Raica na Matamata

iTaba ni dauvolaivola ena susu manumanu mai vei Shaun Sutton

Ni sa voleka ni cava na noqu gauna niu daukaulotu veiqaravi gone, au a muria e dua na veivakauqeti meu veiqaravi e rua na siga me dua na macawa ena dua na vanua ni susu manumanu mai Utah me baleta na matavuvale ni mataivalu kei na bula. Au sa sega sara ga ni kila e dua na ka me baleta na susu manumanu, ia au marautaka sara ga.

Niu se qai yaco yani e kea, au a kerei meu samaka na vale ni ose. A lesi na noqu itokani vinaka ka itokani kaulotu keirau dau veivakavulici vata ena yakavi, o Elder Saltern, me vakaraitaka vei au na ka meu cakava.

Au yacova yani na iotioti ni vale meu samaka ena dua na siga, au a muri Elder Saltern ki loma. Au vakasamataka e dua na veivakauqeti malua meu taroga me baleta na sogo ni matamata e dakuqu. Au a vakatikitikitaka na vakasama oqori ka laki sasamaki.

Na ose ena vale oqo, o Shrek, e dua vei ira na ose levu duadua ena vanua ni susu manumanu. Sa tekivu me gole ena rere ni keirau sasamaki. Vakasauri ga, a dro tani mai na lomanivale o Shrek ena matamata tadola ka cici siviti ira na ose tale eso e tautuba ena bai.

E ka ni vakavinavinaka, ni dua vei ira na tamata kila ka tiko ena vanua ni susu manumanu a taura e dua na vokete witi ka vakusakusataka lesu na ose. Ni biuti Shrek lesu ki na nona lomanivale, a raici au mai ka taroga ena marau, “Na cava eda vulica?”

Na lesoni e matata oya me dau sogo tikoga na matamata. A vakananumi vei au e dua na ivolanikalou au a wilika ena mataka sara ga o ya ka vakavulici au meu talairawarawa “ki na veivakauqeti ni Yalo Tabu” (Mosaia 3:19).

Ni keirau curu yani kei Elder Saltern ki na rumu nei Shrek, au a vakawalena e dua na veivakauqeti ni Yalo Tabu meu sogota na matamata. Au a vesuka na Yalotabu me qai vakasalataki au ga ena veika au nanuma ni veika “vakayalo” e semati ki na ivolanikalou se ivakaro. E vakayalomalumalumutaki au na ka au sotava oqo. Au sa qai kila ni kilaka ni Yalotabu e cecere cake mai na kena au a kila tu—ena gauna mada ga ni susu manumanu!

E vakavulica o Peresitedi Thomas S. Monson (1927–2018), “Nanuma tiko ni cakacaka oqo e sega ni nomu ka noqu duadua ga. … Ni da qarava tiko na nona veilesi na Turaga; sa noda na Nona veivukei.”

Au a sega beka ni vakavulica tiko na kosipeli ena vanua ni susu manumanu, me vaka au na cakava ena yakavi o ya vata kei Elder Saltern, ia e tu vei au na dodonu meu vukei kei na veidusimaki vakalou—ena gauna mada ga ni samaki vale ni ose.