Faafetai i le Faapotopoto

Saunia e Peresitene Russell M. Nelson

Peresitene o Le Ekalesia a Iesu Keriso o le Au Paia o Aso e Gata Ai

Tau ina ia tatou faafetai pea mo le avanoa ma le faatuatuaga ua tuuina mai e le Alii i o tatou luga a o tatou faapotopoto atu i le Faaola, faapotopoto faatasi ma le Au Paia, ma faapotopoto i Lana auaunaga.

Mo le tele o tausaga, sa i ai sa’u uati aulelei sa anaina e lo’u tamamatua o Andrew C. Nelson, lea ou te lei feiloai lava i ai. Na maliu o ia ina ua faatoa 16 tausaga o lo’u tama.

Na maua e lo’u tama le uati a Tamamatua Nelson. Ina ua ou matua, sa ia tuuina mai ia te au le uati. Sa ou faatauaina lena uati o se sootaga faaletino i se tasi o o’u tuaa faamaoni.

O matua o tamamatua Nelson, e pei o matua uma o o’u matua matutua, na auai i le Ekalesia i lo latou atunuu moni o Europa. O le a ou faafetai e faavavau mo nei paionia na muamua atu. Ona o lo latou faatuatua ma le ositaulaga e faapotopoto faatasi ma le Au Paia, ua matou olioli ai ma e tupuga mai ia te a’u i faamanuiaga o le talalelei toefuataiina a Iesu Keriso.

O le uati a tamamatua Nelson na faamanatu mai ai ia te au lo tatou matafaioi paia i le avea ai ma Au Paia o Aso e Gata Ai e faapotopoto fanau a lo tatou Tama i itu uma e lua o le veli. Sa faamanatu mai foi e lana uati ia te au o loo [uati] vaavaai ma faatalitali mai o tatou tuaa mo i tatou e faailoa mai i latou ma vaai o loo faatinoina a latou sauniga o le malumalu ina ia latou maua ai le avanoa e faapotopotoina ai e faavavau i le lafu a le Tama.

Faapotopoto atu i le Faaola

Faatasi ai ma o’u Uso i le Au Peresitene Sili ma le Korama a Aposetolo e Toasefululua, matou te tautino atu: “O lenei Ekalesia ua taula i le soifuaga atoatoa o lona ma’a tulimanu autu, o Iesu Keriso, ma i Lana Togiola lē i’u ma le Toetu moni mai. … Ua Ia vala’aulia i tatou uma ia ō mai ia te Ia ma Lana Ekalesia, ia maua le Agaga Pa’ia, o sauniga o le faaolataga, ma ia maua le olioli tumau.”

Talu ai o loo agai pea i luma le Toefuataiga e ala i faaaliga faifai pea, “o le a le toe tutusa lava le lalolagi, aua o le a ‘faapotopoto faatasi [e le Atua] mea uma ia tasi ia Keriso’ (Efeso 1:10).”

“Mea uma” e aofia ai Ana mamoe [so’o]. Ua valaauina i tatou e le Faaola e tuua le amioleaga o le lalolagi ae faapotopoto atu ia te Ia. E finagalo o Ia ia avea Ana mamoe ma se malamalama e susulu malosi, e faatuina ai se tulaga faatonuina mo le lalolagi atoa e ala i le atagia mai o le auala e ola ai soo moni, e aofia ai le auala latou te maua ai le olioli moni a o latou taulai atu o latou olaga i le Faaola.

Tatou te faapotopoto i le Faaola pe a tatou o mai ia te Ia (tagai i le Mataio 11:28) e ala i le faaaogaina o le faatuatua e salamo ai, taliaina o le papatisoga i Lana Ekalesia, ma le mauaina o le meaalofa o le Agaga Paia.

Tatou te faapotopoto i le Faaola a o tatou oo i le faamalologa faaleagaga lea e oo mai i le aai ma feinu i le faamanatuga, ma molimau atu ua tatou naunau e tauave i o tatou luga Lona suafa, manatua pea o Ia, ma tausi Ana poloaiga (tagai i le Mataupu Faavae ma Feagaiga 20:77, 79).

Tatou te faapotopoto i le Faaola a o tatou faatumuina o tatou olaga i aso taitasi i Ana upu ma upumoni, e aofia ai aoaoga a Ana perofeta, tagatavaai, ma talifaaaliga.

Tatou te faapotopoto i le Faaola a o tatou faaleleia lo tatou tomai e faalogo ai ia te Ia, ma ola agavaa mo musumusuga a le Agaga Paia.

Tatou te faapotopoto i le Faaola a o tatou faamalosia lo tatou liua, faateleina lo tatou faatuatua, faalolotoina lo tatou avea ma soo, faataitai i Lana faataitaiga, ma taumafai ia avea ma tagata e sili atu ona lelei i aso taitasi.

Tatou te faapotopoto i le Faaola a o tatou osia feagaiga paia ma maua sauniga paia i totonu o le malumalu.

Tatou te faapotopoto i le Faaola a o tatou gauai atu i tatou lava ma le onosai ma le lototele “i mea uma ua silafia e le Alii e tatau ona faaoo mai [ia te i tatou]” (Mosaea 3:19).

Ma le mea mulimuli, tatou te faapotopoto i le Faaola a o tatou aoao atu ma molimau atu e uiga ia te Ia, ma valaaulia o tatou aiga, uo, ma tuaoi e faapotopoto faatasi ma i tatou i “le malamalama, le ola, ma le faamoemoe o le lalolagi.”

