Faamanuiaga o le Malumalu

“O le aso muamua lava na ou savali atu ai i totonu o le Malumalu o Sate Leki a o ou talavou, sa ou maua ai se lagona sa ou i ai muamua iina. I se taimi vave lava, na oo mai ai se manatu ia te au o le mea sa ou iloaina o se lagona o le filemu e sili atu nai lo soo se mea sa ou lagonaina muamua i lenei olaga, ae sa foliga mai sa ou iloaina ma toetoe lava a manatuaina ae ou te lei fanau mai.

“Sa tatou iloaina lo tatou Tama Faalelagi ma Lona Alo Pele ae tatou te lei o mai i le Lalolagi. A o tatou auai i le malumalu, e mafai ona tatou lagonaina le filemu o a tatou fegalegaleaiga ma i Laua i le olaga ua mavae, ma e mafai ona faamanatu mai ia i tatou le natura e faavavau o o tatou agaga ma lo tatou manao silisili e toe foi atu i lo tatou aiga faalelagi.

“Osia ma tausia feagaiga paia ma le Atua. E leai se mea e sili atu ona taua nai lo le faamamaluina o a outou feagaiga o le malumalu.”

“Ina ua te’a ese Keriso mai Ona soo ma ‘ua siitia i le lagi’ (Luka 24:51), sa toe foi atu soo i Ierusalema ‘ma le olioli tele’ (Luka 24:52) ma ‘sa i le malumalu i latou e le aunoa, o latou viia ma faamanu i le Atua’ (Luka 24:53).

“O le asō, ua faamanuiaina ai e le Atua tagata faamaoni o le Ekalesia toefuataiina a Iesu Keriso i le lalolagi atoa e ala i le taitaiga paia e alamai i Lana perofeta e fausia malumalu. O malumalu o Le Ekalesia a Iesu Keriso o le Au Paia o Aso e Gata Ai o ni avanoa paia ia e mafai ai e se tasi ona lagonaina le latalata faapitoa atu i le lagi ma olioli ai i le uunaiga a le Agaga Paia.

“I a ma malaga talu ai nei i le salafa o le lalolagi, sa ma asiasi atu ai ma Harriet i malumalu i ni tulaga eseese o le faamaeaina. O asiasiga uma lava e faamanuiaina ai i maua i lagona o le filemu ma le olioli—pe ma te ulufale atu i le maota o le Alii pe faaalu se taimi i lotoa lata ane. Pe a ma asiasi atu i taitai o malo po o faalelotu i nei atunuu, sa i ai lava i taimi uma se lagona o le faaaloalo, maofa, ma le lotofaafetai mo la tatou aoaoga faavae o le tuufaatasia o aiga e ala i faamanuiaga o malumalu.

“O le fausiaina o malumalu i le salafa o le lalolagi e fesoasoani ia i tatou e latalata atili atu ai ia Iesu Keriso. O loo i ai o Ia i le totonugalemu o malumalu uma. O Iesu Keriso o le a avea ma o tatou taiala ma le tusiata sili e toe fausia, toefuatai, ma toe faafou o tatou lava olaga e tusa ai ma le fuafuaga a le Atua o le fiafia.

“O feagaiga na osia ma mataupu faavae o loo aoaoina i malumalu paia o Le Ekalesia a Iesu Keriso o le Au Paia o Aso e Gata Ai o le faaaogaina aoga lea o le alofa o le Atua mo Ana fanau taitoatasi. O le taliaina o lenei alofa i o tatou olaga i aso taitasi—e oo lava i laasaga laiti i aso taitasi—o le a taitai atu ai i tatou i se nofoaga o le sulufaiga ma le avea ma ni ō i taimi faigata.”

“O le malumalu o se sootaga i le va o le lagi ma le lalolagi. Ua mamanuina e lo tatou Tama Faalelagi e aoao ai ma fesoasoani ia i tatou i la tatou malaga e toe foi atu ai i Lona afioaga. Afai tatou te faamaoni i le olaga nei, e ala i le ulufale atu ma tausia le feagaiga o le talalelei, o le a tatou maua le ola e faavavau.

“O lenei malumalu—ma malumalu uma o aso e gata ai—ua maua ai la tatou molimau vaaia, ma le faaletino i le moni o le Togiola talu ai a aunoa ma Lana Togiola ma le Toetu, semanu e leai se faamoemoega o le malumalu.

“E faaaoga e le Alii Ona malumalu e tuuina mai ai i o tatou luga ma o tatou augatupulaga—i le taimi ua tuanai, taimi nei, ma le lumanai—faamanuiaga ia e na o se fale ua Ia faauuina mo lena faamoemoega e mafai ona tuuina mai ai.”

“A o tatou ulufale atu i totonu o le malumalu, tatou te laa ese mai le lalolagi mo sina taimi le tumau. Tatou te faataatia o tatou faafitauli ma luitau i lalo i le faitotoa ma taulai atu o tatou mafaufau i mea a le Atua, i sauniga ma feagaiga o le faaolataga ma le faaeaga. Tatou te toe suia le taulai o o tatou mafaufauga ma manaoga i le vaaiga paia.

