“E Pei Lava o Iosefa,” Uo, Ianuari 2025, 4–5.
Faitau Faigofie
E Pei Lava o Iosefa
Pe na vaai moni ea Iosefa Samita i le Tama Faalelagi ma Iesu Keriso?
O se tala moni mai Filipaina.
Sa osooso Lhensay i lona nofoa i autafa o lona tina a o tietie atu i le latou sipi i le taulaga. O le Aso Sa o le aso e sili ona fiafia i ai Lhensay i le vaiaso! Sa fiafia o ia e alu i le Peraimeri ma aoao e uiga ia Iesu Keriso.
Sa tu le sipi. Sa uu e Tina le lima o Lhensay a o la savavali atu i le lotu.
Ina ua uma le sauniga faamanatuga, sa savavali atu Lhensay i le Peraimeri ma lana uo o Maria. I luga o le laupapa sa i ai se ata o se alii talavou o loo tatalo i le togavao.
“Taeao manuia!” Sa faasino atu e lo latou faiaoga, o Sister Cruz, le ata. “E iloa e se tasi o ai lea?”
“O Iosefa Samita lena!” na fai mai ai Lhensay.
Na ataata Sister Cruz. “Ioe, e sa’o. Ma o le a le mea na faia e Iosefa Samita?”
Sa toe tepa i tua Lhensay i le ata. Sa ia iloa o Iosefa Samita o se perofeta, ae sa le tele isi mea na te iloa.
“O ia o le perofeta muamua o la tatou ekalesia,” o le tala lea a Maria.
“E sa’o!” o le tala lea a Sister Cruz. “A o talavou Iosefa, sa le iloa e ia po o le fea lotu e auai i ai. Sa alu o ia i le togavao ma tatalo i le Atua e saili po o le fea e moni. Na fesili atu foi o ia mo le faamagaloga o ana agasala. A o ia tatalo, sa faaali mai se malamalama susulu tele. E te iloa po o ai sa i ai i lena malamalama?”
Sa faatalitali Lhensay ma lana vasega atoa.
Sa tuu e Sister Cruz se isi ata i luga o le laupapa. O le tasi lenei o loo faaalia ai ni alii se toalua o loo tutu i luga a’e o Iosefa Samita i le ea. Sa la ofuina ni ofu talaloa papae ma susulu.
“Sa faaali atu le Tama Faalelagi ma Iesu Keriso i laua lava ia Iosefa,” o le tala lea a Sister Cruz. “Sa la ta’u atu ia te ia o le a ia toefuatai mai le Ekalesia a Iesu. Tatou te ta’ua o le Uluai Faaaliga.”
Sa sii i luga e Lhensay lona lima, ma mata lautele. “Pe moni ea?” sa ia fesili ai.
Sa lue atu le ulu o Sister Cruz. “Ioe, o lea lava!”
Sa lagona e Lhensay le mafanafana o lona loto. Sa ia iloa o mea na ta’u mai e Sister Cruz e moni.
O lena po, sa mafaufau ai pea Lhensay ia Iosefa Samita. “Tina, e mafai faapefea ona ou vaai i le Tama Faalelagi ma Iesu, e pei ona sa faia e Iosefa Samita?” sa ia fesili ai.
Sa opo e Tina ia Lhensay. “O le toatele o i tatou e le vaai i le Tama Faalelagi ma Iesu e pei ona sa vaai i ai Iosefa Samita. Ae e mafai lava ona La talanoa mai ia i tatou e ala i mafaufauga ma lagona mai le Agaga Paia. Ona mafai lea ona e iloa o loo faatasi pea i Laua ma oe.”
Sa mafaufau Lhensay i le lagona mafanafana o lona loto ina ua faamatala atu e Sister Cruz ia i latou e uiga i le Uluai Faaaliga. O le Agaga Paia lena, na auina atu ia te ia se savali mai le Tama Faalelagi ma Iesu Keriso! Sa ataata o ia, ma fusi atu lona Tina. Sa la talanoa mai ia te ia, e pei lava ona sa la talanoa ia Iosefa Samita!
Ata na tusia e Shawna J. C. Tenney