“Ann ma Newel Whitney ma le Ala o Feagaiga,” Liahona, Ian. 2025.
Ann ma Newel Whitney ma le Ala o Feagaiga
E pei o Ann ma Newel Whitney, tatou te malaga foi i le ala o feagaiga e ala i le salamo, auauna atu, ositaulaga, ma olioli i le ala.
O le faleoloa a le au Whitney i Katelani (o loo faaalia iinei i le 1907) na faatupeina ai le tele o le tuputupu ae o le Ekalesia i Ohaio ma Misuri i le vaitau o le 1830.
Ata na pue e George Edward Anderson, 1907
Ina ua siitia atu Elisapeta Ann Samita e 18 tausaga i Ohaio, sa ia feiloai i se alii faipisinisi aulelei e igoa ia Newel K. Whitney. Sa ia faamatalaina o ia o “se alii talavou [o le] na sau i Sisifo e ‘saili lona tamaoaiga.’ Sa ia te ia le faaeteete ma le malosi, ma sa vave ona ia faaputuina meatotino nai lo le tele o ana … paaga.” Sa la faaipoipo ia Oketopa 1822 ma sa co se “ulugalii fiafia, ma ni faamoemoega lelei ma gafatiana faapolopoloina.”
Sa la nonofo i Katelani, Ohaio, lea sa faatautaia ai e Newel se kamupani fefaatauaiga faamanuiaina.
E mafai ona tatou vaaia mamanu o fegalegaleaiga a le Alii ma Ana fanau e ala i le vaai atu i aafiaga o le au Whitney ma le toatele o isi. Mo se faataitaiga, e mafai ona tatou vaai i le auala na la iloa ai le Faaola ma le auala na Ia fesoasoani ai ia i laua e vaai ia i laua lava o ni fanau o le feagaiga. O le iloa e uiga i na mea e maua ai se malamalamaaga loloto atu i faaaliga a le Alii i le Mataupu Faavae ma Feagaiga.
Saunia e Talia le Afioga a le Alii
Sa filifili matua o Ann e tausia o ia e aunoa ma se tapuaiga. Sa i ai ia Newel se mafaufau faapisinisi. Ae a o la faatuina se fale, i Katelani, sa lagona e Ann se mea o loo misi i o la olaga. Sa amata ona la saili mo se lotu e mulimuli i le talalelei e pei ona aoao mai e Iesu Keriso i le Feagaiga Fou. Mo se taimi sa latou tapuai faatasi ai ma Alexander Campbell i le O Soo o Keriso.
Sa faamatala e Ann, “I se tasi po, a o ma i ai ma lo’u toalua i le ma fale i Katelani, sa ma tatalo i le Tama e faaali mai le ala, ae oo mai le Agaga i o ma’ua luga ae faamalumalu ifo se ao i le fale. … Sa faatumulia i ma’ua i se maofa a’ia’i. … Sa ma faalogoina se leo … na faapea mai, ‘Sauni e talia le afioga a le Alii, aua e oo mai.’”
I Niu Ioka, e faitau selau maila le mamao, na fetalai atu ai le Alii ia Iosefa Samita e auina atu faifeautalai e talai atu le talalelei. Ina ua talai atu na faifeautalai—na taitaia e Oliva Kaotui ma Pale P. Palate—i Katelani, sa faalogo Ann ma mulimuli ane tusia, “Sa ou iloaina o le siufofoga lea o le Leoleo Mamoe Lelei.” O le molimau a faifeautalai, o isi tagata talitonu e pei o Lusi ma Isaako Morley, ae o le mea e sili ona taua, o le Agaga Paia, na taitaiina ai i laua e osia feagaiga paia. Na papatisoina Ann ma Newel i Le Ekalesia a Iesu Keriso o le Au Paia o Aso e Gata Ai ia Novema 1830.
Ina ua taunuu i Katelani i le 1831, sa faailoa atu e Iosefa Samita o ia lava ia Newel, ma faapea atu, “O au o Iosefa, le Perofeta. … Sa e tatalo ia ou i ai iinei.”
