E Na’o le Faaeletonika
Aisea Tatou Te Manaomia ai se Ekalesia Faatulagaina Lelei?
O le avea ma se vaega o le Ekalesia a le Alii e mafai ona fesoasoani ia i tatou e manatua ai ma avea faapei o Iesu Keriso.
Pe na e mafaufau ea pe aisea na faatulaga ai e le Atua Lana Ekalesia i le ala na Ia faia ai? Aisea ua i ai perofeta, aposetolo, ma valaauga o le Ekalesia? Atonu na e mafaufau pe aisea e tatau ai ona tatou osia ma tausia feagaiga ina ia maua ai le faaeaga, nai lo le mauaina i le na o le avea ai ma se tagata lelei.
Na saunoa Elder D. Todd Christofferson o le Korama a Aposetolo e Toasefululua, “Tatou te le taumafai mo le liua i le Ekalesia ae ia Keriso ma Lana talalelei, o se liua lea e faafaigofieina e le Ekalesia.” O ni nai auala nei e mafai ai e Le Ekalesia a Iesu Keriso o le Au Paia o Aso e Gata Ai ona faalolotoina lo tatou liua ia Iesu Keriso ma fesoasoani ia i tatou ia avea faapei o Ia.
Mauaina o Ki ma le Mana o le Perisitua
Na saunoa mai Peresitene Russell M. Nelson, “A aunoa ma ki o le perisitua, o le Ekalesia ua na o se aoaoga taua ma se faalapotopotoga mo galuega alofa ae leai se isi mea sili atu.” O ki o le perisitua e avanoa ai feagaiga ma le Atua mo alii ma tamaitai. Pe a tatou tausia a tatou feagaiga, tatou te maua le mana sili atu o le Atua, lea e mafai ona fesoasoani ia i tatou e faataunuu ai valaauga, onosaia tofotofoga, tetee atu i faaosoosoga, ma iloa ai le va o le sa’o ma le sese.
Mauaina o le Taitaiga a Perofeta
O perofeta o se vaega faavae o le Ekalesia a Keriso. E pei lava ona ta’ita’ia tagata o loo i le Tusi Paia e Aperaamo, Mose, ma isi perofeta silisili, e faapena fo’i ona ta’ita’ia i tatou e perofeta i aso e gata ai. E taua perofeta i lo tatou tuputupu ae faaleagaga aua, e pei ona aoao mai Elder Ulisses Soares o le Korama a Aposetolo e Toasefululua, “E fai ma sui o le mafaufau ma le loto o le Alii ma ua valaauina e fai ma sui o Ia ma aoao i tatou i mea e tatau ona tatou faia e toe foi ai e ola i le afioaga o le Atua ma Lona Alo, o Iesu Keriso.” I se lalolagi e tele leo feteenai, e faamafanafanaina le iloa e mafai lava ona tatou vaavaai atu i perofeta soifua o se punavai o le upumoni.
O Le Tuputupu Ae e ala i Valaauga
O le isi auala e fesoasoani ai le Ekalesia ia i tatou ia avea e faapei o Iesu Keriso o le tuuina mai lea o valaauga i tagata taitoatasi o le ekalesia. O la tatou auaunaga i le Ekalesia e le na o le faafetaiaia o manaoga faaletino ae ia fesoasoani foi ia i tatou ia avea atili e faapei o le Faaola, o le faataitaiga atoatoa o le auaunaga lē manatu faapito. “O valaauga uma lava e maua ai se avanoa e auauna atu ai ma tuputupu ae ai,” o le saunoaga lea a Elder Dieter F. Uchtdorf o le Korama a Aposetolo e Toasefululua. “Sa faatulagaina e le Alii le Ekalesia i se ala e maua ai e tagata taitoatasi se avanoa e tautua ai, lea e tau atu ai i le tuputupu ae faaleagaga.”