“O Le Matatioata Na Leiloa,” Uo, Ianuari 2025, 44–45.
O Le Matatioata Na Leiloa
O se tala moni mai Polivia.
O le aso muamua o le aoga. Sa matuai fiafia Andrés! Ua i ai nei o ia i le vasega muamua. O ia o se tamaitiiti lapoa!
Ae ina ua taunuu o ia i le aoga, sa foliga mai e telē naua ma taufaafefe, e oo lava mo se tamaitiiti lapoa. Sa ia uuina le lima o Mami.
“O le a lelei mea uma.” Sa ataata Mami. “Faatalofa atu i lou faiaoga. Ia agalelei i au uo i le vasega. Ma aua nei galo ona vaai faalelei lau matatioata.”
I le vaiaso talu ai, na maua ai e Andrés lana uluai matatioata. E faamanatu atu pea e ona matua ia te ia e vaai faalelei.
Sa talotalo faatofa atu Mami. “Ia manuia lou aso!”
Ae sa le’i maua e Andrés se aso lelei. Sa tupu se mea le manaia!
Sa tamoe atu o ia ia Mami ina ua uma le aoga. “Ua leiloa la’ u matatioata!” sa ia tagi mai ai. “Sa ou su’eina i nofoaga uma, ae e le’i maua!”
“Auoi leai!” Sa foliga popole Mami. “Sa ole atu i le Tama Faalelagi mo le fesoasoani.”
“E te manatu o le a aoga?” na ia fesili ai.
“Ta faataitai i ai ma vaai. E faafofoga mai lava le Tama Faalelagi i taimi uma i a tatou tatalo,” o le tala lea a Mami.
Sa faia e Andrés ma Mami se tatalo. Sa la ole atu i le Tama Faalelagi e fesoasoani ia Andrés ia maua lana matatioata.
O le aso na sosoo ai i le aoga, sa faanoanoa ai lava Andrés. Ona savali atu lea o se tamaitiiti ia te ia.
“Ou te manatu o oe e anaina le mea lea. Sa tuu atu e le tamaitiiti se matatioata. “Sa ou mauaina i le malae soka.”
Sa ave e Andrés le matatioata. O ia e anaina! Sa le mafai ona talitonu i ai o ia!
Ina ua uma le aoga, sa tamoe atu o ia ia Mami ma fusi tele atu ia te ia.
“Ua maua lau matatioata!” o lana tala lea. “Ai sou fiafia ua e toe mauaina.”
“Ia!” O le tala lea a Andrés. “Ae ua sili atu lo’u fiafia ona o mea na ou aoaoina.”
“O le a la lena mea?”
Sa ataata tele Andrés . “E aoga le tatalo!”
O ata na saunia e Susanna Teodoro