Tolauapiga o le Aso Timuga

“O la’u taaloga o taeao, a ea?” Na fesili ai Lusi a o tuu o ia e Tina i le moega.

Sa luelue atu le ulu o Tina. “Ioe! O le po taeao i le 6:00.”

Sa tau le mafai ona faatali Lusi. Sa ia tulimatai atu i le taaloga softball muamua a lana au mo ni vaiaso. Ma o le tausaga lenei sa piniki o latou ofu taalo! Sa matuai fiafia lava o ia ma sa faigata ai ona moe.

Ae o le taeao na sosoo ai, sa tilotilo atu ai Lusi i fafo o le faamalama ma faa’u’u. Sa tautau ao efuefu i le lagi, ma sa i ai vaivai i soo se mea. Sa timu le po atoa.

Sa tootuli o ia e fai lana tatalo i le taeao. “Le Tama Faalelagi Pele, faamolemole fesoasoani i le tau ina ia lelei mo la’u taaloga softball i le po nei.”

I le aso atoa i le aoga, sa mafaufau ai Lusi i le taaloga. Sa ia vaai faalemafaufau ia te ia o ofuina lona ofu taalo piniki fou, ma aapa atu e sapo le polo manumalo. Ae i fafo, sa timuga ma susū lava.

Sa ia faia se tatalo puupuu i lona mafaufau. Tama Faalelagi e, faamolemole fesoasoani i le la e vave ona sau ina ia mafai ona matou taaalo i le po nei.

Ina ua tatagi le logo o le aoga, sa uu mai e Lusi lana ato faafafa ma tamoe i fafo. Sa mafai ona ia vaaia le amata ona susulu mai o le la mai tua atu o ao!

Ae ina ua sau Tina e piki o ia, sa i ai sana tala le manaia. “Ua le oo le taaloga mo le po nei,” o lana tala lea. “Ou te faamalie atu.”

Sa tilotilo Lusi i le lagi. “Ae lea, ua oso ae le la. Atonu o le a taofia le timu.”

“Ua ou iloa,” o le tala lea a Tina. “Ae na lolovaia le malae softball mai le vai. E tusa lava pe le toe timu, e susū tele ma palapala e taaalo ai. O le a latou toe faatulagaina le taaloga mo se isi taimi.”

Sa loimatā foliga o Lusi. Sa matuai le fiafia lava o ia! Sa matuai manao lava o ia e taalo i le po nei. Aisea na le tali mai ai le Tama Faalelagi i lana tatalo?

I le fale, sa lagona e Lusi le puaoa ma le ita e pei o ao timuga. Sa le’i fia faitauina e ia lana tusi e sili ona fiafia i ai. Ma e ui lava sa fai e Tina lana makaroni e sili ona fiafia i ai mo le taumafataga o le afiafi, ae sa le’i lelei lona tofo.

Ina ua uma le taumafataga o le afiafi, sa tolotolo atu le uso laitiiti o Lusi, o Eli, i luga o ona vae. “Ta taaalo?” sa ia fesili ai.

Sa mapuea Lusi. “Ua lelei,” sa ia fai atu ai. Ona oso a’e lea o sona manatu. “Matou te manaomia se mea malie e fai.”

Sa ia uu mai se salu ma nonoa se sikafu i le pito e fai ai se fu’a. Ona ia faapotopotoina mai lea o ona uso uma. Sa ia siiina i luga le fu’a ma fai atu, “Susū maia i le Tolauapiga o le Aso Timuga! O iina e te alu ai e fiafia pe a le mafai ona e taalo i fafo.”

Sa alalaga ona uso.

“Muamua,” o le tala lea a Lusi, “o le a tatou usuina la tatou pese o le tolauapiga.”

Sa talie teineiti a o latou faia se pese malie ma ni upu e o faatasi ai. Ona latou savavali faataamilo lea i le potu ma la latou fu’a, ma pepese leotele i le mea latou te mafaia.

“O lea la e tatau ona faatulaga lo tatou faleie!” Sa fesoasoani Lusi i ona uso e ao mai palanikeke ma aluga e fai ai se olo. Sa toulu i ni nai taimi. Ae ina ua latou faaleleia, sa latou faapotopoto uma i totonu o le olo e taaalo i taaloga.

Sa lei leva ae oo i le taimi moe. “Ou te faamoemoe e toe timu taeao,” o le tala lea a le uso o Lusi o Liza. “Ou te fia toe taalo i le Tolauapiga o le Aso Timuga!”

“Faafetai mo le taaalo ma ou uso,” o le tala lea a Tina a o ia fusiina Lusi ma faamanuia atu iai le po. “Sa e faia lou lava la susulu mai se tulaga puaoa. Ua ou mimita lava ia te oe.”

Sa lagona e Lusi le fiafia a o ia pe’a i le moega. E lei taliina ana tatalo i le ala na ia manao ai. Ae sa fesoasoani pea le Tama Faalelagi ia te ia e saili se mea malie e fai i lona aiga—ma sa tutusa lava le malie ma le ofuina o le lanu piniki i lana taaloga softball muamua.

Tatala le PDF

O Ata na tusia e Apryl Stott