Tala Fiafia o le Alofa ma le Olioli

Na tafa mai se aso fou mo le aiga o tagata i totonu o se togavao, lea na faaali mai ai le Atua le Tama ma Lona Alo, o Iesu Keriso, ma fetalai atu ia Iosefa Samita e tali atu i le tatalo a le taulealea o Iosefa po o le fea ekalesia e tatau ona ia auai i ai (tagai i le Iosefa Samita—Talafaasolopito 1:14–20). Sa ta’u atu e Iesu Keriso ia Iosefa e aua le auai i soo se ekalesia. Na Ia folafola mai o le a faaali mai le atoatoaga o Lana talalelei ia Iosefa i le lumanai.

I le toatele, sa foliga mai o Iosefa o le tagata e lē taumate e mafai ona valaauina i se galuega taua faapena, ma sa sa’o i latou. O ia o se tamaitiiti e le’i a’oa’oina ma e le taua tele mai se tamai faatoaga i se taulaga e le’i iloa. E pei lava ona fai mai nisi e uiga i le Faaola i Ona aso, “E mafai ea ona tupu o se mea lelei mai Nasareta?” (Ioane 1:46), e toatele na mafaufau po o le a se mea lelei e mafai ona maua mai se tamaitiiti e 14 tausaga le matua i Palamaira, Niu Ioka. Ae e ala mai ia Iosefa—e pei ona lē taumate e foliga mai ai o ia—o le a faataunuuina e le Tama Faalelagi ma le Alii o Iesu Keriso le mea ofoofogia moni lava. O lenei mea e tatau ona aumaia ai ia i tatou le faamoemoe faapea, i lo tatou ala laitiiti ma le lotomaualalo, e mafai foi ona tatou saofagā atu i ni auala anoa i le galuega a le Alii.

Mulimuli ane, na valaau atu le Alii ia Iosefa “ma tautala atu ia te ia mai le lagi, ma tuu atu ia te ia poloaiga” (Mataupu Faavae ma Feagaiga 1:17). Na maua e Iosefa faaaliga taua ma aoaoga faavae taua lea na aumaia ai se malamalama fou i lo tatou malamalamaaga i le fuafuaga alofa a le Tama Faalelagi ma le alofa togiola o Iesu Keriso ma le mana o Lana taulaga togiola. O le mea e ofoofogia ai, o nei tala fiafia na oo mai i le taimi tonu lava lea o le a mafai ai e le tele o le alualu i luma i femalagaaiga, fesootaiga, ma isi vaega ona faatagaina le malamalama o le Atua e susulu atu e faamanuiaina ai le toatele ma le toatele o Ana fanau.

O le Agelu o Moronae o loo Tuuina Atu Papatusi ia Iosefa Samita, saunia e C. C. A. Christensen

O Se Molimau Mamana o le Alofa o le Atua

O le faaali mai o le agelu o Moronae ia Iosefa Samita sa taua i le Toefuataiga ma se faamaoniga mamana o le alofa o le Atua. Sa ta’u atu e Moronae ia Iosefa se talafaamaumau, na tusia i luga o papatusi auro, na tanumia lata ane (tagai i le Iosefa Samita—Talafaasolopito 1:33–34). Mulimuli ane, o le a tuuina atu ia Iosefa le “mana mai i luga” (Mataupu Faavae ma Feagaiga 20:8) e faaliliu ai lena faamaumauga i le mea o le a avea ma Tusi a Mamona, lea e tu faatasi ma le Tusi Paia ma o se isi molimau ia Iesu Keriso.

I le Tusi a Mamona atoa, tatou te faitau ai i tagata o e, i le faitau selau o tausaga a o lei oo ia Keriso, na iloa ma valoia Lona afio mai ma naunau mo lena afio mai. Tatou te maua foi le tala tulaga ese o le faaali mai ma le galuega patino a le Faaola toetu i sa Nifaē, lea na Ia valaaulia ai tagata uma e o mai ia te Ia ma fetagofi i le faailoga i Lona itu ma tulaga o fao i Ona lima ma vae (tagai i le 3 Nifae 11:14–15). Sa Ia faamaloloina e mamai, e pipili, e tauaso—“ma i latou uma o e na puapuagatia i soo se ala”—ona faamanuia lea o tamaiti laiti ma tatalo mo i latou (tagai i le 3 Nifae 17:7–9, 21). E tele mea ua tatou aoaoina e uiga i le alofa ma le agaalofa o le Faaola mai lenei tala paia.

Ua molimau mai le Tusi a Mamona “O Iesu o le Keriso.” O faamautinoaga i le Tusi a Mamona e faamanatu soo mai ai ia i tatou e alofa lo tatou Tama oi le Lagi ma lo tatou Faaola ia i tatou e sili atu nai lo soo se mea e mafai ona tatou mafaufauina.

Sa faaauau pea le Toefuataiga i le faaali mai o isi avefeau faalelagi ia Iosefa Samita. “Sa toefuata’i mai e Ioane le Papatiso ua toetu le pule e papatiso ai e ala i le faatofuina mo le faamagaloga o agasala. O le to’atolu o ulua’i Aposetolo—o Peteru, Iakopo, ma Ioane—sa toefuata’i maia le tofi faa’aposetolo ma ki o le pule o le perisitua. Sa ō mai fo’i isi, e aofia ai Elia, o lē na toefuata’i maia le pule e faamau faatasi ai aiga e faavavau i mafutaga e faavavau lea ua to’ilalo ai le oti.”

