O Atu i le Lotu ma Ghuka

Saunia e Kelvin Njenga Mungai

E lei vaai muamua lava Kelvin i se lotu faapenei.

O se tala moni mai Kenya.

Sa faaputu ma le faaeteete e Kelvin fagu susu iila i luga o le fata. E lei leva ona siitia atu o ia e nonofo ma ona matua matutua i se nuu i fafo atu o le taulaga. Sa la onaina se fale susu, ma sa fiafia Kelvin e fesoasoani ai.

“O le po nei o le a matou o i se gaoioiga i la matou lotu,” o le tala lea a Ghuka (Tamamatua). “E te fia sau ma ma‘ua? O le a maua ai le fiafia.”

E fiafia Kelvin i le fiafia. “Ioe!” o lana tala lea. O le a tatou o”

Ina ua uma ona tapunia le faleoloa, sa savavali atu Kelvin ma ona matua matutua i le gaoioiga. Sa latou pasia isi faleoloa e faatau atu ai ie, fualaau aina, ma laau toto. Ina ua mavae sina taimi, sa latou taunuu i le lotu.

Tama ma lona tamamatua i fafo o se falelotu

Sa tu Kelvin ma mata lapopoa a o ia tilotilo atu i le fale matagofie. Na te lei vaai muamua lava i se lotu faapenei. O le tele o lotu sa i ai se satauro i le pito i luga, ae o le lotu lenei e leai se mea.

I totonu, na faailoa atu ai Kelvin e ona matua matutua i le tele o tagata lelei. Sa latou aai i meaai manaia ma taaalo i taaloga.

Ae sa fia iloa e Kelvin. O lea na ia fealuai solo ai i ala savali o le falelotu. Sa ia vaaia atavali o Iesu Keriso. Ona ia savali atu lea i totonu o se potuaoga ma matauina ni ata i luga o le puipui.

O ai nei tagata? Na mafaufau ai Kelvin.

Ina ua ia tuua le potu, sa ia vaaia ni alii talavou se toalua i totonu o le potu tele. Sa latou ofuina ofutino papae ma fusiua. “Talofa,” o le tala lea a se tasi o i laua. “O i ma’ua o ni faifeautalai. O ai lou igoa?”

Na faailoa atu e Kelvin o ia lava. Ona ia fesili atu lea, “O ai le tagata o loo i lena ata?” Sa ia toe faasino atu i se tasi o ata sa i totonu o le potu.

“O le perofeta lena,” o le tala lea a le isi faifeautalai. “E te iloa o le a le perofeta?”

Sa ataata Kelvin ma lulu lona ulu e leai.

“O se perofeta o se avefeau mai le Atua,” o le tala lea a le faifeautalai. “Na te aoaoina i tatou i mea e finagalo le Atua ia tatou iloa.”

Ina ua savavali atu Kelvin i le fale ma ona matua matutua i lena po, sa ia uuina se kopi o le Tusi a Mamona lea na tuuina atu e faifeautalai ia te ia. Sa fiafia o ia e aoao atili e uiga i perofeta ma lenei ekalesia fou.

“E mafai ona e faitau mai ia i ma’ua?” Na talosaga atu ai Ghuka ina ua latou taunuu i le fale. Sa le iloa e matua matutua o Kelvin faitau.

Tamaitiiti o loo faitauina le Tusi a Mamona i ona matua matutua

“Ioe!” na fai atu ai Kelvin. Sa ia tatalaina le Tusi a Mamona ma faitau leotele. Sa le’i malamalama o ia i upu uma, ae sa ia lagonaina se mea faapitoa.

I le Aso Sa, sa savavali atu ai Kelvin ma ona matua matutua i le lotu. Sa alu o ia i se vasega mo tamaiti uma. Sa ta‘ua o le Peraimeri. Sa ia faia ni uo se tele! Sa ia aoao atili e uiga i perofeta ma Iesu.

Na o mai faifeautalai e aoao atili Kelvin. I se tasi aso sa la fesili atu ai ia te ia. “Pe o le a e mulimuli ea i le faataitaiga a le Faaola ma papatisoina?”

Sa ataata tele Kelvin. “Ioe!”

I le aso o lona papatisoga, na laa atu ai Kelvin i totonu o le vai. Sa malulu tele. Ae a o tilotilo solo atu Kelvin, sa ia vaaia ona matua matutua, faifeautalai, ma ana uo fou uma mai le lotu. Sa ia lagonaina le alofagia!

O le filifili e mulimuli ia Iesu Keriso, na avea ai Kelvin ma paionia i lona aiga. Sa le mafai ona ia faatali e mulimuli pea ia te Ia—ma fesoasoani foi i isi e mulimuli ia te Ia!