« វិធី ៧ យ៉ាងដើម្បីរីករាយជាមួយតន្ត្រីបំផុសគំនិត » លីអាហូណា ខែមីនា ឆ្នាំ២០២៥ ។
ចូរមកតាមខ្ញុំ
វិធី ៧ យ៉ាងដើម្បីរីករាយ ជាមួយតន្ត្រីបំផុសគំនិត
« ធ្វើការជ្រើសរើសទំនុកតម្កើងពិសិដ្ឋទាំងឡាយ ។… « ដ្បិតព្រលឹងរបស់យើងត្រេកអរចំពោះបទចម្រៀងពីចិត្ត » ( គោលលទ្ធិ និងសេចក្ដីសញ្ញា ២៥:១១–១២ ) ។
រចនារូបភាពដោយ ដេវីឌ ហ្គ្រីន
អស់រយៈពេលយូរមកហើយ តន្ត្រីគឺជាផ្នែកមួយដ៏សំខាន់នៃការថ្វាយបង្គំសម្រាប់សិស្សរបស់ព្រះយេស៊ូវគ្រីស្ទ ។
ទំនុកដំកើងជាច្រើននៅក្នុងព្រះគម្ពីរសញ្ញាចាស់ គឺជាបទចម្រៀងនៃការសរសើរដល់ព្រះអម្ចាស់ ។ ព្រះគម្ពីរសញ្ញាថ្មីកត់ត្រាថាព្រះយេស៊ូវ និងពួកសាវករបស់ទ្រង់ មុនពេលធ្វើដំណើរឆ្ពោះទៅគែតសេម៉ានី បានច្រៀងទំនុកតម្កើងមួយជាមួយគ្នា ( សូមមើល ម៉ាថាយ ២៦:៣០ ) ។ ហើយទំនុកតម្កើងបង្កើនការថ្វាយបង្គំរបស់យើងក្នុងអំឡុងការប្រជុំសាក្រាម៉ង់សព្វថ្ងៃនេះ ។
ការបង្កើតសៀវភៅទំនុកតម្កើងថ្មីដែលកំពុងមានជាបន្តបន្ទាប់គឺគួរឲ្យរំភើបរីករាយណាស់ ហើយយើងអាចទន្ទឹងរង់ចាំទំនុកតម្កើងថ្មីៗជាច្រើនទៀតពេលដែលដំណើរការនេះបន្តទៅមុខ ។ ប៉ុន្តែទំនុកតម្កើងមិនមែនជាប្រភេទតែមួយគត់នៃតន្ត្រីដែលអាចបំផុសគំនិតយើងនោះទេ ។ កម្មវិធីបណ្ណាល័យដំណឹងល្អ និងតន្ត្រីពិសិដ្ឋរបស់សាសនាចក្រ មានតន្ត្រីផ្សេងៗគ្នាជាច្រើនដើម្បីទទួលបានបទពិសោធន៍ ពីតន្ត្រីច្រៀងបែបប្រពៃណីរហូតទៅដល់តន្ត្រីសហសម័យ ( អ្នកមិនចាំបាច់ធ្វើជាក្មេងវ័យជំទង់ ទើបរីករាយជាមួយនឹងអាល់ប៊ុមចម្រៀង Strive to Be នោះទេ ! ) ។ នៅក្នុងកម្មវិធីទាំងនេះ អ្នកអាចរកឃើញការថតបទចម្រៀងដែលវិជ្ជមាន បំផុសគំនិត ដែលចម្រៀងជាច្រើនមាននូវសន្លឹកតន្ត្រីដែលអ្នកអាចលេងភ្លេង ឬច្រៀងដោយខ្លួនឯងបាន ។
នេះគឺជាគំនិតមួយចំនួនដើម្បីជួយអ្នកបញ្ចូលតន្ត្រីដែលបំផុសគំនិត ទៅក្នុងការថ្វាយបង្គំរបស់អ្នកនៅតាមផ្ទះ—ទោះបីជាអ្នកមិនមានការបណ្តុះបណ្តាលខាងតន្ត្រីក៏ដោយ ៖
-
ស្តាប់ការថតរបស់ទំនុកតម្កើង និងបទចម្រៀងបំផុសគំនិតផ្សេងទៀតពេញមួយសប្តាហ៍ ។ ទាំងនេះអាចរកបាននៅក្នុងបណ្ណាល័យដំណឹងល្អ ឬកម្មវិធីតន្ត្រីពិសិដ្ឋ ឬនៅក្នុងបណ្ណាល័យតន្ត្រីនៅលើគេហទំព័រសាសនាចក្រ ។
-
ស្រាវជ្រាវដំណើររឿងនៃទំនុកតម្កើង និងស្វែងយល់ពីអ្វីដែលបំផុសគំនិតពួកគេ ។
-
ច្រៀងទំនុកតម្កើង និងរៀនផ្នែកផ្សេងៗគ្នាដោយប្រើជម្រើសសន្លឹកតន្រ្តីអន្តរកម្មនៅលើកម្មវិធីតន្រ្តីពិសិដ្ឋ ឬនៅលើគេហទំព័រសាសនាចក្រ ។
-
ស្តាប់ក្រុមចម្រៀងរោងឧបោសថ ឬអាល់ប៊ុម Strive to Be នៅលើវេទិកាស្តាប់ដែលអ្នកចូលចិត្ត ( ដូចជា YouTube, Spotify, Apple Music, Pandora ) ។
-
រៀនលេងទំនុកតម្កើង និងបទចម្រៀងដែលបំផុសគំនិតផ្សេងទៀតនៅលើព្យាណូ ឬហ្គីតា ដោយប្រើសន្លឹកតន្ត្រី ឬតន្ត្រីដែលមាននៅលើកម្មវិធីបណ្ណាល័យដំណឹងល្អ ឬនៅលើគេហទំព័រសាសនាចក្រ ។
-
សិក្សា និងជញ្ជឹងគិតពីអត្ថបទចម្រៀង និងទំនុកតម្កើងដែលលើកស្ទួយ ។
-
ច្រៀងតាមអត្ថបទចម្រៀង ខណៈពេលស្តាប់ការសម្តែងដោយក្រុមចម្រៀងរោងឧបោសថនៅវិសាលដ្ឋានព្រះវិហារបរិសុទ្ធ ។ ការសម្តែងទាំងឡាយអាចរកបាននៅលើបណ្ដាញរបស់ក្រុមចម្រៀងនៅលើ YouTube ។