« ការមានចំណែកនៅក្នុងផែនការរបស់ព្រះ និងនៅក្នុងព្រះវិហារបរិសុទ្ធ » លីអាហូណា ខែមីនា ឆ្នាំ២០២៥ ។
ការមានចំណែក នៅក្នុងផែនការរបស់ព្រះ និងនៅក្នុងព្រះវិហារបរិសុទ្ធ
គោលការណ៍ចំនួនបីរំឭកយើងថាយើងទាំងអស់គ្នាអាចទទួលបានពរជ័យដែលព្រះប្រទានដល់បុត្រាបុត្រីរបស់ទ្រង់ ។
រូបថតនៃព្រះវិហារបរិសុទ្ធ បារ៉ាហ្គីឡា កូឡុំប៊ី ដោយ ឡេសលី និលសុន
ខ្ញុំបានអង្គុយនៅក្នុងក្រុមរបស់សមាជិកសាសនាចក្រ ។ យើងមិនធ្លាប់បានជួបគ្នាពីមុនមកទេ ប៉ុន្តែយើងទាំងអស់គ្នាមានរឿងមួយដូចគ្នា ៖ យើងនៅលីវ ។
ឥឡូវនេះ ខ្ញុំចង់និយាយថយក្រោយបន្តិច ។ នៅក្នុងដំណឹងល្អរបស់ព្រះយេស៊ូវគ្រីស្ទ យើងមិនត្រូវបានកំណត់ដោយស្លាកសញ្ញានោះទេ ។ ប្រធានរ័សុល អិម ណិលសុន បានបង្រៀនថា យើងគឺជា« បុត្រាបុត្រីវិញ្ញាណរបស់ព្រះយ៉ាងពិតប្រាកដ » ។ ខ្ញុំយល់ថាដោយសារភាពចាំបាច់យើងហៅសមាជិកមួយចំនួននៃសាសនាចក្រថា នៅលីវ ។ មានហេតុផលជាក់ស្តែងសម្រាប់ការហៅនោះ ។ ប៉ុន្តែពេលខ្លះ ដូចជាករណីដែលនៅក្នុងស្ថានភាពនេះ វាអាចមានចំណែកធ្វើឲ្យសមាជិកមានអារម្មណ៍ដូចជាមនុស្សពីខាងក្រៅ ។ វាអាចនឹងធ្វើឲ្យពួកគេពិបាកក្នុងការមានអារម្មណ៍ថា ត្រូវបានរាប់បញ្ចូលយ៉ាងពេញលេញនៅក្នុងពរជ័យនៃសេចក្ដីសង្គ្រោះ និងភាពតម្កើងឡើងរបស់ព្រះ ។
អ្នកឃើញទេ យើងកំពុងនិយាយអំពីព្រះវិហារបរិសុទ្ធ—ហើយមនុស្សមួយចំនួននៅក្នុងក្រុមមានអារម្មណ៍ថា ការនៅលីវបានបដិសេធពួកគេពីការទទួលបានពរជ័យពេញលេញនៃព្រះវិហារបរិសុទ្ធ ។ ខ្ញុំយល់ ថានៅពេលដែលអ្នកមិនបានរៀបការនៅក្នុងសាសនាចក្រដែលផ្តោតលើគ្រួសារ នោះវាអាចជាការលំបាកក្នុងការមើលឃើញពីរបៀបដែលអ្នកចូលចំណោមនឹងគេ ។ ប៉ុន្តែខ្ញុំក៏ដឹងដែរថា ព្រះអម្ចាស់មិនវិនិច្ឆ័យថាតើមនុស្សម្នាក់ស័ក្ដិសមដើម្បីទទួលបានពរជ័យដែលបានសន្យាដោយផ្អែកលើរូបរាងខាងក្រៅ ឬស្លាកសញ្ញានោះទេ ។ ទ្រង់ « ទតចំពោះក្នុងចិត្តវិញ » ( សាំយូអែល ទី១ ១៦:៧ ) និងធ្វើឲ្យពរជ័យរបស់ទ្រង់អាចបានទៅដល់អស់អ្នកទាំងឡាយណាដែលជ្រើសរើសធ្វើតាមទ្រង់ ។ ខ្ញុំជឿលើរឿងនេះដោយអស់ពីចិត្តរបស់ខ្ញុំ ។ ដូច្នេះ ដោយមានការយល់ដឹងនោះក្នុងគំនិត នេះគឺជាគោលការណ៍ចំនួនបីដើម្បីជួយពួកបរិសុទ្ធថ្ងៃចុងក្រោយដែលនៅលីវដឹងថាពួកគេមានចំណែកនៅក្នុងផែនការរបស់ព្រះ និងនៅក្នុងព្រះវិហារបរិសុទ្ធ ។
១. ព្រះបានរចនាផែនការរបស់ទ្រង់សម្រាប់បុត្រាបុត្រីរបស់ទ្រង់ម្នាក់ៗ ។
