O Le Ekalesia Toefuataiina a Iesu Keriso

O le suesuega o le Sau, Mulimuli Mai ia te A’u i le tausaga lenei o le Mataupu Faavae ma Feagaiga o le a faamamafaina ai le auala na toefuatai mai ai e le Alii Lana Ekalesia ma le talalelei e ala i perofeta o aso e gata ai. O le tele o tusiga i le lomiga o le masina lenei o loo faamamafaina ai faamanuiaga o le Toefuataiga.

Aoao mai Lenei Tusiga

Auai i le Faapotopotoina

I le itulau e 2, ua faasoa mai ai e Peresitene Russell M. Nelson ni auala e mafai ona tatou faapotopoto atu i le Faaola, faapotopoto faatasi ma le Au Paia, ma faapotopoto i le auaunaga a le Atua. Mafaufau e faatu se sini mo le masina lenei e saofaga ai i se tasi o na ituaiga faapotopoto e tolu.

Auauna atu i le Ekalesia Toefuataiina

Na saunoa Elder Patrick Kearon o le Korama a Aposetolo e Toasefululua e uiga i avanoa ua tatou maua i le Ekalesia toefuataiina a Iesu Keriso e “auauna atu ai i isi ma le alofa” (tagai i le itulau 8). O i ai ni tagata i lau uarota po o le paranesi o loo tauivi? E mafai ona e tatalo mo nei tagata ma fesili atu mo musumusuga i le auala e auauna atu ai ia i latou.

Aoao mai le Folafolaga o le Toefuataiga

I le 2020, na tuuina mai ai e le Au Peresitene Sili ma le Korama a Aposetolo e Toasefululua le “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi” (tagai i le itulau 40). A o e toe faamanatuina le folafolaga o le Toefuataiga, atonu e te mafaufau i fesili nei: O a mea autu na tutupu o loo ta’ua ai, ma na faapefea ona taialaina e le Alii na mea na tutupu?

Mea Mālie Faaleaiga i leSau, Mulimuli Mai ia te A’u

Mataupu Faavae ma Feagaiga 1:30

I lenei fuaiupu, ua faamatalaina ai e le Alii Lana Ekalesia o “le ekalesia moni ma ola e tasi i luga o le fogaeleele.” O manatu e aoao atu nei e mafai ona fesoasoani i lau fanau ia malamalama ai i le uiga o le “moni” ma le “ola”:

I le Liahonao Iuni 2024, na saunoa ai Elder J. Devn Cornish, o se Fitugafulu Pulega Aoao ua faamalolo, i le fesili “O le a le uiga pe a tatou fai atu e moni le Ekalesia?” E mafai ona e faasoa atu i lau fanau nisi o manatu autū mai lenā mataupu. O a ni aafiaga faaleagaga na e maua e fesoasoani ai ia te oe ia iloa e moni le Ekalesia—e taitaia e Iesu Keriso, e i ai le pule o le perisitua, e taitaia e perofeta, e faasoa mai ai le talalelei a Iesu Keriso?
Afai e mafai, fai atu i lau fanau e fesoasoani ia te oe e piki se laulaau po o se lala laitiiti mai se laau po o se vaovao e lata ane. Talanoaina le mea o le a tupu ai i le laulaau i le taimi nei ona e le o fesootai i le laau. Aisea o le a mate ai le lau po o le lala? Faitau le Ioane 15:4, lea e faatusatusa ai e le Faaola o Ia lava i se vine ma Ona soo i lala. E mafai faapefea ona manatu i le Ekalesia a Iesu Keriso o se ekalesia ola?