“Tatou te lagonaina ma le naunautai sili atu le filemu ma le alofa e sau mai lo tatou Tama Faalelagi ma lo tatou Faaola e ala i le Agaga Paia. Tatou te lagonaina lena lava alofa mo o tatou tina ma tama o augatupulaga ua mavae ma naunau e fusia faatasi ma i latou e faavavau. E faafouina i tatou i se talisapaia o lo tatou lava taua e le gata ma lo tatou naunautaiga e galulue e tusa i ai.

“A o tatou tuua le malumalu, tatou te iloa ai o loo i ai pea faafitauli ma luitau na tatou faataatitia i le faitotoa. Ua faamalosia i tatou e toe tauaveina. E lei suia lava, ae o le mea e faafetai ai, ua suia i tatou i lo tatou taimi i le malumalu. E mautinoa ma sili atu ona sa’o la tatou vaaiga. Ua tatou iloa nei o mea sa foliga mai e lofituina ai ma le mafaia faatasi ai ma le fesoasoani a le Alii, ua mafai ona maua \se fofo, ma ua sili atu ona tatou mautinoa Lana fesoasoani.

“I le isi itu, o nisi o mea laiti sa foliga mai e le taua, ua tatou iloaina e manaomia le gauai atu i ai i le taimi nei ina ia aua nei avea ma ni mataupu ogaoga ma ni taunuuga leaga mo i tatou po o isi foi i le taimi a sau. I se faapuupuuga, faatasi ai ma lo tatou taimi i le malumalu ua faamamaina ai i tatou, e tusa lava pe na o sina tikeri itiiti, ma ua sili atu ona latalata mai le lagi.”

“O le masina ua tea, sa ou faafetai ai i le auai i le faauuga i le perisitua o atalii e toatolu o la’u fanau mai le aiga lava e tasi i le aso lava e tasi—o Ioane o se ositaulaga, o Tavita o se aoao, ma Uili o se tiakono. O le vaiaso na sosoo ai, sa matou auai faatasi ai i le malumalu. Sa mafai e Ioane ona papatisoina ona uso, faatasi ai ma lona uso matua, o Iasoni, o le o loo sauniuni mo se misiona. Sa ulu atu Uili i le malumalu mo le taimi muamua! Oka se faamanuiaga o le i ai o le perisitua i o tatou aiga! Oka se faamanuiaga o le i ai o le malumalu mo fanau a le ma fanau! O nei taimi faaleaiga e lua o ni manatuaga taua ia o le a ou manatua pea.

“O le faatinoina o galuega o le malumalu ma le ola e tusa ai ma tiute paia o le perisitua o le a tuufaatasia ai aiga i itu uma e lua o le veli—e pei lava ona faia e nei mea e lua mo lo’u aiga. I totonu o le malumalu, tatou te lagonaina ai le mana mai luga e fetaiai ai ma luitau i o tatou olaga patino ma totonu o o tatou aiga. E tuputupu ae lo tatou alofa mo le tasi ma le isi ma le Faaola a o tatou taulai atu i le natura e faavavau o a tatou sootaga.”

“O le maota o le Alii o se nofoaga paia i le va o le lagi ma le lalolagi lea tatou te iloa atili ai lo tatou Tama ma Lona Alo Pele, o Iesu Keriso.

“Sa faamanatu mai ia te au lenei mea i le aso a o ou maua le avanoa faapitoa o le tofiaina e Peresitene Russell M. Nelson e faapaia le Malumalu o Brasilia Pasila o Le Ekalesia a Iesu Keriso o le Au Paia o Aso e Gata Ai.

“Oka se faamanuiaga mo i latou o e asiasi atu i lenei malumalu o e o le a faaauau pea ona tuputupu ae i a latou sootaga ma le Atua ma le tasi ma le isi. E faapitoa lava le anoa o lenei mea ona o le lalolagi o le vevesi ma le fenumiai o loo tatou ola ai.

“Ou te valaaulia i tatou uma e o mai i le malumalu pe a outou atuatuvale i luitau i lo outou aiga. O mai pe a e fetaiai ma faaiuga. Pe a foliga mai e mamafa le lalolagi ma ua e saili le filemu. Pe a foliga mai ua e faatoilaloina ma e te manaomia se mana faaopoopo.

“O mai pe a ua fiafia ma foliga mai ua lelei mea uma. O mai e aunoa ma le fesiligia. O mai pe a ua le faanatinati. O mai ua faamagaloina i latou o e na faatiga ia te outou. O mai ma le talitonuina.

“A o tatou faia, o le a faatasi le Agaga o le Alii ma i tatou ma o le a tatou maua le matagofie o le faavavau.”