ដោយសារសេចក្ដីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍គឺត្រូវការសម្រាប់ភាពតម្កើងឡើង នោះវាហាក់ដូចជាផែនការរបស់ព្រះមិនបានបង្កើតឡើងសម្រាប់អស់អ្នកដែលនៅលីវនោះទេ ( សូមមើល គោលលទ្ធិ និងសេចក្ដីសញ្ញា ១៣១:១–៣ ) ។ ប៉ុន្តែអែលឌើរ ផាទ្រីក ខៀរ៉ុន បានបង្រៀនថា « ផែនការរបស់ព្រះវរបិតាយើងល្អណាស់ គឺជាផែនការ ‹ ដ៏អស្ចារ្យ › ត្រូវបានរៀបចំឡើងដើម្បីនាំបងប្អូនទៅផ្ទះវិញ ពុំមែន ឲ្យបងប្អូននៅខាងក្រៅផ្ទះនោះទេ ។ គ្មាននរណាម្នាក់ដាក់របាំងបិទផ្លូវ ហើយឈរនៅទីនោះដើម្បីដេញបងប្អូនឲ្យថយទៅក្រោយវិញឡើយ ។ តាមពិត វាផ្ទុយស្រឡះ ។ ព្រះខិតខំឲ្យមានទំនាក់ទំនងជាមួយបងប្អូនដោយឥតឈប់ឈរ ។ ទ្រង់ ‹ សព្វព្រះទ័យចង់ឲ្យបុត្រាបុត្រីទ្រង់ជ្រើសរើសត្រឡប់ទៅកាន់ទ្រង់វិញ › ហើយទ្រង់បង្កើតគ្រប់វិធានការតាមដែលអាចធ្វើទៅបានដើម្បីនាំបងប្អូនឲ្យត្រឡប់មកវិញ » ។
ព្រះមិនមានបំណងបញ្ជូនអ្នកដែលនៅលីវចេញពីអំណរនៃពរជ័យដែលទ្រង់ប្រទាននោះទេ ។ ប្រធាន អិម រ័សុល បាឡឺដ ( ឆ្នាំ១៩២៨–២០២៣ ) ដែលជាប្រធានស្តីទីក្នុងកូរ៉ុមនៃសាវកដប់ពីរនាក់ បានបង្រៀនថា « ព្រះគម្ពីរ និងពួកព្យាការីថ្ងៃចុងក្រោយបញ្ជាក់ថា មនុស្សគ្រប់គ្នាដែលស្មោះត្រង់ក្នុងការរក្សាសេចក្ដីសញ្ញានៃដំណឹងល្អ នឹងមានឱកាសសម្រាប់ភាពតម្កើងឡើង » ។ ព្រលឹងនីមួយៗមានតម្លៃខ្លាំងណាស់នៅក្នុងព្រះនេត្ររបស់ព្រះវរបិតាសួគ៌—ខ្លាំងរហូតដល់ទ្រង់បានបញ្ជូនព្រះរាជបុត្រាបង្កើតតែមួយរបស់ទ្រង់ឲ្យទៅសុគត និងប្រោសលោះយើងទាំងអស់គ្នាពីអំពើបាប ដើម្បីយើងអាចមានអំណោយទាននៃជីវិតអស់កល្បជានិច្ច ( សូមមើល យ៉ូហាន ៣:១៦–១៧; គោលលទ្ធិ និងសេចក្ដីសញ្ញា ១៨:១០–១២ ) ។
ប្រសិនបើជីវិតកើតឡើងខុសពីការរំពឹងទុក នោះយើងអាចនឹងឃើញខ្លួនយើងសួរអំពីគោលបំណងរបស់យើងនៅក្នុងផែនការរបស់ព្រះ ។ ប៉ុន្តែផែនការរបស់ទ្រង់មិនដែលធានាថា ជីវិតរបស់យើងទាំងអស់នឹងមើលទៅដូចគ្នានោះទេ ។ យើងមិនដឹងថា អំណរ ការខកចិត្ត ភាពជោគជ័យ ឬការឈឺចិត្តនឹងកើតឡើងចំពោះយើងនោះទេ ។ ប្រធាន ដាល្លិន អេក អូក ទីប្រឹក្សាទីមួយក្នុងគណៈប្រធានទីមួយ បានមានប្រសាសន៍ថា « មានអ្វីៗជាច្រើនដែលយើងមិនដឹង ដែលថាការពឹងផ្អែកតែមួយគត់របស់យើង គឺទុកចិត្តលើព្រះអម្ចាស់ និងសេចក្ដីស្រឡាញ់របស់ទ្រង់ចំពោះបុត្រាបុត្រីទ្រង់ » ។