Ata na tusia e Paul Mann
Feiloa‘i i le Perofeta o Iosefa
O se isi faaaliga na ta’u atu ai i le Au Paia e “o atu i Ohaio,” lea o le a latou maua ai “se faamanuiaga e lei iloa lava i totonu o le fanauga a tagata” (Mataupu Faavae ma Feagaiga 39:14–15; tagai foi i le 37:1).
Na taunuu Iosefa ma Ema Samita i Katelani ia Fepuari 1831, ma sa ave i laua e Newel ma Ann i lo la fale mo se masina. E sefuluvalu masina mulimuli ane, na la toe saunia ai se fale mo Iosefa ma Ema i le la faleoloa na toe faafouina.
Sa amata ona vaaia e le au Whitney se ata manino ma malamalama atu o lo latou faasinomaga e faavavau. Mulimuli ane i lena tausaga, na faaali mai ai e le Alii i le Perofeta o Iosefa e tatau ona avea Newel ma epikopo i Katelani. Na faapea mai Newel, “E le mafai ona ou vaaia o a’u o se epikopo ia te a’u lava, uso Iosefa; ae afai e te saunoa mai o le finagalo lea o le Alii, o le a ou taumafai.”
Sa tali atu Iosefa, “E le tatau ona e talia na o la’u upu. Alu e fesili ia Tama mo oe lava.”
Ina ua uma ona tatalo, sa faalogoina e Newel se leo mai le lagi o faapea mai, “O lou malosi o loo ia te au lea.”
O se vaitaimi lenei o le tuputupu ae mo Newel ma Ann a o la galulue faatasi e tausia a laua feagaiga. Na tusia e Ann e uiga i se tasi o auala na la auauna atu ai i isi:
“E tusa ai ma le mamanu a lo tatou Faaola … , sa ma filimaoti e fai se Tausamaaga mo e Matitiva … ; o e pipili, o e setu, o e logonoa, o e tauaso, o e ua matutua ma e vaivai.
“Na tolu aso le umi o lenei tausamaaga, o le taimi lea na valaaulia ai tagata uma i le vaipanoa o Katelani o e o le a o mai. … Ia te au lava ia, o “le faigaai o mea lelei” [Isaia 25:6] e moni lava; o se vaitau o le olioli e le mafai ona faagaloina.”
Sa auauna mulimuli ane Newel o se faifeautalai faatasi ma Iosefa Samita ma o se paaga i le Kamupani Tuufaatasi, o se faalapotopotoga faapisinisi mo le taulimaina o manaoga o le Au Paia. O tupe na maua mai lona faleoloa na faatupeina ai le tele o le tuputupu ae o le Ekalesia i Katelani ma Misuri, ma sa ia auauna atu i le Ekalesia i le tele o isi auala. Atonu o le mea e sili ona tāua, e toa 14 le fanau a Ann ma Newel ma tausia le toa 10 seia oo ina matutua.
O isi na faapotopoto e fausia siteki o Siona. Sa taumafai le au Kimball, Young, Crosby, Tippet, ma le toatele o isi e faatotonugalemu o latou olaga i le talalelei a Iesu Keriso. Na aumaia e i latou taitoatasi le malosi ma taleni patino. O uluai faaaliga na taialaina, aoaiina, ma faamautinoaina i latou ma taitaia le Ekalesia ua faatoateleina.
Fausiaina o le Maota o le Alii
Mo uluai tagata o le Ekalesia, i se tulaga tuufaatasi ma i le faaletagata lava ia, o le mauaina o le faaeega paia folafolaina o le mana o le totonugalemu lea o a latou taumafaiga faaletino ma faaleagaga (tagai i le Mataupu Faavae ma Feagaiga 38:32).
Sa poloaiina soo e le Alii le fausiaina o malumalu i Katelani ma Misuri. I Katelani, sa faamanuiaina le Au Paia i taumafaiga lototoa e fausia se fale ofoofogia. O la latou taumafaiga sili lea e fausia se mea e agavaa mo le Alii o Iesu Keriso. O loo tu pea le malumalu i le asō. O le faleoloa a Newel, faatasi ai ma lana fale penuili na lata ane, o ni vaega taua ia o le tamaoaiga i Katelani lea na lagolagoina le galuega faatino o le malumalu.
