“O Lau Meaalofa Lenei,” Liahona, Ianuari 2025.
O Leo o le Au Paia o Aso e Gata Ai
O Lau Meaalofa Lenei
“Tama Faalelagi e,” sa ou tatalo ai, “o le a se meaalofa e mafai ona ou atiina ae o le a faamanuiaina ai Lau fanau?”
A o avea Yanina ma se tamaitai talavou, sa musuia o ia e iloa o le pese o se meaalofa e mafai ona ia faaaogaina e faamanuia ai isi. Mulimuli ane, sa filifilia o ia e avea ma se tasi o tagata faavaomalo e pepese faatasi ma le Aufaipese a le Tapeneko i le taimi o le konafesi aoao (ata na pueina i le Tapeneko o Sate Leki).
Ina ua asiasi atu Peresitene Gordon B. Hinckley (1910–2008) i Ekuatoa i le 1999, sa ou faalogoina o ia fai mai, “Po o le a lava le mea e te filifili e fai, ia fai le mea sili e te mafaia.”
A o ou laitiiti, sa ou aoaoina e tuuina mai e le Atua ia i tatou meaalofa e mafai ai ona tatou faamanuiaina isi (tagai i le Moronae 10:8–18). Sa ou tatalo, “Tama Faalelagi e, o le a se meaalofa e mafai ona ou atiina ae o le a faamanuiaina ai Lau fanau?”
I le 16 o o’u tausaga, na amata ai ona ou aoao e pese i le faamalosiauga a le faatonu o le fale mo aoaoga taufaafiafiaga i le lotoifale. “E ese le manaia o lou leo,” sa ia fai mai ai ia te au.
Ina ua patipati le aofia ina ua maea la’u uluai faafiafiaga o le pese, sa manino mai i lo’u mafaufau se fuaitau: “O lau meaalofa lenei.” Sa ou tagi ona ua tali mai la’u tatalo. Ae peitai, i lo’u atunuu, e mafai ona faigata ona maua se mea e ola ai o se tagata musika. Ae sa ou iloaina e saunia e le Alii se ala. O lea, sa faaauau ai pea ona ou aoao e pese, ma saili ia avea ma tagata sili ou te mafaia.
Ina ua 19 o’u tausaga, na tuuina mai ai ia te a’u se sikolasipi e aoga ai i fafo. Peitai, na lē taunuu lenā avanoa ma isi avanoa faapena. I le toe mafaufau ai, ua mafai ona ou iloa ai sa finagalo le Alii ou te nofo i Ekuatoa.
Sa fai mai tagata e leai so’u lumanai i musika aua e leai sa’u aoaoga iloga i atunuu i fafo, tamaoaiga, po o le lauiloa o lou igoa. Ae sa ou iloaina sa i ai se fuafuaga a le Atua mo a’u, o lea sa ou tuuina ai la’u taleni e auauna atu ai i le Ekalesia, lea sa ou faiaai ni aufaipese, taitaiina musika, ma taumafai e musuia isi e atiina ae a latou meaalofa ma taleni.
Mulimuli ane, ina ua ofoina mai ia te a’u se galuega i se fale televise, sa ou popole i faaosoosoga e fesootai ma le pisinisi o faafiafiaga. Ae o le tali i a’u tatalo o le, “Talia le galuega ma faaali atu e mafai ona avea oe ma se tagata faafiafia [pese] e aunoa ma le fetuutuunai o ou tulaga faatonuina.”
Sa ou galue o se fesoasoani i le gaosiga o faatufugaga i le televise, o se faatonu fesoasoani o le aufaipese mo le Aufaipese a Guayaquil, ma i ai i le fono faatonu o le Maota o Aganuu a Ekuatoa mo le itumalo o Guayas.
Ou te molimau atu e mafai ona faataunuu a tatou miti e aunoa ma le ositaulagaina o a tatou mataupu faavae. O le asō ua iloa ai lo’u igoa i lo’u atunuu ma la’u galuega—faafetai i la’u tautinoga e ola i le talalelei ma atiina ae meaalofa ua tuuina mai e le Tama Faalelagi ia te a’u.
A tatou usiusitai i le finagalo o lo tatou Tama, o le a mafai ona faia mea e foliga mai e le mafai (tagai i le Mataio 19:26). Ou te iloa e alofa o Ia ia i tatou ma e finagalo e fesoasoani ia i tatou e atiina ae a tatou meaalofa e faamanuia ai isi.