យើងប្រហែលជាមិនដឹងថាហេតុអ្វីបានជាផ្លូវរបស់យើងមើលទៅដូចនេះ នៅពេលឥឡូវនេះនោះទេ ។ ប៉ុន្តែការទុកចិត្តលើព្រះ និងសេចក្ដីស្រឡាញ់របស់ទ្រង់អាចនាំមកនូវភាពច្បាស់លាស់អំពីរបៀបដែលទ្រង់បានរៀបចំផែនការរបស់ទ្រង់សម្រាប់បុត្រាបុត្រីទ្រង់ទាំងអស់—រួមទាំងអ្នកផងដែរ ។
រូបថតនៅខាងក្នុងមជ្ឈមណ្ឌលអ្នកទស្សនាព្រះវិហារបរិសុទ្ធទីក្រុងរ៉ូម ប្រទេសអ៊ីតាលី ដោយ ម៉ាសស៊ីម៉ូ គ្រីស្យូនី
២. ព្រះវិហារបរិសុទ្ធមានពរជ័យផ្ទាល់ខ្លួនសម្រាប់មនុស្សគ្រប់គ្នា ។
យើងអាចគិតថាការផ្សារភ្ជាប់ជាការអនុវត្តតែចំពោះស្វាមី និងភរិយាប៉ុណ្ណោះ ។ ប៉ុន្តែ បន្ថែមពីលើការបង្រួបបង្រួមគូស្វាមីភរិយាជាមួយនឹងព្រះអម្ចាស់ ការផ្សារភ្ជាប់នឹងបង្រួបបង្រួមក្រុមគ្រួសារជារៀងរហូតផងដែរ ។ តាមរយៈការផ្សារភ្ជាប់ នោះបុតាបុត្រីរបស់ព្រះទាំងអស់អាចរីករាយជាមួយពរជ័យដ៏នៅអស់កល្បជានិច្ច ប្រសិនបើពួកគេរក្សាសេចក្តីសញ្ញារបស់ពួកគេ ។
អំណាចនៃការផ្សារភ្ជាប់ធ្វើឲ្យពិធីបរិសុទ្ធបព្វជិតភាពទាំងអស់មានសុពលភាពនៅស្ថានសួគ៌ និងនៅលើផែនដី ។ អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖« [ អំណាចនៃការផ្សារភ្ជាប់ ] ធ្វើឲ្យបុគ្គលម្នាក់ៗ និងក្រុមគ្រួសារ ទទួលបានសេចក្តីសង្គ្រោះ និងភាពតម្កើងឡើងដែលវាមានជាសកលសម្រាប់បុត្រាបុត្រីរបស់ព្រះនៅគ្រប់ទីកន្លែង និងគ្រប់ពេលខណៈពេលរស់នៅលើផែនដី ។ គ្មានទ្រឹស្ដី ឬទស្សនវិជ្ជា ឬសិទ្ធិអំណាចណាផ្សេងអាចប្រៀបផ្ទឹមនឹងឱកាសដែលរួមបញ្ចូលពិធីការទាំងអស់នេះទេ ។ អំណាចនៃការផ្សារភ្ជាប់នេះគឺជាការបង្ហាញដ៏ឥតខ្ចោះអំពីសេចក្ដីយុត្តិធម៌ ក្តីមេត្តានិងក្តីស្រឡាញ់របស់ព្រះ » ។ ពរជ័យទាំងឡាយដែលព្រះអម្ចាស់ប្រទានគឺរួមបញ្ចូលទាំងអស់ដែលពរជ័យទាំងនោះអាចរកបានសម្រាប់មនុស្សគ្រប់គ្នាដែលនឹងធ្វើ ហើយរក្សាសេចក្តីសញ្ញាជាមួយនឹងទ្រង់ ។
យើងអាចយល់កាន់តែច្បាស់អំពីរបៀបដែលផែនការរបស់ព្រះគឺរួមបញ្ចូលទាំងអស់ ពេលយើងថ្វាយបង្គំនៅក្នុងដំណាក់របស់ព្រះអម្ចាស់ ។ ប្រធាន ណិលសុន បានបង្រៀន « ការចំណាយពេលនៅក្នុងព្រះវិហារបរិសុទ្ធនឹងជួយបងប្អូនឲ្យ គិតដល់សេឡេស្ទាល និងចាប់យកចក្ខុវិស័យថាបងប្អូនជានរណាពិតប្រាកដ មនុស្សបែបណាដែលបងប្អូនអាចប្រែក្លាយ និងជីវិតបែបណាដែលបងប្អូនអាចមានជារៀងរហូត » ។ លោកក៏បានពន្យល់ផងដែរថា ការថ្វាយបង្គំនៅក្នុងព្រះវិហារបរិសុទ្ធនឹងផ្តល់ឲ្យយើងនូវការការពារ ទីបន្ទាល់កាន់តែខ្លាំង ការលួងលោម វិវរណៈផ្ទាល់ខ្លួន ចំណេះដឹង និងអំណាចកើនឡើង និងការយល់ដឹងកាន់តែច្បាស់អំពីផែនការរបស់ព្រះ ។
