O Gaoioiga o le Sau, Mulimuli Mai ia te A’u

O le toefuatai o se mea o lona uiga o le toe tuufaatasia. Faitau le “O Le Toefuataiga o le Atoatoaga o le Talalelei a Iesu Keriso: O Se Folafolaga e Lua Selau Tausaga i le Lalolagi” i le Potutusi o le Talalelei e aoao atili ai e uiga i le auala na toefuatai mai ai le Ekalesia. Ona taalo lea i se taaloga o le toefuataiga! Saili pe tusi se ata ma tipi i ni fasi paso. Faafesuiai paso ma se tagata o le aiga ma toefuatai mai ata o le tasi ma le isi. Aisea na taua ai le toefuatai mai e Iosefa Samita o le talalelei a Iesu Keriso?

E masani ona fetalai mai le Alii ia i tatou e ala mai i Ana auauna (tagai i le Mataupu Faavae ma Feagaiga 1:38). E tatau lava ona tatou faalogo! Faataitai le faalogo e ala i le taalo i se taaloga. E toatasi le tagata e taina musika, ma e sisiva tagata uma a o taina le musika. Pe a taofi le musika, e faamalo tagata uma. Po o ai lava e faamalo mulimuli, e faasoa mai se mafuaaga se tasi latou te alolofa ai i perofeta. Taalo seia oo ina maua e tagata uma se taimi e faasoa atu ai!

Sa faaali atu le Tama Faalelagi ma Iesu Keriso ia Iosefa Samita (tagai i le Talafaasolopito—Iosefa Samita 1:15–20). Tatou te ta’ua lenei mea o le Uluai Faaaliga. Susue i le itulau 13 e fai ai lau lava vaaiga valivali o le Uluai Faaaliga, ona faaaoga lea e faamatala ai i se isi tagata le tala.

A tatou aoao atili e uiga i o tatou tuaa, tatou te lagona le latalata atili atu ia i latou ma le Tama Faalelagi (tagai Mataupu Faavae ma Feagaiga 2). Fai atu i se tagata o le aiga e faamatala atu ia te oe se tala mai o latou olaga po o le soifuaga o se tasi o ou tuaa. Ona toe fai lea o le tala o se tala faatino po o se ata!