O Faamanuiaga o le Toefuataiga

I tausaga ua mavae, sa ou lagonaina ai le pei lava o Iosefa talavou. Sa ou le mautonu i le “taua o upu ma vevesi o taofi” (Iosefa Samita—Talafaasolopito 1:10) na sau mai le tele o lotu eseese i Fiti. Ina ua ou feiloai muamua i faifeautalai, sa tele naua a’u fesili. Ua faatausuai nisi faapea o a’u o se tagata e tuai le aoao aua sa ou faaaluina le valu tausaga e sailiili ai i le Ekalesia. Na amata lo’u liua e ala i le malamalama i le igoa o le Ekalesia.

I le gasologa o Lana galuega i le lalolagi, na faatu ai e Iesu Keriso Lana Ekalesia. I le aluga o taimi, na leiloloa ai aoaoga faavae autu ma le pule o le perisitua a Lana Ekalesia. I o tatou aso, na toefuatai mai ai e Iesu Keriso e ala mai i le Perofeta o Iosefa Samita le ekalesia lava lea na Ia faatuina a o soifua o Ia i le lalolagi (tagai i le Mataupu Faavae o le Faatuatua 1:6). Sa Ia poloai mai foi e ala i faaaliga, “Aua o le a faapea ona ta’ua la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai” (Mataupu Faavae ma Feagaiga 115:4).

Ua tauaveina e le Ekalesia le suafa o Iesu Keriso aua o Lana Ekalesia lea! Ina ua mavae le valu tausaga, o lenei upumoni na faatumulia ai lo’u mafaufau ma lo’u loto. Sa ou papatiso i le 27 o ou tausaga ma e lei umi ae valaauina o se fesoasoani i le au peresitene o Alii Talavou a le uarota ma se faiaoga seminare i le taeao po. I le faasologa o le ala, sa faaauau pea ona tuputupu ae la’u molimau.

Na suia lo’u olaga a o ou faiaoga i le seminare, auai i sauniga faamanatuga, ma faalogologo i le konafesi aoao. Sa ou lagonaina foi le mālu, faamafanafanaga, ma le musuia o le faatosinaga a le Agaga a o ou faitauina le Tusi a Mamona—o se faamaoniga ma se faaaliga faitino o le Toefuataiga ma le valaauga faaperofeta o Iosefa Samita.

Ina ua valaauina e le Alii ia Iosefa “ma tautala atu ia te ia mai le lagi, ma tuu atu ia te ia poloaiga” (Mataupu Faavae ma Feagaiga 1:17), sa Ia faaalia ai e Na te “musuia tagata ma valaaulia i latou i lana galuega paia i ona po nei ma lenei tupulaga, faapea foi ma augatupulaga anamua” ma faapea “o ia lava o le Atua e tasi o ananafi, i le asō, ma le faavavau” (Mataupu Faavae ma Feagaiga 20:11–12).

O loo faaauau pea i le asō le Toefuataiga lea na amata ia Iosefa. I le avea ai ma Au Paia o Aso e Gata Ai, ua valaauina i tatou e tautatala i le suafa o le Faaola ina ia mafai foi ona “faateleina o le faatuatua i le lalolagi,” faatuina Lana “feagaiga tumau e faavavau,” ma “ia mafai ona folafola atu le atoatoaga o [Lana] talalelei e ē vaivai ma e faatauvaa i tuluiga o le lalolagi” (Mataupu Faavae ma Feagaiga 1:21–23). Ua faamanuiaina i tatou i le mafai ona fesoasoani e fausia le Ekalesia ma saunia le lalolagi mo lena aso pe a toe foi mai Iesu Keriso.

Lotofaafetai mo le Perofeta o Iosefa

I le tausaga talu ona uma lo’u papatisoga, sa ma malaga ai ma lo’u toalua o Anita i le Malumalu o Nuku’alofa Tonga ina ia faamauina mo le olaga nei ma le faavavau atoa. O la’u molimau i le Toefuataiga na matua anoa ai lava le alu i le malumalu. O le talalelei toefuataiina a Iesu Keriso e moni o lona uiga o mea uma lava! Ua faatumulia lo’u loto i le agaga faafetai mo faamanuiaga ua ia aumaia ia te a’u ma lo’u aiga.

O nei faamanuiaga taua ua oo mai i le lalolagi e ala ia “Iosefa Samita, le Perofeta ma le Tagatavāai a le Alii, [o lē e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata na ola ai” (Mataupu Faavae ma Feagaiga 135:3). E tatau ona tatou faafetaia pea—ma aua lava nei galo—mea na tuuina mai ia i tatou e ala mai i le perofeta o lenei tisipenisione mulimuli.

