Pe o Lo’u Valaauga Faamisiona o se Mea Sese?

E lua tausaga talu ona faagasolo la’u faailoga o le matematika ma mea tautupe, sa ou maua ai se uunaiga malosi e alu i se misiona. Sa ou filifili e auauna atu, e ui lava o le a ou le mauaina ni togi faapitoa i le kolisi lea sa tatau ona faia i se taimi sosoo.

E lei leva mulimuli ane, a o ou faitauina lo’u valaauga faamisiona i le Misiona Tutotonu a le Aai o Sate Leki i Iuta, sa lagona e pei e le o tupu i lea taimi. Ou te le’i iloaina se tasi na auauna atu i le Aai o Sate Leki. Sa ou manatu atonu ua sese le valaauga faamisiona ua ou tatala. Ina ua ou taunuu i le Aai o Sate Leki, sa ou lagonaina ua aveesea mea uma sa ou iloaina. Sa ou i ai i luga o se uila vilivae i le kiona e aunoa ma se iloa pe faapefea ona avea ma se faifeautalai. Faatasi ai ma le ese o lona aganuu ma le tau, sa lagona ai le mamao ese lava o le Aai o Sate Leki mai Aferika i Saute e pei ona sa mafai ona ou malaga ai.

I la’u eria muamua, sa ma asiasi atu ai ma la’u soa i se tagata e igoa ia Chris Ruppel mo le taumafataga o le afiafi. Sa ia fesili mai pe i ai se tasi o i matou e iloa musika. Na ta’ua e la’u soa ou te ta piano ma pese, o lea sa ou usuina ai se pese mo le aiga. Ona tupu ai lea o se mea faapitoa lava. Sa tilotilo mai Uso Ruppel ia te au ma fai mai, “Elder Vizzini, afai e te pese pea faapena, o le a avea oe ma se faifeautalai faamanuiaina.” Sa ou manatu i lona lelei i lea tala ae sa le’i mafaufau tele i ai.

I ni nai masina mulimuli ane, faatasi ai ma Uso Ruppel, sa ma fesoasoani ai e faatulaga se faeasaite faamusika a faifeautalai. I eria uma sa ou auauna atu ai mulimuli ane, sa matou faaaogaina lea lava faatulagaga e tasi i faeasaite. E toatele tagata na auai faatasi ma i matou, mai tagata o le siteki e oo i tagata musika lauiloa i le lotoifale ma tagata o isi faatuatuaga. Sa matou aoao atu e uiga i le Faaola e ala i musika i tagata o e semanu e le mananao e nonofo i se lesona. Sa ou aoaoina e mafai e musika ona pai atu i e matitiva ma e mauoa, o ē aoaoina ma e le’i aoaoina.

Na aoaoina au e la’u misiona e mafai ona ou faia mea faigata. A o ou auauna atu i se eria mamao ma ese mai lo’u aiga, sa ou aoaoina ai o tagata uma o se atalii/afafine o le Atua. Ua ou vaai i vavega i olaga o tagata i le isi itu o le lalolagi i Iuta, ma ua ou vaai i ai iinei i Aferika i Saute. Ou te iloa afai e i ai na o lo faatuatua lava, e mafai ona tutupu vavega i o tatou olaga taitoatasi (tagai i le Mamona 9:15–21).