“O malumalu e fesoasoani ia i tatou e faataunuu ai o tatou gafatia paia. …

“Ioe, tatou te faamamaluina le Alii e ala i le fausiaina o se fale matagofie, e pei ona sa faia e Solomona i le Feagaiga Tuai, ae tatou te faamamaluina atili o Ia e ala i le faatinoina o sauniga paia ia e na o se maota faapaiaina o le Alii e faia ai.

“Matou te valaaulia tagata uma e o mai ia Iesu Keriso ma faia folafolaga paia i Ona malumalu. O le valaaulia mai ia Iesu Keriso e lautele:

“Ia outou o mai ia te a’u, outou uma o e tigaina ma mafatia i avega, o a’u foi e malolo ai outou. … Aua e avegofie la’u amo, o la’u avega foi e māmā ia.’”

Poufaaupu: “E ala i lo tatou faatuatua ia Iesu Keriso, ia avea i tatou ma se sootaga mau i o tatou augatupulaga. Ia tatou fesootai ma o tatou tuaa ma faamanuia o tatou aiga o i ai nei ma le lumanai—o aiga ua tatou maua ma aiga tatou te mananao i ai.”

Vitio: “Uo pele, uso e ma tuafafine pele, ua tatau ona tatou fiafia ma faavavau ma o tatou aiga. O a tatou sootaga e sili ona taua ma pele e le o faamoemoe e faia seia oo ina vavaeeseina oe e le oti. Ua saunia e le Atua, lo tatou Tama Faalelagi, ma Lona Alo, o Iesu Keriso, se fuafuaga paia o le fiafia, e aofia ai sauniga paia ma feagaiga o loo maua i malumalu paia lea e mafai ai e tagata taitoatasi ona toe foi atu i le afioaga o le Atua ma mo aiga ona faatasia e faavavau. O sauniga ma feagaiga paia o le malumalu e fesootai i le lagi mea tatou te faapelepele i ai i le lalolagi.”

“I lo tatou lalolagi pisi lea e masani ona tatou fesili ai po o fea e mafai ona tatou liliu atu i ai mo le filemu, ou te molimau atu e mafai ona maua lenei filemu i le maota o le Alii. I totonu o malumalu o le Atua, tatou te aoao ai po o ai i tatou ma po o ai e mafai ona avea ai i tatou ma faafetai ia Iesu Keriso ma Lana Togiola e le gata ma le fuafuaga o le alofa o lo tatou Tama Faalelagi mo i tatou.”

FaamatalagPoufaaupu [Post]: “E alofa lo tatou Tama Faalelagi ia i tatou ma e finagalo ia i ai se sootaga loloto atu, ma sili atu ona anoa ma i tatou. E ala i lo tatou auai i le malumalu, e mafai ai ona tatou latalata atili atu ia te Ia ma lo tatou Faaola, o Iesu Keriso.”

Ata Pupuu [Reel]: “Talofa, Uo. Ua tatou toe suesueina pese a le Peraimeri i le asō, ma o loo tatou i ai i le itulau 99 o le Tusipese a Tamaiti. O le ‘Ou te Fia Vaai i le Malumalu.’ O se pese e matuai faamomoiloto lava ia te au aua o se tasi lenei o nai pese o le Peraimeri ou te manatuaina, mai tausaga popofou o lo’u avea ai ma tagata auai ina ua uma ona ou papatiso, ma sa ou tosina atu i ai.

“Ou te fia faasoa atu se vaega o le fuaiupu lua ia te outou. O loo faapea mai: ‘Ou te fia vaai i le malumalu. Ou te ulu i ai i se aso. E osi feagai o le a ou usitai. E paia le malumalu’

“Ma ou te lagona o taimi uma lava ou te saili ai e fai lena tautinoga e ulu atu i le maota o le Alii ma i ai i se nofoaga paia faatasi ma lo’u Faaola, faatasi ma le Tama Faalelagi. Ou te lagona o loo ou faia se mea e aumaia ai au ia latalata atili atu ia i laua uma ma mafai ai ona ou aoao ma tuputupu ae i auala e taua ia i laua.

“Sa ou mafaufau i lenei fuaiupu i le Mataupu Faavae ma Feagaiga 124. O le fuaiupu e 40, ma e faitauina faapea, ‘Ma e moni ‘Ou te fai atu ia te outou, ia tuu atu ia fausia lenei fale mo loʼu igoa, ina ia mafai ona ‘Ou faaali atu ai i totonu [aʼu] sauniga i loʼu nuu.’

“Ma sa ou mafaufau moni lava pe faapefea ona avea le malumalu ma maota o le Alii. Ma ua Ia valaaulia Lana fanau uma i Lona fale, ma ua Ia valaaulia i tatou ia faia se sootaga e ala i nei sauniga ia e na o iina e maua ai. Ou te talosaga atu ia te outou e mafaufau e talia le valaaulia a le Faaola e o mai i Lona maota ma noatia ia te Ia e ala i feagaiga ma aoao mea e manaomia e ia oe e aoao ai e tuputupu ae faatasi ma Ia. Ta toe feiloai ai iina! Tofa mo le taimi nei, uo!”