I le 1836, na faaali mai ai le Faaola i le malumalu ma talia a latou taumafaiga. Na Ia folafola mai o Lona nuu “o le a matua olioli tele lava i faamanuiaga o le a liligi atu, ma faaeega ua faaeeina ai a’u auauna i lenei fale” (Mataupu Faavae ma Feagaiga 110:9). Ona o mai lea o Mose, Elaia, ma Elia ma faaee atu ki taua i le tisipenisione mulimuli (tagai i le Mataupu Faavae ma Feagaiga 110:11–16).
Ata e le’i tusia se aso o Newel K. Whitney o se alii talavou
Sauaga ma Popolega Faalelalolagi
O aso o lumanai o le a tofotofoina ai le Au Paia, e aofia ai ma le au Whitney. I se tulaga pa’u o le tamaoaiga i le atunuu atoa ma le popolevale i faletupe o teugatupe, e toatele na liliu atu e tetee i le Ekalesia ma le Perofeta. Sa poloaiina Newel e siitia atu i Misuri, ae sa musu. Sa ia faaaluina lona olaga atoa i lana faleoloa i Katelani. O le tele o le tamaoaiga na maua mai ai na lagolagoina ai le Ekalesia. E faapefea ona ia savali ese mai ai?
Sa aoaiina o ia e le Alii ona o le gauai tele atu i mea o le lalolagi ma mo le “faatauvaa atoa o le agaga” (Mataupu Faavae ma Feagaiga 117:11). Sa salamo Newel ma usitai. Sa faamautu o ia i Navu, Ilinoi, lea sa faaauau ai pea ona auauna atu o se epikopo ma mulimuli ane avea ma Epikopo Pulefaamalumalu.
Sauniga o le Malumalu
I Navu, sa toe avea ai le malumalu ma totonugalemu o gaoioiga faaletino ma faaleagaga. A o amata ona faatutu i luga puipui o le malumalu, sa faatulagaina e le Alii le Aualofa e ala i Lana perofeta. O Ema Samita o le uluai peresitene, ma o Sara Cleveland ma Ann Whitney o ona fesoasoani. Sa faamatuu atu e Ema tiute taua ia Ann ma talosagaina o ia e taitai le faalapotopotoga pe a le i ai o ia iina.
Sa faaauau pea ona faaali mai e le Alii ia sauniga o le malumalu i le Perofeta. I le 1842, faatasi ai ma le Malumalu o Navu e lei maea lava, sa faapotopoto ai e Iosefa Samita taitai o le Ekalesia, e aofia ai Newel, i le fogafale pito i luga o lona Faleoloa Piliki Mumu ma faatautaia le sauniga o le faaeega paia. Ina ua faapaiaina se vaega o le malumalu—o le pito i luga—, sa tuuina atu uma e Ann ma Newel le faaeega paia i isi Au Paia ae la te lei malaga atu mo le Vanu o Sate Leki.
I le ala o le feagaiga, sa saili ai e Ann ma Newel le Faaola, salamo, auauna atu ma le loto atoa, faapaiaina, ositaulagaina, ma olioli. Na la iloa Iesu Keriso ma vaai ia i laua lava o ni fanau o le feagaiga. E faitau miliona i latou ua mulimuli i le mamanu lava lea e tasi e osia ma ola ai i feagaiga paia ma fausia le malo o le Alii. O le taumafaiga ia iloa a latou tala e fesoasoani ia i tatou i o tatou vaitau o taimi lelei ma taimi o tofotofoga.
Ata na pueina e le’i tusia se aso o Ann Whitney i se taimi mulimuli ane o lona olaga
I le latalata atu i le faaiuga o lona soifuaga, na tusia ai e Ann: “Ina ia lagona ua e maua sina malamalamaaga laitiiti i faamoemoega o le Atua i le foafoaina ai o oe … e mafai ona e iloa ai e aoga ona ola ai mo nei mea, e aoga ona mafatia ai mo nei mea? Pe mafai ea e soo se osigataulaga ona tele tele … pe a tatou mulimuli i tulagaaao o lo tatou Matai?”