaravi ena Lotu.

Au cudru ni vakatara na Kalou me yaco na ka oqo. Au vakataroga se cava meu veiqaravi kina ena yaloqu taucoko kevaka, ni yaco vakakina e kauta mai na veivakatovolei? Ia, au a vakacegui, mai na veivosa oqo nei Peresitedi Jeffrey R. Holland, Peresitedi Vakatawa ni Kuoramu ni iApositolo Le Tinikarua: “Na vakasama sa kavoro e rawa ni vakabulai sara ga ena sala e vakabulai kina na sui kei na yalo sa ramusu.” Au tagi niu rogoca na vosa oqori. E kavoro na noqu vakasama ka gadrevi me vakabulai.

Au a susugi cake ena dua na vuvale yalodina, ka se dei tiko ga na noqu vakabauta na Tamada Vakalomalagi kei Jisu Karisito e dina ga ni mosi ka veilecayaki. Sa mani yaco meu ciqoma ka vakamatautaki au ena noqu ituvaki vou.

Oqo, ni sa oti e walu na yabaki, sa sega tale ni vakaberaberataki au na kequ mate. Au ciqomi ira me tiki ni bula. Au vakila niu sa taucoko. Au rawa ni veiqaravi ka bulataka vakavinaka na noqu bula, e dina ga ni na tomani tiko ga ena noqu bula taucoko na bolebole ni bula. Au sa vulica ni vosota vakadede sa tiki ni bula oqo (raica na Vunau kei na Veiyalayalati 121:7–8). Au sa vulica tiko meu gunuva na noqu bilo wiwi ka kaukauwa tikoga.

Au sa cakacaka tiko ena tabana vakatamata yadua ni dua na kabani ni vuku buli ka taura na kalasi ena initaneti ena bogi mai na Brigham Young University–Pathway Worldwide. Au sa sega ni taroga “Na cava na vuna e yaco kina vei au?” ka sa tekivu taroga “Na cava au rawa ni vulica? Me na yaga vakacava vei au na veika oqo?”

Niu rai lesu, au raica ni rau a tiko vata kei au na Tamada Vakalomalagi kei Jisu Karisito ena gauna taucoko. Niu sa toso ki liu, au kila o cei au rawa ni nuitaka (raica na Vosa Vakaibalebale 3:5–6; 2 Nifai 4:34).