Faapotopoto faatasi ma le Au Paia

Pe a tatou o mai faatasi ma tuufaatasia o ni tagata o Le Ekalesia a Iesu Keriso o le Au Paia o Aso e Gata Ai, tatou te ulu atu i le faaaumeaina ma le mafutaga a le tasi ma le isi. Tatou te lagolago, aoao atu, ma faagaeetia le tasi ma le isi. Tatou te taumafai, i afioga a le Faaola, ia “tasi” (Ioane 17:21; tagai foi i le Mataupu Faavae ma Feagaiga 38:27) ma ia “fealofani” (Ioane 13:34).

Sa aoao mai Peresitene Dallin H. Oaks, Fesoasoani Muamua i le Au Peresitene Sili, “O le auai i le Lotu e aumaia ia i tatou le malosiaga ma le faatupulaia o le faatuatua lea e sau mai le fegalegaleai ma isi tagata talitonu ma tapuai faatasi ma i latou o loo tauivi foi e tumau i luga o le ala o feagaiga ma ia avea ma ni soo sili atu ona lelei o Keriso.”

I le Ekalesia tatou te maua ai le malologa faaleagaga ma le faafouina. Tatou te maua ai sauniga ma le pule o le perisitua e faatautaia ai. Tatou te maua ai upumoni toefuataiina, aoaoga faavae mama, ma faaaliga patino. Tatou te maua ai lima faafeiloa’i, loto faamafanafana, ma leo faalaeiau. Tatou te maua ai avanoa e ola ai i poloaiga sili e lua (tagai i le Mareko 12:30–31).

Ua lapataia i tatou e le Alii e faapea “ua ’au faatasi le fili” (Mataupu Faavae ma Feagaiga 38:12). Ina ia puipuia o tatou aiga ma taofia le faatosinaga faatupulaia a Satani, o lo tatou tapuai faatasi o ni Au Paia e sili atu ona taua.

O le “lotogatasi,” na aoao mai ai le Perofeta o Iosefa Samita, “o le malosi lea.”

Faapotopoto i Lana Auaunaga

Na saunoa foi le Perofeta o Iosefa, “Ua vave ona oo mai le aso o le a faataunuuina ai le toefuataiga o mea uma, lea na valoia e perofeta paia uma, e oo lava i le faapotopotoina o le aiga o Isaraelu.” O se tasi o i latou na vavalo faapea o Ieremia i le Feagaiga Tuai:

“Faauta, e oo mai ona po, o loo fetalai mai ai Ieova, e le toe fai ane ai tagata, O loo soifua Ieova, o Le na aveina ae le fanauga a Isaraelu nai le nuu o Aikupito;

“Ae, o loo soifua Ieova, o lē na aveina a’e le fanauga a Isaraelu nai le nuu i le itu i matu, ma nuu uma na ia tulia ai i latou” (Ieremia 16:14–15).

Na toe tautino mai e le Perofeta o Iosefa, “O i tatou o le nuu faapitoa na finagalo i ai le Atua e aumaia ai le mamalu o Aso e Gata Ai … pe a oo ina faapotopotoina le Au Paia a le Atua ia tasi mai atunuu uma, ituaiga, ma tagata ma gagana.”

Ina ia faataunuuina lena galuega, “Ou te auina atu tagata fai faiva e toatele, o loo fetalai mai ai ieova, latou te fai faiva ia te i latou; e mulimuli ane ou te aauina atu tagata tuli manu e toatele, latou te tutuli ia te i latou mai atu mauga uma, ma mauga uma, ma mavaevae o papa” (Ieremia 16:16).

Uso e ma tuafafine, i le avea ai ma Isaraelu o le feagaiga o aso e gata ai—tagata o le Ekalesia toefuataiina a Iesu Keriso—o i tatou o faifaiva ma tagata tulimanu a le Alii. Ua valaauina i tatou e faapotopoto mai e ua filifilia e le Alii mai atu mauga uma, mauga, ma nuu laiti. Ua valaauina i tatou e tuuina atu i fanau a le Atua le avanoa e avea ai ma suli atoatoa i mea uma ua Ia folafola mai i Ana fanau faamaoni. O le auaunaga silisili lena e mafai ona tatou tuuina atu.

Tatou te faataunuuina lena poloaiga paia e ala i le faapotopotoina o Isaraelu i itu uma e lua o le veli—faasoa atu le tala lelei o le Toefuataiga i isi, saili mo o tatou tuaa ua maliliu, ma le faatinoina o sauniga sui mo i latou i le malumalu. Tatou te faataunuuina foi lena poloaiga a o tatou faasoa atu le alofa o le Faaola e ala i la tatou auaunaga, faataitaiga, molimau, ma le valaaulia i isi e auai faatasi ma i tatou.

“O loo taitaiina e le Alii le Toefuataiga o Lana talalelei ma Lana Ekalesia,” o le saunoaga lea a Peresitene Henry B. Eyring, Fesoasoani Lua i le Au Peresitene Sili. “E muamua atu o Ia ia i tatou. Ua Ia silafia lelei le lumanai. Ua Ia valaaulia oe i le galuega. Na te faatasi mai ma oe.”

O Se Avanoa ma se Faatuatuaga

O le a le mea na tupu i le uati a tamamatua Nelson? I ni nai tausaga ua mavae, sa ou tuuina atu ai i lo’u atalii. E pei ona sa i ai ia te au, o lena uati ua fesootai atu ai nei o ia i ona tuaa ma faamanatu atu ai ia te ia lona tiute i lana fanau.

Ma alu ai faapena. O augatupulaga taitasi o le feagaiga e faaauaua pea le galuega a le Alii, i le faia o lana vaega i le saunia o le lalolagi mo le Afio Mai Faalua o Iesu Keriso.