“Ita Tele e Tatalo,” Uo, Ianuari 2025, 4–5.

Ita Tele e Tatalo

Saunia e Abby Larkins

Sa manavanava tele i totonu Gabriela. O le a se mea e mafai ona ia faia e to’a ai?

O se tala moni mai Siamani.

“E leai se tasi e malamalama ia te au!” Sa ‘ee atu Gabriela a o ia ‘atoina le faitotoa o lona potumoe. O le asō sa o se aso faigata. Sa ulagia o ia e se tasi i le aoga. Ma ina ua toe foi mai Gabriela i le fale, sa ita tele o ia ma sa le fiafia i ai Mutti (Tina).

Sa oso Gabriela i luga o lona moega ma amata ona tagi. Sa tafe ifo loimata i ona alafau, ma sa lagona le fufusi o lona fatafata i le ita. Sa le’i fiafia o ia i lenei lagona.

Sa ia manatuaina le aoaoina i le Peraimeri e mafai ona ia tatalo i le Tama Faalelagi i soo se taimi lava na te manaomia ai se fesoasoani. Sa manao o ia e fai se tatalo e fesoasoani ai ia te ia ia maua se lagona lelei, ae sa le fiafia tele o ia e taulai atu i ai. Sa moeiini ona mata ma manavanava loloa. O le a se mea e mafai ona ia faia e to’a ai?

Ina ua mavae ni nai sekone, sa oo mai se manatu i lona mafaufau.

Mafaufau i ni mea e te faafetai ai.

Sa pupula ona mata ma tilotilo solo i lona potu. Sa i ai se ata i luga o le puipui o Mutti ma Vati (Tama). Sa alofa Gabriela i lona aiga, e ui lava ina sa le fiafia o ia ia i latou.

“Ou te faafetai mo o’u matua,” o lana tala lea.

Ona ia mafaufau lea i ona tausoga o Gwendolyn, Lydia, ma Thomas. E masani lava ona latou faasoa atu a latou meataalo ia te ia ma faaata o ia. Sa fiafia lava o ia e taaalo ma i latou.

“Ou te faafetai mo o’u tausoga,” o le tala lea a Gabriela.

Ona ia tilotilo atu lea i fafo i lona faamalama.

Ua goto le la, ma sa faatumulia le lagi i lanu matagofie—lanu moli, lanumumu, samasama, ma le piniki.

“Ou te faafetai mo le goto ifo o le la,” o le tala lea a Gabriela.

Ona ia mafaufau lea i nisi mea. Sa faafetai o ia mo le ‘aiga o le aoauli sa ia ‘ai ai i le aoga i le asō. Sa ia faafetai mo ana uo. Sa faafetai o ia mo le fale mautotogi sa nofo ai.

Sa manaia le mafaufau i mea e tatau ona faafetai ai! E lei iloaina lava e Gabriela le tele o mea lelei o i ai i lona olaga.

Sa ia iloaina na tuuina atu e le Agaga Paia ia te ia le manatu e mafaufau ai i ona faamanuiaga. Ua filemu lona loto i le taimi nei. Sa ia lagona le saunia e tatalo.

“Tamā Faalelagi pele e,” na ia fai atu ai. “Ou te faamalie atu ona sa ou ita ia Mutti. Faafetai atu ia te Oe mo le fesoasoani mai ia te au ia ou toe lagona le toafilemu ma le fiafia. Faafetai atu ia te Oe mo le auina mai o le Agaga Paia e faamanatu mai ia te au o’u faamanuiaga. I le suafa o Iesu Keriso, amene.”

Sa savali atu o ia i fafo o lona potu. Sa i ai Mutti ma Vati i le umukuka e fai le ‘aiga o le afiafi. Sa ia fusia Mutti.

“Ou te faamalie atu i lo’u ita ia te oe,” o le tala lea a Gabriela.

“E le afaina,” sa fai atu ai Mutti. Faafetai mo le faamaliega.”

Sa latou nonofo faataamilo i le laulauai ma faamanuia le meaai. Ona oso a’e lea o se manatu o Gabriela!

“Tatou faataamilo i le laulau ma ta’u mai se mea tatou te loto faafetai ai,” o lana tala lea.

Sa ataata Vati. “O se manatu lelei lena!”

“Ou te faafetai mo le fasimoli,” o le tala lea a Mutti.

Sa mafaufau Vati mo sina sekone.

“Pizza,” na ia fai mai ai. Sa latou talie uma.

Ona oo lea o le taimi ia Gabriela. Ua uma ona ia iloa le mea sa ia manao e fai atu.

“Ou te faafetai mo le tatalo.”