មិនថាយើងរៀបការហើយ ឬនៅលីវនោះទេ ព្រះវិហារបរិសុទ្ធមានឯកសិទ្ធិខាងវិញ្ញាណផ្ទាល់ខ្លួនសម្រាប់យើងទាំងអស់គ្នា—វាគឺជាកន្លែងដែលពង្រឹង និងផ្តល់អំណាចដល់អ្នកទាំងឡាយណាដែលចង់បានភាពជិតស្និទ្ធជាមួយនឹងព្រះ ។ សម្រាប់ព័ត៌មានបន្ថែមទៀត សូមមើលរបារនៅចំហៀង « ទទួលបានព្រះចេស្តាដោយការថ្វាយបង្គំក្នុងព្រះវិហារបរិសុទ្ធ » ។
៣. នៅក្នុងព្រះវិហារបរិសុទ្ធ យើងអាចធ្វើឲ្យទំនាក់ទំនងរបស់យើងជាមួយព្រះយេស៊ូវគ្រីស្ទរឹងមាំ ។
នៅក្នុងព្រះវិហារបរិសុទ្ធ ការផ្តោតសំខាន់គឺ ព្រះយេស៊ូវគ្រីស្ទ ។ ទ្រង់ជាស្នូលនៃផែនការរបស់ព្រះ ហើយជាហេតុផលដែលយើងទាំងអស់គ្នាអាចទទួលបានសេចក្ដីសង្គ្រោះ និងភាពតម្កើងឡើង ។ ប្រធាន ណិលសុន បានបង្រៀន ៖ « ដំណាក់នៃព្រះអម្ចាស់ គឺជា ដំណាក់នៃការរៀនសូត្រ ។ ព្រះអម្ចាស់បង្រៀនតាមរបៀបរបស់ទ្រង់ផ្ទាល់ ។ ពិធីបរិសុទ្ធនីមួយៗបង្រៀនអំពីព្រះអង្គសង្គ្រោះ ។ យើងរៀនអំពីរបៀបដើម្បីវែកវាំងនន ហើយទំនាក់ទំនងកាន់តែច្បាស់ជាមួយនឹងស្ថានសួគ៌ ។ យើងរៀនរបៀបឈ្នះមារសត្រូវ ហើយទាញយកអំណាចបព្វជិតភាពរបស់ព្រះអម្ចាស់មកពង្រឹងយើង និងមនុស្សដែលយើងស្រឡាញ់ ។ យើងម្នាក់ៗគួរតែស្វែងរកជម្រកនៅទីនោះឲ្យកាន់តែខ្លាំង » ។
យើងអាចស្វែងរកទីជម្រក និងភាពមានចំណែកនៅក្នុងព្រះវិហារបរិសុទ្ធដោយស្វែងរកព្រះអង្គសង្គ្រោះនៅក្នុងពិធីបរិសុទ្ធ និងសេចក្ដីសញ្ញាទាំងឡាយ ។ ក្នុងការធ្វើដូច្នេះ យើងនឹងរកឃើញភស្តុតាងថា ទ្រង់ស្រឡាញ់យើង ហើយថា « មនុស្សទាំងអស់ ទាំងពួកសាសន៍យូដា និងពួកសាសន៍ដទៃ ក៏ដូចគ្នានៅចំពោះព្រះដែរ » ( សូមមើល នីហ្វៃទី២ ២៦:៣៣ ) ។ ដោយសារតែសេចក្តីស្រឡាញ់របស់ទ្រង់ចំពោះយើង ទ្រង់ចង់ឲ្យយើងបង្កើត « ទំនាក់ទំនងមួយដែលចងភ្ជាប់ដល់អស់កល្បអស់កាលជានិច្ច » ជាមួយនឹងទ្រង់ និងអាចទទួលបាននូវ « សេចក្តីស្រឡាញ់ និងសេចក្តីមេត្តាករុណាដ៏ពិសេសមួយ » តាមរយៈសេចក្តីសញ្ញាទាំងឡាយរបស់យើង ។ ប្រសិនបើយើងធ្វើ និងរក្សាសេចក្តីសញ្ញានៃព្រះវិហារបរិសុទ្ធ នោះយើងអាចពង្រឹងទំនាក់ទំនងរបស់យើងជាមួយនឹងទ្រង់ ដោយនាំមកនូវ « សេចក្តីសង្ឃឹម អំណរ និងសុទិដ្ឋិនិយមអស់មួយជីវិតរបស់យើង »—មិនថាកាលៈទេសៈណាក៏ដោយ ។