E ala mai ia Iosefa, ua tatou malamalama ai i lo tatou sootaga faalefeagaiga ma le Tama Faalelagi ma Iesu Keriso. Ua ia i tatou le perisitua toefuataiina ma sauniga ma feagaiga. I le aafiaga o Iosefa i le Togalaau Paia, ua tatou aoao ai e oo lava foi a o lei faailoaina atu e le Tama Lona Alo, o Iesu Keriso, sa Ia ta’ua Iosefa i lona igoa (tagai i le Iosefa Samita—Talafaasolopito 1:17). E silafia foi e Ia i tatou i o tatou igoa. Ma e pei lava ona auina mai e le Tama Faalelaga tagata paia i le lalolagi ma tali mai le tatalo faigofie ma le loto o se alii e 14 tausaga le matua, o le a Ia tali mai foi a tatou tatalo i Lona lava finagalo, ala, ma le taimi, po o le a lava o tatou matutua. O nei upumoni ua faatumulia loloto ai totonu o lo’u loto. Ou te molimau atu e moni ia.

Ou te faamoemoe o a’u o se tagata o loo faia se lelei i le lalolagi. Afai o loo o’u faia, o lona uiga ua tele mea na faia e Iosefa Samita e saofaga ai i ai. Semanu e le pei lo’u olaga o le tulaga ua i ai nei, semanu e le avea a’u ma tane ma tamā ua ou i ai nei, ma semanu ou te le fiafia e pei ona ou i ai nei pe ana aunoa ma le talalelei toefuataiina lea na ositaulagaina ai e le Perofeta o Iosefa lona ola e aumai i le lalolagi. O le talalelei e aumaia ia te au le malamalama ma le faamoemoe. Mo lenei mea, o le a ou faafetai ai e faavavau mo le Perofeta o Iosefa.

Ou te aveina se kopi o le Tusi a Mamona i soo se mea ou te alu i ai, ma le faamoemoe e mafai ona ou tuuina atu i se tasi ma faailoa atu ia i latou le talalelei toefuataiina a Iesu Keriso. Ua faitau selau kopi ua ou tufaina atu i le lalolagi atoa. Ou te fiafia e faasoa atu le savali o le Toefuataiga—i soo se taimi, i soo se mea.

Sa faapitoa lava le moni o lenei mea pe a aoao atu ma molimau atu i la’u fanau ma Anita i totonu o puipui o lo matou fale. O loo auauna atu nei le ma tama teine i se misiona i le Aai o Niu Ioka, ISA. Ua ma fai atu ia te ia, “Alu ma molimau atu i le Faaola i lau itu o le lalolagi. O le a faia foi e lou Tina ma lou Tama lea lava mea e tasi i la ma itu o le lalolagi.” Matou te fiafia e faailoa soo i le tasi ma le isi la matou auaunaga. Ma i le taimi nei, ua i ai se afafine o le ma atalii e fa tausaga le matua. O le faamoemoe ma le moomooga o lo’u loto o le a faapea ona ia faalogo soo ma manatua pea lona Tamamatua o molimau atu e uiga i le Faaola ma Lana talalelei.

E mafai ona tatou molimau uma atu i faamanuiaga o le talalelei toefuataiina—i soo se taimi, i soo se mea—a o tatou ola i se olaga o faataitaiga o se soo o Iesu Keriso. E mafai ona tatou faasoa atu le Tusi a Mamona: “O Se Tasi Molimau ia Iesu Keriso” Ma e mafai ona tatou molimau atu ua toefuatai mai e Iesu Keriso le atoatoaga o Lana talalelei ma taitaia le Ekalesia i aso nei. Na aoao mai Peresitene Russell M. Nelson e faapea “e faaauau pea ona tafe mai faaaliga mai le Alii i lenei faagasologa faifai pea o le toefuataiga.” Ou te molimau atu o loo faaauau pea lenei mea e ala i se laina e le motusia o ki o le perisitua o loo umia e perofeta, tagatavaai, ma talifaaaliga o e musuia, taiala, ma fesoasoani ia i tatou e fusia i tatou lava i le Faaola o Iesu Keriso.

O la’u molimau ma le tautinoga lenei. O le a ou fiafia e faasoa atu i taimi uma ma e le mafai ona ou masalosalo i ai.