O Le Aso e Sili ona Matagofie

Na maliu lo’u tamā o Claude Roy i le 2015, ae le’i leva ona papatisoina. O le taimi lena, ua fai si leva ona avea lo’u tina, o ma matou ma nai ou tei, ma tagata o le Ekalesia, ae mo le tele o tausaga sa tumau pea le le naunau o lo’u tamā e auai.

I le aluga o taimi, sa ia fai mai ai, “sa faamaaa lo’u loto, ma sa oo ina ou le fiafia i asiasiga mai la’u fanau ma fanau a fanau ma sa ou manao e faaesea au lava mai lo’u aiga. Sa faatupulaia feeseeseaiga i lo’u fale, ma sa oo ina le mautonu la’u mafutaga ma lo’u toalua.”

I le taimi lea, na amata ai ona ia toe sueina ona tuaa apoliki-Kanata, o e na tupuga mai i taganuu eseese o nuu o Mi’kmaq ma Huron-Wendat. Ina ua uma ona fesootai atu i le nuu o Mi’kmaq e latalata i le mea sa ia ola ae ai, sa valaaulia o ia i se powwow, o se sauniga a tagatanuu moni o le lauelele o Amerika.

I le afiafi o le powwow, sa tatala ai e le taitai maualuga ona lima ma fai atu i tamaiti e o mai ia te ia ina ia mafai ona ia faamanuiaina i latou. O le lauga na sosoo ai e uiga i le taua o le aiga ma e e tupuga mai ai na taia ai lo’u tamā e pei o se faititili.

I lena taimi, sa ia fai mai ai, “Sa ou vaaia lo’u aiga o faaloaloa mai o latou lima ia te au ae liliu atu lo’u tua ia i latou. Sa faatumulia au i se faanoanoa lofituina, ma le le mafaamatalaina e pei ua nutimomoia lo’u loto. Sa ou iloaina i lena taimi sa faaaoga e le Alii upu a le ituaiga o o’u tuaa e faamaluluina ai lo’u loto. Sa ou iloaina e tatau ona ou liliu atu i lo’u Tama Faalelagi ma toe faaleleia mea leaga na ou faia i lo’u aiga.”

Sa amata ona faalelei Tama ma lo matou aiga, ma ole atu mo se faamagaloga mai tagata taitoatasi o le aiga. Faatasi ai ma le faataitaiga a lona toalua ma lana fanau, sa amata ai ona ia tatalo ma faitau le Tusi a Mamona. Ina ua uma ona faitau i le tele o talafaasolopito e uiga i le konetineta o Amerika, sa ia lagonaina le tosina atu i le Tusi a Mamona. Na vave ona faamautu atu iā te ia lona moni.

“I le siomia ai e lo’u aiga, sa papatisoina ai au o se tagata o Le Ekalesia a Iesu Keriso o le Au Paia o Aso e Gata Ai,” o lana tala lea. “O le aso sili lena ona matagofie i lo’u olaga! Ou te molimau atu i le mana o se faataitaiga alofa. Mo le 36 tausaga, sa tausia e lo’u toalua lona faatuatua ma sa avea ma se faataitaiga faaKeriso ia te au, e ui ina sa faamaaa lo’u loto. Ona suia lea o mea uma mo au i se tasi faaiuga o le vaiaso.”

O le tala a lo’u tama ua faamanatu mai ai ia i matou e faapea o “aao o le alofa mutimutivale o le Faaola ua faaloaloa mai ia [i tatou]” ma a tatou salamo, o le a Ia taliaina moni lava i tatou (tagai i le Alema 5:33).