I le aso 6 o Aperila, 1830, na faatuina ai e Iesu Keriso e ala mai i le Perofeta o Iosefa se ekalesia na mamanuina i le ekalesia na Ia faatulagaina i taimi o le Feagaiga Fou (tagai i le Mataupu Faavae o le Faatuatua 1:6), e faaatoatoa i “le faavae o aposetolo ma perofeta, o Iesu Keriso lava ia o le maa tulimanu sili” (Efeso 2:20). Ua faia e le Ekalesia a Iesu Keriso o le Au Paia o Aso e Gata Ai faamanuiaga o le mana toefuataiina o le perisitua ia avanoa mo fanau uma a le Atua o e saunia i latou lava e mauaina.

E pei ona aoaoina i tatou e Peresitene Russell M. Nelson, e mafai ona tatou maua le olioli i le salamo i aso taitasi a o tatou liliu atu i le Tama Faalelagi ma lo tatou Faaola. Mo soo se tasi e lagona le faanoanoa pe latou te le o ausia pe auai: ua valaaulia tagata uma e o mai ia Keriso ma Lana Ekalesia. O le Ekalesia e le o se nofoaga faafaifeau mo e atoatoa ae o se falemai mo e mamai. Ua faamanatu mai e Elder Dieter F. Uchtdorf o le Korama a Aposetolo e Toasefululua ia i tatou e faapea “tatou te le o mai i le lotu e nanā ai o tatou faafitauli ae ia faamaloloina.”

I le lotu tatou te maua ai le olioli i avanoa e liliu atu ai i tatou lava i fafo, auauna atu i isi ma le alofa, ma faasoa atu o tatou lava aafiaga patino faatasi ai ma le tele o le agalelei o Keriso. E mafai ona “faitauina i latou i totonu o tagata o le ekalesia a Keriso” ma “manatua i latou ma tausia i le afioga lelei a le Atua” (Moronae 6:4). Oka se faamanuiaga ina ofoofogia!

Sa tautino mai e le Perofeta o Iosefa Samita i se tasi taimi, “O lenei, o le a le mea ua tatou faalogo i ai i le talalelei ua tatou maua? O se leo o le fiafia! O se leo o le alofa mutimutivale mai le lagi; ma o se leo o le ʼupumoni mai le eleele; o tala fiafia mo e ua oti; o se leo o le fiafia mo e o ola ma e ua oti; o tala fiafia o le olioli tele” (Mataupu Faavae ma Feagaiga 128:19).

Ua oo mai nei tala fiafia ona o le alofa o le Tama Faalelagi ma Lona Alo pele, o Iesu Keriso, ia i tatou ma ua finagalo—e sili atu nai lo se isi lava mea—ia toe faafeiloai i tatou i Lo La’ua afioaga, ina ia mafai ona tatou maua e faavavau le ituaiga olaga o loo La soifua ai. Ua faaalia mai i le Toefuataiga ua La faia mea uma e tatau ai ina ia avea ai lenei mea ma se avanoa mamalu mo i tatou uma. I la tatou malaga e faavavau, o le a tatou oo i tofotofoga ma faigata, ae “ua i ai i [tatou], ina ia [tatou] maua le olioli” (2 Nifae 2:25) i lenei olaga ma le isi. Sa sili atu le iloa e le Perofeta o Iosefa o lenei mea nai lo le toatele.

Sa feagai Iosefa ma teteega ma sauaga masani, ae sa ia tausia pea lona “uiga masani o le fiafia” (Iosefa Samita—Talafaasolopito 1:28). Sa tumau lona olioli, malosi, ma le maufetuunai, ma sa ia faataunuuina le galuega tulaga ese na tuuina atu ia te ia e fai. Ou te faamamaluina le Au Paia anamua uma o e na talitonu, lagolagoina, ma mulimuli i le Perofeta o Iosefa Samita ma faapaiaina i latou lava i le fausiaina o le Ekalesia. Tatou te nofo aitalafu ai ia i latou i se aitalafu o le lotofaafetai ma le mamalu.

Sa gaoā i uluai aso o le Ekalesia, ma e mafai ona gaoā i aso nei. Ae o loo faaauau pea le Toefuataiga. Faatasi ai ma Iesu Keriso i le ulu o lenei Ekalesia, o le a faaauau pea ona taialaina i tatou e perofeta soifua. O le a faaauau pea ona fausia fale o le Alii, ina ia mafai e faamanuiaga o feagaiga e faavavau ma le Atua ona fusia i tatou ia te Ia ma e pele ia i tatou i itu uma e lua o le veli (tagai i le Mataio 16:19). O le alofa o le Atua ma Iesu Keriso o le a oo atu i le lalolagi atoa a o tatou mulimuli i le poloaiga a le Faaola e fafaga Ana mamoe ma faasoa atu Lana talalelei. O le a tatou molimauina le oo atu o upumoni o le Toefuataiga i auala ma nofoaga semanu e faigata ona mafaufauina i aso o Iosefa.

E mafai ona tatou maua le malosi ma le olioli tele—e pei ona sa faia e le Perofeta o Iosefa—a o tatou taliaina ma ola i nei upumoni taua. O le valaau na faia e Iosefa i le Au Paia i ona aso o loo faaauau pea ia i tatou i le asō: “Tatou te lē o atu pea ea i lenei savali sili? O atu i luma ae lē o le solomuli. Lototetele, … o atu pea, o atu pea i le manumalo! Ia olioli o outou loto, ma ia fiafia tele” (Mataupu Faavae ma Feagaiga 128:22

Tau ina ia faamanuiaina ma taialaina o tatou olaga i tala fiafia o le alofa ma le olioli lea e aumaia e le Toefuataiga—i le taimi nei ma le taimi uma.